མདོ་སྨད་རྔ་བ་ནས་དགེ་འདུན་པ་ཕུན་ཚོགས་ཀྱིས་ཞི་བའི་སྐད་འབོད།

• 
  2015-03-08

མདོ་སྨད་རྔ་བ་ནས་དགེ་འདུན་པ་ཕུན་ཚོགས་ཀྱིས་བོད་ལ་རང་དབང་དགོས་བའི་ཞི་བའི་སྐད་འབོད་བྱས་རྗེས་འཇུ་བཟུང་བྱས་འདུག
དེ་ཡང་བོད་ནས་གནས་ཚུལ་འབྱོར་བ་ལྟར་ན། སྤྱི་ཟླ་༣པའི་ཚེས༨ཉིན་གྱི་ཉིན་གུང་ཙམ་ལ་དགེ་འདུན་པ་ཕུན་ཚོགས་ཞུ་བས་རྔ་བ་རྫོང་མཁར་གྱི་གཞུང་ལམ་སྟེང་ནས་༧གོང་ས་མཆོག་གི་སྐུ་པར་ཆེན་པོ་ཞིག་མཁའ་ལ་འཕྱར་བཞིན་བོད་ལ་རང་དབང་དགོས་པའི་ཞི་སྐད་འབོད་བྱས་ཡོད་པ་དང་། རིང་བོ་མ་སོང་བར་ས་གནས་རྒྱ་ནག་གི་ཉེན་རྟོག་པ་ཚོས་གཅར་རྡུང་དྲག་པོས་འཇུ་བཟུང་བྱས་འདུག ས་གནས་བོད་མི་ཞིག་གིས་བརྗོད་དོན། དགེ་འདུན་པ་ཁོས་༧གོང་ས་མཆོག་བོད་ལ་ཕེབས་སུ་འཇུག་དགོས། བོད་ལ་རང་དབང་དང་འདྲ་མཉམ་དགོས། བོད་ལ་རང་དབང་མེད་པའི་སྡུག་བསྔལ་བཟོད་ཐབས་མི་འདུག ༧གོང་ས་མཆོག་ཁྲི་ལོར་བསྟན་པར་ཤོག་ཅེས་ཞི་བའི་འབོད་སྒྲ་སྒྲོག་ཡོད་པ་བརྗོད་བྱུང་།
སྔ་ས་ནས་ས་གནས་གང་སར་ཡོད་པའི་རྒྱ་ནག་གི་ཉེན་རྟོག་པ་ཚོས་ཁོང་འཇུ་བཟུང་བྱས་རྗེས་ཀྱི་གནས་སྟངས་གསལ་བོ་མེད་པ་རེད།
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པས་འདི་གར་གནས་ཚུལ་བཏང་བ་ལྟར་ན། ཕུན་ཚོགས་ལགས་ནི་རྔ་བ་རྫོང་གཅའ་ཡུལ་ཚོའི་ཕྱུགས་ལས་འགབ་མའི་ཕ་བཀྲ་རྒྱ་དང་། མ་རིག་གོ་གཉིས་ཀྱི་བུ་རང་ལོ་༡༨ཙམ་ཡིན་ཞིང་། ཆུང་ཆུང་སྐབས་ནས་རྔ་བ་ཀིརྟི་དགོན་པར་ཆོས་ཞུགས་བྱས་ཏེ་ལོ་སྔོན་མའི་ནང་སྔོན་འགྲོའི་འཛིན་གྲྭ་ཁག་མཐར་ཕྱིན་ཡོད་འདུག
དེ་བཞིན་རྔ་བ་སྤྲོ་ཚིགས་ནས་ཡིན་པའི་བུད་མེད་དགུང་ལོ༤༧ཅན་གྱི་ནོར་ཕྱུགས་ཞེས་བས་རྒྱ་ནག་གི་སྲིད་ཇུས་ལ་ཞི་བའི་ངོ་རྒོལ་ཆེད་རང་ལུས་མེར་བསྲེགས་བཏང་བའི་གནས་ཚུལ་ཡོང་བཞིན་པ་དང་། རྒྱ་ནག་གཞུང་གིས་སྔ་ས་ནས་སུམ་ཅུའི་དུས་དྲན་སླེབས་ལ་ཉེན་བར་བརྟེན་རྒྱ་ནག་གི་སྤྱི་བདེ་ཚན་པ་དང་། དམག་མི་ཇེ་མང་ལ་བཏང་ནས་བོད་ནང་ཁུལ་ལ་དམ་དྲག་ཇེ་ཆེར་བཏང་ཡོད་པ་ཉིན་ཤས་གོང་ནས་ཕྱི་ཕྱོགས་ཀྱི་གསར་ལམ་ཁག་ལ་གནས་ཚུལ་ཐོན་ཡོད་པ་རེད།

གསར་འགོད་པ་ཀླུ་འབུམ།