ཨ་རི་དང་ཡོ་རོབ་སོགས་ས་ཁུལ་མང་པོར་༧གོང་ས་མཆོག་གི་འཁྲུངས་སྐར་སྲུང་བརྩི་གནང་འདུག
བྱང་ཨ་རིའི་སྐུ་ཚབ་དོན་གཅོད་ཁང་གིས་གོ་སྒྲིག་གནང་བའི་༧གོང་ས་མཆོག་གི་འཁྲུངས་སྐར་མཛད་སྒོར་ཨ་མི་རི་ཀའི་བོད་དོན་དམིགས་བསལ་འབྲེལ་མཐུད་པ་ཕེབས་ནས་བོད་དོན་རྒྱབ་སྐྱོར་ལ་འགྱུར་བ་མེད་པའི་གཏམ་བཤད་གནང་འདུག
- 2023-07-07
-
-
-
Your browser doesn’t support HTML5 audio
འདི་ཚེས་༦ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་༨༨ལ་ཕེབས་པའི་འཁྲུངས་སྐར་ཉིན། བོད་མི་གནས་སྡོད་ས་གནས་ཁག་གཙོས་འཛམ་གླིང་གི་ས་ཕྱོགས་གང་སར་དད་ལྡན་པ་དང་༧གོང་ས་མཆོག་ལ་དགའ་མོས་བྱེད་མཁན་ཚོས་རྣམ་པ་འདྲ་མིན་གྱི་ཐོག་ནས་འཁྲུངས་སྐར་སྲུང་བརྩི་གནང་དང་གནང་བཞིན་པ་ལྟར། ཚེས་༦ཉིན་གྱི་སྔ་དྲོ་ཨ་རིའི་རྒྱལ་སའི་མངའ་ཁུལ་གྱི་བོད་མི་ཚོས་རྭ་རྒྱ་ཆོས་ཚོགས་སུ་༧གོང་ས་མཆོག་གི་འཁྲུངས་སྐར་སྲུང་བརྩི་གནང་བ་དང་།
ཡོ་རོབ་ཀྱི་ཡུལ་གྲུ་ཧྥ་རན་སིའི་གྲོས་ཚོགས་ཀྱི་ཚོགས་ཁང་ནང་། ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་། ཧྥ་རན་སིའི་ནང་ཡོད་པའི་བོད་ཀྱི་སྐུ་ཚབ་དོན་གཅོད་ཡན་ལག་ལས་ཁུངས་གཉིས་ཀྱིས་འཁྲུངས་སྐར་སྲུང་བརྩི་ཞུས་སྐབས། མཛད་སྒོའི་ཐོག་ཕ་རན་སིའི་གྲོས་ཚོགས་འཐུས་མི་ཁག་ཅིག་དང་། གྲོང་ཁྱེར་སྤྱི་ཁྱབ། ཁུལ་དེར་ཡོད་པའི་ཐེ་ཝན་གཞུང་ཚབ་ཁང་གི་སྐུ་ཚབ་སོགས་གནད་ཡོད་མི་སྣ་མང་པོ་ཕེབས་ཡོད་པ་དང་། སྐུ་མགྲོན་གཙོ་བོ་ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་(Jacqueline Eustache-Brinio)་ལགས་ཀྱིས་བོད་དོན་བདེན་མཐའ་མ་སེལ་བར་དུ་མུ་མཐུད་ནས་བོད་དོན་རྒྱབ་སྐྱོར་གནང་གི་ཡིན་ཞེས་བོད་དོན་གཏམ་བཤད་གནང་ཡོད་འདུག
ཕྱོགས་མཚུངས་ཕྱི་ཟླ་བདུན་པའི་ཚེས་༥ཉིན་བྷ་ར་སིལ་སི་སྐུ་ཚབ་དོན་གཅོད་ཁང་གིས་སྐུའི་འཁྲུངས་སྐར་དུས་ཆེན་ཡོ་རོབ་སྤྱི་མཐུན་གྱི་མཛད་འཆར་དང་བསྟུན་ཏེ་མཛད་སྒོ་སྔ་སྣུར་གྱིས་སྲུང་བརྩི་ཞུས་གནང་སྐབས། ཡོ་རོབ་སྤྱི་མཐུན་གྱི་སྐུ་ཚབ་དང་། བྷེལ་ཇམ་གྲོས་ཚོགས་ཀྱི་འཐུས་མི། དེ་བཞིན་ཡོ་རོབ་སྤྱི་མཐུན་ནང་ཡོད་པའི་ཨ་མི་རི་ཀའི་སྐུ་ཚབ་སོགས་གནད་ཡོད་མི་སྣ་བརྒྱ་སྐོར་ཞིག་མཛད་སྒོའི་ཐོག་ཆེད་ཕེབས་གནང་ཡོད་འདུག
གསར་འགོད་པ། བསྟན་འཛིན་བདེ་སྐྱིད། ཀླུ་འབུམ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།