ཨ་རིའི་སྲིད་འཛིན་གྱི་གསུང་བཤད་ནང་བོད་དོན་གླེང་རྒྱུ་མིན་སྐོར།

༄༅༎ཨ་མི་རི་ཀའི་སྲིད་འཛིན་མཆོག་གི་རེས་གཟའ་སྤེན་པའི་གསུང་བཤད་ནང་བོད་ཀྱི་གནད་དོན་སྐོར་གསུང་རྒྱུ་མིན་པའི་གནས་ཚུལ་ཐོན་འདུག

ཨ་མི་རི་ཀའི་སྲིད་འཛིན་ཨོ་སྦ་མ་མཆོག་གིས་ཨེ་ཤེ་ཡའི་ཡུལ་གྲུ་བཞིའི་ནང་གི་རྒྱལ་དོན་འཚམས་གཟིགས་ཉི་ཧོང་ནས་དབུ་བཙུགས་གནང་ཡོད་ཅིང་ཁོང་གི་མཛད་རིམ་གྱི་ཉིན་གཉིས་པ་རེས་གཟའ་སྤེན་པའི་ཉིན་ཨ་མི་རི་ཀའི་ཨེ་ཤེ་ཡའི་ཐོག་འཛིན་རྒྱུའི་སྲིད་བྱུས་ཀྱི་ནང་དོན་ཡོད་པའི་གསུང་བཤད་གཞི་རྒྱ་ཆེན་པོ་ཞིག་གནང་རྒྱུ་ཡིན་པ་རེད་འདུག

འོན་ཀྱང་སྲིད་འཛིན་ཨོ་སྦ་མ་མཆོག་གི་རྒྱལ་ཡོངས་བདེ་འཇགས་སློབ་སྟོན་པ་སྦེན་རོདྲ་སི་ཡིས་འགྲེལ་བརྗོད་གནང་དོན་ལྟར་ན་ཨ་མི་རི་ཀའི་སྲིད་འཛིན་མཆོག་གི་གསུང་བཤད་དེའི་ནང་བོད་ཀྱི་གནད་དོན་སྐོར་གསུང་རྒྱུ་མིན་པའི་འགྲེལ་བརྗོད་གནང་འདུག

ཡིན་ནའང་ཨ་མི་རི་ཀའི་ངོས་ནས་འགྲོ་བ་མི་ཚང་མར་ཐོབ་ཐང་དང་རང་དབང་གི་ཐོག་གནས་དགོས་པའི་ཐོག་འགན་འཁྲི་ཡོད་པ་དེ་ནན་བརྗོད་གནང་གི་ཡོད་པའི་སྐོར་སྲིད་འཛིན་གྱི་སློབ་སྟོན་པ་དེ་ཉིད་ཀྱིས་གསལ་བཤད་གནང་འདུག འོན་ཀྱང་ཨ་མི་རི་ཀའི་སྲིད་འཛིན་མཆོག་རྒྱ་ནག་ཏུ་ཕེབས་པའི་སྐབས་རྒྱ་ནག་གི་དཔོན་རིགས་རྣམས་ལྷན་དུ་བོད་ཀྱི་གནད་དོན་སྐོར་ཐད་ཀར་གླེང་སློང་གནང་རྒྱུ་ཡིན་པའི་སྐོར་སྲིད་འཛིན་གྱི་སློབ་སྟོན་པ་ཞིག་གིས་ནན་བརྗོད་གནང་ཡོད་པ་རེད།

བོད་ནང་དུ་གནས་པའི་བོད་མི་རྣམས་ཀྱིས་ཀྱང་ཨ་མི་རི་ཀའི་སྲིད་འཛིན་མཆོག་རྒྱ་ནག་ཏུ་ཕེབས་ནས་རྒྱ་ནག་གི་དབུ་ཁྲིད་རྣམས་དང་ལྷན་དུ་བོད་ཀྱི་གནད་དོན་སྐོར་གྲོས་མོལ་གནང་རྒྱུའི་རེ་འདུན་གནང་གི་ཡོད་པ་རེད་འདུག