བཀའ་ཁྲི་ཟམ་གདོང་རིན་པོ་ཆེ་མཆོག་ཨ་རིར་འཚམས་གཟིགས།

• 
  2009-07-08

༄༅༎བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་དེ་རིང་དགྲོང་དྲོ་རྒྱ་གར་གྱི་རྒྱལ་ས་ལྡི་ལི་ནས་ཕེབས་ཐོན་གྱིས་ལོན་ཌོན་བརྒྱུད་གནམ་ཐོག་ནས་ཨ་རིའི་ནུབ་ཕྱོགས་གྲོང་ཁྱེར་ལོ་སེ་ཨེན་ཇེ་ལེསི་རུ་ཉིན་གཉིས་རིང་འཚམས་གཟིགས་གནང་བར་ཕེབས་ཀྱི་འདུག

བཙན་བྱོལ་བོད་གཞུང་གི་དྲ་རྒྱའི་ཐོག་གོང་ཞུས་གནས་ཚུལ་དེ་སྤེལ་གནང་ཡོད་པ་དང་བཀའ་བློན་ཁྲི་པ་མཆོག་གིས་གྲོང་ཁྱེར་ལོ་སེ་ཨེན་ཇེ་ལེ་སི་ནང་གི་ཉིན་གཉིས་ཀྱི་གཟིགས་སྐོར་དེ་ཟླ་བ་འདིའི་ཚེས་དགུ་ནས་དབུ་འཛུགས་གནང་རྒྱུ་ཡིན་པ་རེད།

ཨ་རིའི་ཕྱོགས་སུ་ཕེབས་ཐོན་མ་གནང་གོང་བཀའ་ཁྲི་ཟམ་གདོང་རིན་པོ་ཆེ་མཆོག་གིས་རྒྱལ་ས་ལྡི་ལི་གསར་པའི་ནང་བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་༧༤ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩིའི་མཛད་སྒོའི་ནང་ལྷན་ཞུགས་གནང་ཡོད་པ་དང་༸གོང་ས་མཆོག་གི་འཁྲུངས་སྐར་དུས་ཆེན་སྲུང་བརྩིའི་མཛད་སྒོ་དེ་ཟླ་བ་འདིའི་ཚེས་དྲུག་ཉིན་ལྡི་ལི་ནང་རྟེན་གཞི་གནང་བའི་ཧི་མ་ལ་ཡའི་ནང་པའི་རིག་གཞུང་མཐུན་ཚོགས་དང་ཧི་མ་ལ་ཡའི་མངའ་ཁུལ་སྤྱི་ཡོངས་ཀྱི་ནང་པའི་སྒྲིག་འཛུགས་གཉིས་ཟུང་འབྲེལ་ཐོག་ནས་གནང་བ་ཞིག་རེད་འདུག

བཀའ་བློན་ཁྲི་པ་མཆོག་གིས་ཨ་རིའི་ནང་གི་གཟིགས་སྐོར་གྲུབ་རྗེས་བཞུགས་སྒར་དུ་འདི་ཟླའི་ཚེས་བཅོ་ལྔ་ཉིན་ཕྱིར་ཕེབས་གནང་རྒྱུ་ཡིན་པའི་གནས་ཚུལ་ཐོན་འདུག།