རྒྱ་གར་གྱི་བོད་དོན་རྒྱབ་སྐྱོར་བ་གལ་ཆེ་ཞིག་སྐུ་གཤེགས།

• 
  2012-04-25

༄༅༎སྤྱི་ཚོགས་རིང་ལུགས་པ་དང་གལ་ཆེའི་སྲིད་དོན་མི་སྣ་། དུས་རྟག་ཏུ་བོད་པར་རྒྱབ་སྐྱོར་གནང་མཁན་ རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་སྦི་རིཇ་བུ་ས་ཧན་ཊི་ལྦ་རི་ད་རང་སྔ་དྲོ་ལྡི་ལིའི་ནང་གི་སྦ་སྦུ་ཇག་ཇི་ལྦན་རམ་སྨན་ཁང་དུ་སྙིང་རྩ་འགག་པའི་བསྙུན་གཞི་ཕོག་ནས་སྐུ་ཚེའི་འཕེན་པ་རྫོགས་ཡོད་པར་བཙན་བྱོལ་བོད་མིའི་སྒྲིག་འཛུགས་ཀྱིས་མྱ་ངན་ཞུས་འདུག།
སྐུ་ཞབས་སྦི་རིཇ་བུ་ཤན་ཏི་ལྦ་རི་དགུང་ལོ་༧༢ལ་ཕེབས་ཡོད་པ་དང༌། ཁོང་མ་གཤེགས་ཉིན་གཅིག་གོང་རེས་གཟའ་མིག་དམར་ཉིན་ཁོང་གིས་གྲོས་ཚོགས་འཐུས་མི་དམ་བཅའ་བཞེས་གནང་འདུག། ཁོང་ས་མའཇ་ལྦ་རྡི་ཆབ་སྲིད་ཚོགས་པའི་འཐུས་མི་ཡིན་པ་དང༌།ད་བར་རྒྱ་གར་གྲོས་ཚོགས་ཀྱི་འཐུས་མིར་ཐེངས་ལྔ་འོས་འདེམས་བྱུང་ཡོད་ཅིང༌། ༡༩༧༧ལོར་ཁོང་ཐེངས་དང་པོ་རྒྱལ་ཡོངས་གྲོས་ཚོགས་འོག་མའི་འཐུས་མིར་འོས་འདེམས་བྱུང་རྗེས། ༢༠༠༦ནས་བཟུང་གྲོས་ཚོགས་གོང་མའི་འཐུས་མིར་ཐེངས་གཉིས་འདེམས་ཐོན་བྱུང་ཡོད་པ་རེད།
སྦི་རིཇ་བུ་ཤན་དམ་པ་དེ་ཉིད་རྒྱ་གར་གྱི་ཆབ་སྲིད་ཚོགས་པ་ཡོངས་ཀྱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཡིན་པ་མ་ཟད། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་མཐུན་ཚོགས་INPAT གི་ཚོགས་མི་ཡང་ཡིན་པ་རེད།  དེ་སྔོན་བོད་དོན་ཐོག་རྒྱལ་སྤྱིའི་གྲོས་ཚོགས་འཐུས་མིའི་ཚོགས་ཆེན་ཐེངས་༣དང་༥གཉིས་ཨ་རིའི་རྒྱལ་ས་ལྦ་ཤིང་ཀྲོན་དང་ རཱོམ་གཉིས་ནང་ཚུགས་པའི་སྐབས་ཁོང་མཉམ་ཞུགས་གནང་ཡོད་པ་དང༌། ད་རེས་ཁེ་ན་ཌའི་རྒྱལ་ས་ཨོ་ཀྲ་ལྦ་ནང་ཚུགས་གནང་རྒྱུའི་བོད་དོན་ཐོག་རྒྱལ་སྤྱིའི་གྲོས་ཚོགས་འཐུས་མིའི་ཚོགས་ཆེན་སར་ཕེབས་བཞུགས་གནང་རྒྱུའི་འཆར་གཞི་ཡོད་ནའང༌། ཁོང་གི་སྐུ་ཚེར་གློ་བུར་འགལ་རྐྱེན་བར་ཆད་བྱུང་བའི་ཡིད་སྐྱོའི་གནས་ཚུལ་དེ་བྱུང་འདུག།
བཙན་བྱོལ་བོད་མིའི་སྒྲིག་འཛུགས་ཀྱིས་ཡུན་རིང་བོད་པའི་གྲོགས་པོ་གལ་ཆེ་ཞིག་གི་སྐུ་ཚེ་མ་ཟིན་པ་དེར་མྱ་ངན་གནང་ཡོད་པ་དང༌། བོད་མི་མང་སྤྱི་འཐུས་ ཨ་ཅར་ཡ་ ཡེ་ཤེས་ཕུན་ཚོགས་ལགས་དང༌། རྒྱ་གར་བོད་ཀྱི་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་བསྟན་འཛིན་ནོར་བུ་ལགས་དང༌། ལྡི་ལིའི་བོད་མིའི་བསམ་ཡས་གླིང་གཞིས་སྒར་གྱི་སྐུ་ཚབ་ཚོས་སྦ་སྦུ་ཇག་ཇི་ལྦན་རཱམ་སྨན་ཁང་དང་། ས་མཇ་ལྦ་རྡི་ཚོགས་པའི་ལས་ཁུངས་ཨ་མ་བཅས་ལ་ངོ་བཅར་ཞུས་ནས་བོད་མི་མང་གི་ཚབ་ཞུས་ཏེ་དམ་པ་འདི་་ཉིད་ཀྱི་རྗེས་ཤུལ་ནང་མི་སྐུ་འཁོར་ཚོར་ཐུགས་གསོ་དང་དམ་པ་འདི་ཉིད་ལ་མྱ་ངན་གུས་བཏུད་ཞུས་གནང་འདུག།