ས་གནས་འདྲ་མིན་ནང་བོད་རང་བཙན་གྱི་ཉིན་མོ་སྲུང་བརྩི།

• 
  2020-02-13

བོད་རང་བཙན་སློབ་ཕྲུག་ཚོགས་པས་བཞུགས་སྒར་རྡ་རམ་ས་ལ་གཙོས་ས་གནས་འདྲ་མིན་ནང་བོད་རང་བཙན་གྱི་ཉིན་མོ་ཞེས་སྲུང་བརྩི་ཞུས་འདུག
ཕྱི་ལོ་༢༠༢༠ ལོའི་ཟླ་༠༢་པའི་ཕྱི་ཚེས་༡༣་ཉིན། བོད་རང་བཙན་སློབ་ཕྲུག་ཚོགས་པས་གོ་སྒྲིག་བྱས་ནས་ཕྱི་རྒྱལ་ཡུལ་གྲུ་ཁག་གི་གྲོང་ཁྱེར་འདྲ་མིན་༣༠་སྐོར་ཞིག་གི་ནང་། བོད་རང་བཙན་གྱི་ཉིན་མོ་ཞེས་སྲུང་བརྩི་བྱེད་བཞིན་ཡོད་པ་དང་། རྒྱ་གར་རྡ་རམ་ས་ལར་བོད་རང་བཙན་སློབ་ཕྲུག་ཚོགས་པས་གོ་སྒྲིག་འོག་ལས་འགུལ་བ་རྣམས་ནས་བོད་ཀྱི་ཆས་གོས་གཟབ་མཆོར་སྤྲས་ཏེ་བོད་རང་བཙན་གྱི་ཉིན་མོ་ཞེས་སྲུང་བརྩི་ཞུས། སྐབས་དེར་རྒྱ་གར་བོད་རང་བཙན་སློབ་ཕྲུག་ཚོགས་པའི་འགན་འཛིན་རིན་འཛིན་ཆོས་སྒྲོན་ལགས་ཀྱིས། རྒྱུན་དུ་རྒྱ་ནག་གཞུང་ནས་བོད་ཀྱི་ལོ་རྒྱུས་ལ་འཁྱོག་བཤད་བྱས་ཏེ་སྔ་རབས་ནས་བོད་དེ་རྒྱ་ནག་གི་ཆ་ཤས་ཡིན་ལུགས་བརྗོད་བཞིན་ཡོད་པར་བརྟེན། དེ་རིང་ཉིན་མོ་འདི་དང་བསྟུན་ང་ཚོས་འཛམ་གླིང་མི་དམངས་ལ་ལོ་རྒྱུས་ཐོག་ནས་བོད་དེ་རང་བཙན་གྱི་རྒྱལ་ཁབ་ཤིག་ཡིན་པ་གསལ་སྟོན་གནང་རྒྱུ་དང་། མི་རབས་གསར་པ་ཚོས་བོད་ཀྱི་ལོ་རྒྱུས་ལ་དོ་སྣང་དང་རྒྱུས་ལོན་ཡོང་ཆེད་སོགས་ཀྱི་ཆེད་དུ་གོ་སྒྲིག་ཞུས་པ་ཞིག་ཡིན་ཞེས་འགྲེལ་བརྗོད་གནང་སོང་།
སྤྱིར་བོད་རང་བཙན་སློབ་ཕྲུག་ཚོགས་པའི་ངོས་ནས་ཕྱི་ལོ་༢༠༡༣་ལོར་རྒྱལ་དབང་སྐུ་ཕྲེང་བཅུ་གསུམ་པ་མཆོག་གིས་བོད་རང་བཙན་བསྐྱར་ནན་གྱི་གསལ་བསྒྲགས་སྤེལ་ནས་ལོ་བརྒྱ་འཁོར་བའི་ཉིན་མོ་དང་སྟབས་བསྟུན་འགོ་འཛུགས་བྱས་ཏེ་ལོ་ལྟར་སྤྱི་༢་ཚེས་༡༣་ཉིན་སྲུང་བརྩི་ཞུ་བཞིན་ཡོད་པ་དང་།  ཐེངས་འདིའི་ལས་འགུལ་ཐོག་བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད་ཅེས་པའི་བརྗོད་ཚིག་འོག་བོད་ཀྱི་ན་གཞོན་༢༥་མཉམ་བཞུགས་གནང་འདུག་ཅིང་། མཉམ་ཞུགས་པ་ན་གཞོན་ལྷ་སྒྲོན་ལགས་ཀྱིས། ཁོང་མོ་ད་རེས་ལས་འགུལ་འདིའི་ནང་མཉམ་ཞུགས་བྱེད་དགོས་པའི་རྒྱུ་མཚན་ནི་བོད་ཀྱི་རྩ་དོན་ཆེད་དུ་གཞོན་སྐྱེས་ཚོར་འགན་འཁྲི་ཆེན་པོ་ཡོད་པ་བརྡ་ལན་སྤྲོད་ཆེད་ཡིན་པ་འགྲེལ་བརྗོད་གནང་གི་འདུག
ཡང་བསོད་ནམས་ཚེ་རིང་ལགས་ཀྱིས། དེ་རིང་གི་ཉིན་མོ་འདི་ནི་འཛམ་གླིང་མི་དམངས་ལ་ལོ་རྒྱུས་ཐོག་ནས་བོད་དེ་རང་བཙན་གཙང་མའི་རྒྱལ་ཁབ་ཤིག་ཡིན་པ་བདེན་དཔང་ར་སྤྲོད་བྱེད་རྒྱུའི་ཉིན་མོ་ཞིག་ཆགས་ཡོད་པ་དང་། མ་འོངས་པར་ཡང་བོད་རྒྱལ་ཁབ་དེ་དེ་ལྟར་ཡོང་བའི་རེ་བ་བྱེད་ཀྱི་ཡོད་ཅེས་འགྲེལ་བརྗོད་གནང་གི་འདུག
ཐེངས་འདིའི་ལས་འགུལ་དེ་བཞིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འཁྲིས་སུ་ཡོད་པའི་ཆོལ་གསུམ་དཔའ་བོའི་རྡོ་རིང་མདུན་ནས་འགོ་བཙུགས་ཀྱིས་རྡ་ས་མེགྷ་ལོར་གསུམ་མདོ་ལ་མཇུག་སྒྲིལ་གནང་ཞིང་། དེ་ནས་ཉིན་འདིའི་ཕྱི་དྲོ་ཕྱག་ཚོད་༦་པར་གཏམ་བཤད་ལས་རིམ་གྱི་ལམ་ནས་ཕྱི་ལོ་༡༩༡༤་ལོར་བཞག་པའི་སིམ་ལ་ཆིངས་ཡིག་གི་འབྱུང་རྐྱེན་ངོ་སྤྲོད་དང་གྲོས་བསྡུར་གནང་ཡོད་འདུག