༸གོང་ས་མཆོག་ནས་རྒྱ་གར་གཞུང་མང་ལ་བསྔགས་བརྗོད།

• 
  2009-12-18

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱིས་བོད་མི་ཚོར་རྒྱབ་སྐྱོར་ཧ་ཅང་རྒྱ་ཆེན་པོ་གནང་ཡོད་པའི་སྐོར་བཀའ་གནང་ཡོད་པ་རེད་

དེ་ཡང་ཕྱི་ཚེས་བཅོ་བརྒྱད་ཉིན་བཙན་བྱོལ་བོད་གཞུང་དྲ་རྒྱའི་ཐོག་གནས་ཚུལ་འཁོད་གསལ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གཞུང་ནས་བོད་མི་ཚོར་རྒྱབ་སྐྱོར་ཧ་ཅང་རྒྱ་ཆེན་པོ་གནང་ཡོད་པ་མ་ཟད་ལྷག་པར་དུ་དེང་དུས་ཤེས་ཡོན་སློབ་སྦྱོང་ཐད་རོགས་རམ་རྒྱབ་སྐྱོར་དེ་བས་རྒྱ་ཆེན་པོ་གནང་ཡོད་པར་བསྔགས་བརྗོད་ཞུས་གནང་ཡོད་པ་རེད་

༸གོང་ས་མཆོག་རྒྱ་གར་གྱི་གྲོང་ཁྱེར་ཧའེ་རྡ་ར་སྦརྡ་ནང་གསར་འགོད་པར་གོང་ཞུས་བཀའ་མོལ་དེ་གནང་ཡོད་པ་དང་༸གོང་ས་མཆོག་ནས་ རྒྱ་གར་གཞུང་གིས་འདས་པའི་ལོ་ངོ་ལྔ་བཅུའི་རིང་བཙན་བྱོལ་བོད་མི་ཚོར་རོགས་རམ་ཤུགས་ཆེ་གནང་ཡོད་པ་དང་ལྷག་པར་དུ་རྒྱ་གར་གྱིས་བོད་མི་ཚོར་དམིགས་བསལ་དེང་དུས་ཤེས་ཡོན་སློབ་གསོའི་ཐོག་རོགས་རམ་གནང་བའི་ཐོག་བསྔགས་བརྗོད་ཞུ་འོས་པ་ཞིག་ཡིན་པ་བཀའ་བསྩལ་ཡོད་འདུག ༸གོང་ས་མཆོག་ནས་དེང་སྐབས་རྒྱ་གར་མི་རིགས་དང་ལྷག་པར་དུ་ལ་དག་ནས་ཡིན་པའི་རྒྱ་གར་གྱི་མི་སེར་བོད་པའི་དགོན་སྡེ་ཁག་ནང་མཉམ་བཞུགས་ཀྱིས་ནང་ཆོས་ཤེས་ཡོན་སློབ་སྦྱོང་བྱེད་མཁན་ཇེ་མང་དུ་འགྲོ་བཞིན་པའི་སྐོར་བཀའ་བསྩལ་འདུག  ༸གོང་ས་༸སྐྱབས་མགོན་ཆེན་པོ་མཆོག་སང་ཉིན་ཀར་ན་ཊ་ཀ་མངའ་སྡེའི་གྲང་ཁྱེར་གུལ་སྦར་ག་དུ་ཆིབས་བསྒྱུར་གྱིས་ས་ཁུལ་དེའི་ནང་གི་ནང་པའི་དགོན་པ་ཞིག་ནང་ནང་ཆོས་དང་འབྲེལ་བའི་བཀའ་སློབ་གསུང་བཤད་བསྩལ་གནང་མཛད་རྒྱུ་ཡིན་པ་རེད་།