ངོས་ཀྱི་ལུས་ནི་རྒྱ་གར་ན་ཡོད་ཀྱང་སེམས་དེ་ཡང་ཡང་བོད་ནང་སྐྱོད་བསྡད་ཡོད། ༧གོང་ས་མཆོག་གིས།

• 
  2019-10-25

སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་མི་ས་ཡ་དྲུག་གིས་ང་ལ་ཡིད་ཆེས་བྱས་བསྡད་པ་ནམ་ཡང་སེམས་ནས་བརྗེད་ཀྱི་མེད་པར་དྲན་གྱི་ཡོད་ཅེས་རྒྱ་གར་མཐོ་སློབ་སློབ་ཕྲུག་ཚོར་བཀའ་གནང་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བཞུགས་སྒར་ཕོ་བྲང་མཇལ་འཕྲད་ཁང་དུ་འདི་ཚེས་༢༥་ཉིན་རྒྱ་གར་གྱི་མཐོ་སློབ་འདྲ་མིན་ནས་ཆེད་བཅར་ཞུས་པའི་སློབ་ཕྲུག་༢༠༠་ཙམ་ཞིག་ལ་མཇལ་ཁ་དང་བཀའ་སློབ་སྩལ་སྐབས། རྒྱ་གར་གྱི་སློབ་ཕྲུག་ཞིག་གིས། ༧གོང་ས་སྐྱབས་མགོན་ཆེན་པོ་མཆོག་རྒྱ་གར་དུ་ཕེབས་དགོས་བྱུང་བའི་ཐུགས་ཚོར་དང་འབྲེལ་བའི་སྐོར་བཀའ་འདྲི་ཞུས་བར། ༧གོང་ས་མཆོག་གིས། བོད་ནང་གི་བོད་མི་མང་པོ་ཞིག་གིས་ང་བོད་ལ་ལོག་རྒྱུའི་རེ་བ་ཆེན་པོ་བྱེད་བཞིན་ཡོད་པ་དང་། དེ་མཚུངས་རྒྱལ་བ་རིན་པོ་ཆེ་རང་དབང་ལུང་པའི་ནང་བཞུགས་ཏེ་རང་དབང་གི་ཐོག་ནས་ཕྱག་ལས་གནང་ཐུབ་པར་བསྔགས་བརྗོད་བྱེད་བཞིན་ཡོད། དེ་ནི་རྒྱུ་མཚན་ལྡན་པ་ཞིག་རེད། ངོས་ཀྱི་ལུས་ནི་རྒྱ་གར་ན་ཡོད་ཀྱང་སེམས་དེ་ཡང་ཡང་བོད་ནང་སྐྱོད་བསྡད་ཡོད། ངས་བོད་མི་ས་ཡ་དྲུག་གིས་ང་ལ་ཡིད་ཆེས་བྱས་བསྡད་པ་དེ་དྲན་གྱི་ཡོད་ལ་བོད་མི་ཚོས་ངའི་སྒང་ལ་རེ་བ་ཤུགས་ཆེན་པོ་རྒྱབ་བསྡད་ཡོད་སྟབས་ང་ལ་བཟང་སྤྱོད་གྱི་འགན་ཞིག་ཡོད་ཅེས་བཀའ་གནང་སོང་།
ད་དུང་༧གོང་ས་མཆོག་གིས། བོད་ནང་རྒྱ་ནག་གཞུང་གིས་བོད་ཀྱི་སྐད་ཡིག་ཐོག་དམ་དྲག་བྱེད་བཞིན་པའི་ཐད་ཐུགས་འཚབ་ཡོད་པ་དང་། བོད་ནང་སྔར་གྱི་ནང་ཆོས་སློབ་གཉེར་ཁང་ཆེ་ཁག་དེ་ཚོའི་ནང་ད་ཆ་དགེ་འདུན་པ་ཉུང་ཉུང་ཞིག་ལས་ལྷག་མེད་པ་དང་། དེ་ཚོའི་ནང་དུའང་རྒྱ་ནག་གཞུང་གིས་བོད་སྐད་ཐོག་དམ་དྲག་བྱས་ཏེ་ཆབ་སྲིད་སློབ་གསོ་རྒྱབ་ནས་དཀའ་ངལ་བཟོ་བཞིན་ཡོད། དེ་བས་ངོས་རང་བློ་འཚབ་ཆེན་པོ་ཡོད། བོད་ནང་སྐད་ཡིག་དང་ནང་ཆོས་སློབ་གཉེར་གྱི་རང་དབང་དགོས་པ་གལ་ཆེན་པོ་རེད་ཅེས་བཀའ་སྩལ་གནང་སོང་།
ཡང་༧གོང་ས་སྐྱབས་མགོན་ཆེན་པོ་མཆོག་གིས། རྒྱ་གར་གྱི་གནའ་རབས་ཤེས་ཡོན་དང་དེང་དུས་ཀྱི་ཤེས་ཡོན་ཟུང་དུ་འབྲེལ་བའི་ནུས་པ་དེ་རྒྱ་གར་ལ་ཡོད་པ་དང་། རྒྱ་གར་གྱི་གནའ་བོའི་རིག་གཞུང་ནང་འཚེ་མེད་ཞི་བ་དང་བྱམས་བརྩེའི་སྐོར་ཡོད་ཀྱང་དེ་དག་སླར་གསོ་བྱེད་རྒྱུ་དང་། དེ་ཡང་ཤེས་ཡོན་ཀྱི་ལམ་ནས་འཛམ་གླིང་ལ་སྟོན་ཐུབ་པ་ཞིག་དགོས། བར་ལམ་ཞིག་ནས་ཧི་མ་ཅལ་གཙུག་ལག་སློབ་ཆེན་ནས་རྒྱ་གར་གྱི་དཔལ་ནཱ་ལེན་དྲའི་གནའ་རབས་རིག་གཞུང་སླར་གསོའི་ལས་འཆར་ཞིག་དབུ་བཙུགས་གནང་བར་བསྔགས་བརྗོད་ཡོད་ཅེས་བཀའ་གནང་སོང་།
མཇལ་མོལ་རྗེས་ཧི་མ་ཅལ་གཙུག་ལག་སློབ་ཆེན་གྱི་སློབ་མ་ནི་ཤ་ལི་ཅོའོ་གྷི་རི་ལགས་ཀྱིས། ད་ཐེངས་ཏཱ་ལའི་བླ་མ་མཆོག་གི་གསུངས་ཐོས་ཐུབ་པར་དགའ་བོ་བྱུང་བ་དང་། གཞན་ཕན་དང་འགྲོ་བ་མི་གཅིག་གྱུར་སོགས་ཀྱི་སྐོར་ལ་བློ་བསྐྱེད་ཆེན་པོ་བྱུང་ཞེས་བརྗོད་ཀྱི་འདུག
གཞན་རྒྱ་གར་པན་ཇབ་མངའ་སྡེའི་ནང་འབྲུག་པའི་སློབ་མ་ཀུན་བཟང་འཕྲིན་ལས་ལགས་ཀྱིས། ང་ཚོས་རྒྱུན་རིང་ནས་༧གོང་ས་ཏཱ་ལའི་བླ་མ་མཆོག་སྙིང་རྗེའི་སྐྱབས་མགོན་ཞིག་ལ་ངོས་འཛིན་ཞུ་བཞིན་ཡོད་པ་རེད་ཟེར།