རྒྱ་གར་གྱི་སྲིད་བློན་འབར་མར་འཚམས་གཟིགས་སུ་ཕེབས་པ།

• 
  2012-05-27

༄༅༎རྒྱ་གར་གྱིས་ཨེ་ཤེ་ཡའི་ཁུལ་རྒྱ་ནག་གི་གནོན་ཤུགས་ལ་ཁ་གཏད་ཆེད་རང་འབྱུང་གཏེར་དངོས་ཀྱི་ཕྱུག་པའི་འབར་མ་དང་འབྲེལ་ལམ་བཟང་དུ་གཏོང་རྒྱུར་དམིགས་ནས་སྲིད་བློན་ མན་མོ་ཧན་སིངྷ་མཆོག་ཡུལ་དེར་འཚམས་འདྲིའི་གཟིགས་སྐོར་དུ་ཕེབས་ཡོད་འདུག

རེས་གཟའ་ཉི་མ་ནས་ཉིན་གསུམ་རིང་གི་ལོ་རྒྱུས་ཀྱི་རང་བཞིན་ལྡན་པའི་གཟིགས་སྐོར་རིང་ སྲིད་བློན་མན་མོ་ཧན་སིངྷ་མཆོག་གིས་འབརར་མའི་སྲིད་འཛིན་ཐའེན་སེའེན་དང་ཕྱོགས་འགལ་ཚོགས་པའི་དབུ་ཁྲིད་ཨང་སན་སུ་ཅི་རྣམ་གཉིས་མཇལ་འཕྲད་ཀྱིས་ཡུལ་གཉིས་དབར་ཚོང་འབྲེལ་དང་ས་མཚམས་ཀྱི་ས་ཁུལ་ཡར་རྒྱས་གཏོང་ཆེད་མ་རྩ་འཛུགས་ཕྱོགས་སོགས་ཀྱི་སྐོར་བཀའ་བསྡུར་གནང་རྒྱུ་ཡིན་འདུག  རེས་གཟའ་ཟླ་བའི་ཉིན་རྒྱལ་ས་ནེ་པི་དྷོ་Nayphidaw) ནང་རྒྱ་གར་གྱི་སྲིད་བློན་དང་འབར་མའི་སྲིད་འཛིན་རྣམ་གཉིས་མཇལ་འཕྲད་དང་རེས་གཟའ་མིག་དམར་ཉིན་གྲོང་ཁྱེར་གཏེ་བ་ཡག་གོན་(Yangdon)དུ་ཕེབས་ནས་ཕྱོགས་འགལ་ཚོགས་པའི་དབུ་ཁྲིད་ཨང་སན་སུ་ཅི་མཆོག་མཇལ་འཕྲད་ཀྱིས་དེ་སྔའི་འབྲེལ་ལམ་བསྐྱར་གསོ་གནང་རྒྱུ་ཡིན་འདུག། རྒྱ་གར་གྱིས་ཐོག་མར་ཨང་སན་སུ་ཅིར་རྒྱབ་བསྐྱོར་གནང་ཡོད་ཀྱང་ཕྱི་ལོ་༡༩༩༠འི་ནང་ དྲག་པོའི་གཞུང་དང་དགོས་དབང་གིས་འབྲེལ་ལམ་བཟང་དུ་བཏང་བ་དེར་རྒྱལ་སྤྱིའི་ཐོག་རྒྱ་གར་ལ་སྐྱོན་བརྗོད་བྱས་ཡོད་འདུག འོན་ཀྱང་ད་ཆ་རྒྱ་གར་གྱིས་འབར་མ་མང་གཙོའི་ཁ་ཕྱོགས་སུ་འགྲོ་བཞིན་པ་དང་འགྲིག་འཇགས་ཀྱི་ཡོར་ཡུག་སྐྲུན་བཞིན་པ་དེར་བསྔགས་བརྗོད་ཡོད་ལུགས་སྲིད་བློན་མན་མོ་ཧན་སིངྒ་མཆོག་གིས་གསུངས་གནང་འདུག།