པ་ཀི་སི་ཐན་གྱི་སྲིད་བློན་རྒྱ་ནག་ཏུ་འཚམས་གཟིཌ

• 
  2011-05-20

༄༅༎རྒྱ་ནག་གི་སྲིད་འཛིན་ལྦུའུ་ཇིང་ཐའོ་ཡིས་གཟའ་པ་སངས་ཉིན་རྒྱ་ནག་ནང་འཚམས་གཟིགས་གནང་བཞིན་པའི་པ་ཀི་སི་ཐན་གྱི་སྲིད་བློན་ཡུ་སཕ་ར་ཛ་གི་ལ་ནི་དང་མཇལ་འཕྲད་གནང་བའི་སྐབས་པ་ཀི་སི་ཐན་ནི་རྒྱ་ནག་གི་བློ་བརྟན་འགྱུར་མེད་ཀྱི་གྲོགས་པོ་རྙིང་པ་ཡིན་ལུགས་བརྗོད་ནས་དགའ་བསུའི་རྣམ་འགྱུར་ཤུགས་ཆེ་བཏོན་ཡོད་པ་རེད་ ད་རེས་པ་ཀི་སི་ཐན་གྱི་སྲིད་བློན་རྒྱ་ནག་ནང་མཚམས་གཟིགས་སུ་ཕེབས་པའི་སྐབས་དང་ ཨ་རིས་འཇིགས་སྐུལ་དྲག་སྤྱོད་པའི་བྱེད་གཏེ་ཨོ་ས་མ་བིན་ལའ་ཀྲན་པ་ཀི་སི་ཐན་ནང་དམར་བསད་བཏང་བའི་གནད་དོན་དང་འབྲེལ་བའི་པ་ཀི་སི་ཐན་ལ་ཨ་རི་དང་ནུབ་ཕྱོགས་ཡུལ་ཁག་གིས་སྐྱོན་བརྗོད་བྱེད་བཞིན་པའི་སྐབས་ཡིན་ཞིང་ པ་ཀི་སི་ཐན་གྱི་སྲིད་བློན་ནས་ གཟའ་ཕུར་བུའི་ཉིན་རྒྱ་ནག་གི་པེ་ཅིན་སློབ་གྲ་ཆེན་མོའི་ནང་གཏམ་བཤད་སྤེལ་བའི་སྐབས་ རྒྱ་ནག་དང་པ་ཀི་སི་ཐན་ཡུལ་གྲུ་གཉིས་དབར་དུས་ཡུན་རིང་པོའི་མཛའ་གྲོགས་ཀྱི་འབྲེལ་ལམ་དང་མཐུན་ཕྱོགས་ཡུལ་གྲུ་ཡིན་པ་མ་ཟད་ཡུལ་གྲུ་གཉིས་དབར་གྱི་འབྲེལ་ལམ་བརྒྱུད་ནས་རྒྱལ་སྤྱི་དང་མངའ་ཁུལ་གྱི་གནད་དོན་མང་པོར་ཐག་གཅོད་ཐུབ་ཀྱི་ཡོད་ལུགས་བརྗོད་ཡོད་འདུག གཟའ་པ་སངས་ཉིན་པ་ཀི་སི་ཐན་གྱི་སྲིད་བློན་དང་རྒྱ་ནག་གི་སྲིད་འཛིན་ལྦུའུ་ཇིང་ཐའོ་དབར་མཇལ་འཕྲད་མ་གནང་སྔོན་ རྒྱ་ནག་གི་སྲིད་འཛིན་ལྦུའུ་ཇིང་ཐའོ་ཡིས་ད་རེས་ཀྱི་པ་ཀི་སི་ཐན་གྱི་སྲིད་བློན་རྒྱ་ནག་ནང་འཚམས་གཟིགས་སུ་ཕེབས་པའི་ཐོག་ནས་ཡུལ་གྲུ་གཉིས་དབར་གྱི་མཛའ་གྲོགས་ཀྱི་འབྲེལ་ལམ་དང་ མཉམ་ལས་བྱ་རྒྱུ་དེས་ཡུལ་གྲུ་གཉིས་ཀར་ཕན་ཐོགས་ཡོད་པ་ཞིག་ཡིན་པ་མཚོན་ཐུབ་ལུགས་འགྲེལ་བརྗོད་བྱས་ཡོད་འདུག