རྒྱ་གར་གཞུང་ཞབས་ནང་ལྐོག་ཟ་རུལ་སུངས་ཤུགས་ཆེ་ཡོད་ལུགས།

• 
  2009-08-26

༄༅༎རྒྱ་གར་གཞུང་ཞབས་ཁྲོད་ལྐོག་ཟ་རུལ་སུངས་ཀྱི་བྱ་སྤྱོད་སྤེལ་མཁན་ཤུགས་ཆེ་བའི་རྐྱེན་གྱིས་རྒྱ་གར་གྱི་སྤྱིའི་དཔལ་འབྱོར་འཕེལ་རྒྱས་གཏོང་རྒྱུའི་ཐད་གནོད་འཚེ་ཚབས་ཆེ་འགྲོ་བཞིན་ཡོད་ལུགས་རྒྱ་གར་གྱི་སྲིད་བློན་མཆོག་གིས་དེ་རིང་རེས་གཟའ་ལྷག་པའི་ཉིན་གསལ་སྟོན་གནང་འདུག

རྒྱ་གར་ནང་ལྐོག་ཟ་རུལ་སུངས་ཀྱི་བྱ་སྤྱོད་སྤེལ་མཁན་ཤུགས་ཆེ་ཡོད་པར་བརྟེན་ཕྱིའི་རྒྱལ་ཁབ་ཁག་ནས་རྒྱ་གར་ནང་མ་རྩ་འཛུགས་འཇོག་གནང་མཁན་ཚོས་འཇིགས་སྣང་ཚོར་བ་དང་དེ་བཞིན་རྒྱལ་སྤྱིའི་ཐོག་ནས་རྒྱ་གར་ནང་གི་ཆེ་ཐོངས་སོགས་ཀྱི་ཐད་གནོད་འཚེ་ཚབས་ཆེ་འགྲོ་བཞིན་ཡོད་པས་དེའི་ཐོག་རྒྱ་གར་གཞུང་ཕྱོགས་ནས་ཞིབ་འཇུག་གི་ལས་དོན་ཤུགས་ཆེ་སྤེལ་གནང་དགོས་ཀྱི་ཡོད་པ་རེད་ཅེས་རྒྱ་གར་གྱི་སྲིད་བློན་མཱན་མོ་ཧན་སིང་མཆོག་གིས་དེ་རིང་རྒྱ་གར་གྱི་རྒྱལ་ས་ལྡི་ལིའི་ནང་སྐོངས་འཚོགས་གནང་བའི་ས་གནས་གཞུང་འབྲེལ་ལས་དོན་མི་སྣ་ཁག་གི་ལྷན་ཚོགས་ཐོག་འབོད་སྐུལ་ནན་པོ་གནང་ཡོད་པ་རེད། སྲིད་བློན་མཆོག་གིས་མུ་མཐུད་གསུངས་ན་རྒྱ་གར་ནང་ལྐོག་ཟ་རུལ་སུངས་ཀྱི་བྱ་སྤྱོད་དེས་རྒྱ་གར་གྱི་དཔལ་འབྱོར་ཡར་རྒྱས་གཏོང་རྒྱུའི་ལས་དོན་མང་པོའི་ཐོག་གནོད་འཚེ་ཤུགས་ཆེ་ཐེབས་ཀྱི་ཡོད་པ་མ་ཟ་རྒྱ་གར་གཞུང་གིས་དྲང་བདེན་དང་སྤྱི་སྙོམས་ལྡན་པའི་སྤྱི་ཚོགས་ཤིག་གསར་སྐྲུན་བྱེད་རྒྱུའི་དགོངས་གཞིའི་ལས་དོན་ཐོག་གནོད་འཚེ་ཚབས་ཆེ་གཏོང་བཞིན་ཡོད་པ་རེད་ཅེས་གསལ་སྟོན་གནང་འདུག སྲིད་བློན་མཱན་མོ་ཧན་སིང་མཆོག་གིས་རྒྱ་གར་དེ་བཞིན་རྒྱལ་སྤྱིའི་ཐོག་ཆེ་ཐོངས་འཇོག་རྒྱུར་གནོད་འཚེ་མི་འགྲོ་བ་དང་ཕྱིའི་རྒྱལ་ཁབ་ཁག་སན་རྒྱ་གར་ནང་མ་རྩ་འཛུགས་འཇོག་བྱེད་རྒྱུའི་ལས་དོན་ཁག་གི་ཐོག་ཤུགས་སྣོན་རྒྱབ་རྒྱུའི་ཆེད་དུ་རྒྱ་གར་གཞུང་ནས་ཡུལ་གྲུའི་ནང་ལྐོག་ཟ་རུལ་སུངས་ཀྱི་བྱ་སྤྱོད་སྤེལ་མཁན་ཚོའི་ཐོག་ཞིབ་འཇུག་ནན་པོ་གནང་དགོས་པ་དང་དེའི་ཐོག་ཁྲིམས་ཐོག་ནས་ཀྱང་བྱ་སྤྱོད་ནན་པོ་སྤེལ་དགོས་ཀྱི་རེད་ཅེས་འབོད་སྐུལ་གནང་ཡོད་པ་རེད།