༸གོང་ས་མཆོག་ནང་ཆོས་བགྲོ་གླེང་གི་ཚོཌ་མགོན་དུ་ཆིབས་བསྒྱུར།

• 
  2010-07-24

༄༅༎བཙན་བྱོལ་བོད་གཞུང་གི་དྲ་རྒྱའི་ཐོག་གནས་ཚུལ་བཀོད་པར་གཞིགས་ན། འདི་ཚེས་༢༢ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ལྡུམ་ར་བསམ་དགོན་བྱམས་བརྩེ་ཐོས་བསམ་སློབ་གཉེར་བའི་ནང་ཆོས་བགྲོ་གླེང་ཚོགས་འདུའི་ཚོགས་མགོན་དུ་ཆིབས་བསྒྱུར་བཀྲིན་བསྐྱངས་ཏེ། ནང་པ་སངས་རྒྱས་པའི་བསྟན་པ་འདི་སྤྱིར་འཛམ་གླིང་འདིའི་སྟེང་གི་གཅེས་ནོར་ལབ་ཀྱང་ཆོག་པ་ཞིག་དང་དགོས་སུ་ལ་དྭགས་དང་ཧི་མ་ལ་ཡའི་རི་རྒྱུད་སྤྱིའི་མཚོན་ཆེད་ཅིག་ཆགས་ཡོད་སྟབས། རབ་བྱུང་ཕོ་མོ་ཙམ་མ་ཡིན་པར་སྐྱ་སེར་ཚང་མར་འགན་ཡོད་པ་ཞིག་རེད། བོད་གངས་ཅན་ལྗོངས་ལ་འདས་པའི་ལོ་ ༦༠ ཙམ་གྱི་རིང་ལ་དཀའ་ངལ་ཆེན་པོ་འཕྲད་དང་འཕྲད་བཞིན་པ་རེད། ཡིན་ནའང་སྤྱིར་འཛམ་གླིང་སྤྱིའི་འགྱུར་བ་དང་ཡང་སྒོས་སུ་རྒྱ་ནག་ནང་གི་འགྱུར་བ་ལ་བརྟེན་ནས་རིམ་པས་བཟང་ཕྱོགས་ཀྱི་འགྱུར་བ་ཡོང་རྒྱུའི་རེ་བ་ཡོད། འོན་ཀྱང་བསྟན་པ་ལ་ཆེད་དུ་གཉེར་ནས་སྟངས་འཛིན་བྱེད་རྒྱུ་ཞིག་ཆགས་ཡོད་དུས་དཀའ་ངལ་ཆེན་པོ་ཡོད་པའི་སྐབས་འདིར་ཧི་མ་ལ་ཡའི་རི་རྒྱུད་ཀྱི་མི་མང་ཚོར་སློབ་སྦྱོང་བྱེད་རྒྱུའི་རང་དབང་དང་གོ་སྐབས་ཡོད་དུས། བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་ཐེག་པ་ཆེ་ཆུང་སྔགས་དང་བཅས་པ་དེ་ཆ་ཚང་བ་བདག་ཉར་བྱེད་རྒྱུ་ཁྱེད་རང་ཚོ་བོད་གངས་ཅན་ལྗོངས་ཀྱི་བསྟན་པ་གཅིག་གྱུར་ཡིན་མཁན་ཚོས་ཤུགས་བརྒྱབ་ནས་རིག་པ་འགྲིམས་རྒྱུའི་དམིགས་བསལ་འགན་ཡོད་པ་རེད་ཅེས་བཀའ་སློབ་བསྩལ་གནང་མཛད་འདུག།

དེ་ཡང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནུབ་ར་བསམ་གཏན་གླིང་དུ་ཆིབས་སྒྱུར་གནང་བའི་སྐབས་དང་བསྟུན་ནས། མགོན་པོ་གང་ཉིད་ཀྱི་བཀའ་བཞིན་སྒྲུབ་པའི་མཆོད་པའི་ཆ་ཤས་བསྟན་པ་རྒྱས་པའི་ཆ་རྐྱེན་དུ། དམ་ཆོས་ཁྱབ་སྤེལ་དང་འབྲེལ་བའི་བགྲོ་གླེང་ཞིག་བསམ་དགོན་བྱམས་བརྩེ་ཐོས་བསམ་གླིང་སློབ་གཉེར་བ་ཚོས་གོ་སྒྲིག་གནང་བའི་ཐོག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་དགའ་ལྡན་ཁྲི་རིན་པོ་ཆེ་མཆོག་རྣམ་གཉིས་དབུ་བཞུགས་ཐོག་བགྲོ་གླེང་གི་བརྗོད་གཞི། དཔལ་ན་ལེཎྜའི་ཆོས་བརྒྱུད་ཟབ་མོ་འདི་ཉིད་མི་ཉམས་ཡུན་གནས་ཡོང་ཐབས་སུ་ཧི་མ་ལ་ཡའི་ལྗོངས་ཀྱི་མི་མང་རྣམས་ཀྱིས་ཐུགས་འགན་བཞེས་ཕྱོགས་སྐོར་གྱི་འགྲེལ་བཤད་དང་། རང་རེ་ནང་པ་སངས་རྒྱས་པ་རྣམས་དུས་རབས་ཉེར་གཅིག་པའི་ནང་པ་ཚད་ལྡན་ཞིག་བྱེད་དགོས་ཚུལ་སྐོར་གྱི་བགྲོ་གླེང་གནང་ཡོད་པ་དང་། བགྲོ་གླེང་ཚོགས་འདུའི་ཐོག་འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་རི་རྫོང་སྲས་སྤྲུལ་རྗེ་བཙུན་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་མཆོག་གིས་རྒྱལ་བ་སྐུ་ཕྲེང་བཅུ་གསུམ་པ་དང་བཅུ་བཞི་པའི་མཛད་འཕྲིན་སྐོར་དང་། ནང་པ་སངས་རྒྱས་པའི་བསྟན་པ་འདི་བཞིན་མི་ཉམས་རྒྱུན་འཛིན་གནང་རྒྱུ་དེ་ནི་དགེ་བཙུན་གཅིག་པུར་མ་ཡིན་པར་སྐྱ་བོ་ཕོ་མོ་ཚོར་ཡང་འགན་ཡོད་པའི་བཀའ་སློབ་ཀྱང་བསྩལ་འདུག