བཞུགས་སྒར་བོད་ཀྱི་དཔེ་མཛོད་ཁང་ནས་ན་གཞོན་ལ་ཟབ་སྦྱོང༌།

• 
  2009-07-01

༄༅༎ཕྱི་ལོ་ཉིས་སྟོང་དགུའི་ཕྱི་ཟླ་ལྔ་པའི་ཚེས་གཅིག་ནས་ཕྱི་ཟླ་དྲུག་པའི་ཚེས་སུམ་བཅུ་བར་ཟླ་བ་གཉིས་རིང་བཞུགས་སྒར་དུ་རྟེན་གཞི་གནང་བའི་བོད་ཀྱི་དཔེ་མཛོད་ཁང་དུ་བོད་ཕྲུག་ན་གཞོན་རྣམས་ལ་བོད་ཀྱི་སྐད་ཡིག་དང་རྩོམ་རིགས།ལོ་རྒྱུས།རིག་གཞུང༌།ནང་ཆོས་བཅས་ཀྱི་ཟབ་སྦྱོང་གནང་འདུག

བོད་ཀྱི་དཔེ་མཛོད་ཁང་གིས་བོད་གཞུང་མང་བཙན་བྱོལ་དུ་གྱར་ནས་མི་ལོ་ལྔ་བཅུ་འཁོར་བའི་དུས་དྲན་སྲུང་བརྩི་ཞུ་ཕྱིར་བོད་ཀྱི་དཔེ་མཛོད་ཁང་གི་རིག་གཞུང་ནམས་ཞིབ་སྡེ་ཚན་གྱིས་རྒྱ་གར་གྱི་མཐོ་སློབ་ཁག་ནས་སྦི་ཨེ་དང་སྦི་ཀོམ།སྦི་ཨེ་སི་གང་རུང་ཐོབ་པའི་བོད་པའི་ན་གཞོན་དང་དེ་མཚུངས་ཧི་མ་ལ་ཡའི་རི་རྒྱུད་ཀྱི་ཁོངས་གཏོགས་འབྲས་ལྗོངས་དང་འབྲུག་བཅས་ཀྱི་ན་གཞོན་རྣམས་ལ་བོད་ཀྱི་དཔེ་མཛོད་ཁང་ནས་ཞུ་སྙན་ཕུལ་དགོས་སྐོར་གསལ་བསྒྲགས་ཉིས་སྟོང་དགུ་ལོའི་ཕྱི་ཟླ་གསུམ་པའི་ཚེས་བཅུ་དྲུག་ཉིན་གནང་ཡོད་པ་ལྟར་ཟླ་བ་གཉིས་རིང་གི་ཟབ་སྦྱོང་དེ་དག་དེ་རིང་མཇུག་སྒྲིལ་གནང་བཞག

ཟབ་སྦྱོང་ནང་ཞུགས་མཁན་བོད་རིགས་ན་གཞོན་ཚོར་ལོ་རྒྱུས་ཀྱི་སློབ་དཔོན་དབང་འདུས་ལགས་དང་བློ་བཟང་ཤསྟི་ལགས།སྐད་ཡིག་གི་སློབ་དཔོན་ན་ག་སངས་རྒྱས་བསྟན་དར་ལགས་དང་ནང་ཆོས་སློབ་སྟོན་པ་དགེ་བཤེས་བློ་བཟང་བཙོན་འགྲུས་ལགས་བཅས་ཀྱིས་ཟླ་བ་གཉིས་རིང་སློབ་ཁྲིད་གནང་ཡོད་ཅིང་དེ་རིང་ཟབ་སྦྱོང་གི་ཉིན་མཐའ་མ་དེར་བཙན་བྱོལ་བོད་གཞུང་ཕྱི་སྲིད་བཀའ་བློན་ལྕམ་སྟག་ལྷ་སྐལ་བཟང་དབྱངས་སྐྱིད་མཆོག་སྐུ་མགྲོན་གཙོ་བོར་གདན་ཞུས་ཀྱིས་སློབ་ཁྲིད་ཁང་དུ་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་དང་སྐད་ཡིག་དང་ནང་ཆོས།རིག་གནས།ལོ་རྒྱུས་བཅས་ཀྱི་སློབ་དཔོན་རྣམ་པ་ཚོས་གསུང་བཤད་གནང་ཡོད་པ་དང་སྐུ་མགྲོན་གཙོ་བོ་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་སློབ་ཕྲུག་ཚོར་ཕྱག་འཁྱེར་དང་མཇལ་དར་གནང་རྗེས་རང་མི་རིགས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ཉར་ཚགས་གནང་གལ་ཆེ་བའི་གལ་ཆེའི་ལམ་སྟོན་གནང་འདུག།