༸གོང་ས་མཆོག་ལ་མཐོང་མཆན་མ་ཕུལ་བའི་རྒྱུ་མཚན་སྐོར།

• 
  2009-03-26

༄༅༎ལྷོ་ཨཕ་རི་ཀའི་གཞུང་གིས་རྒྱ་ནག་གཞུང་གི་ཆབ་སྲིད་དང་དཔལ་འབྱོར་གྱི་གནོན་ཤུགས་འོག་༸གོང་ས་མཆོག་ལ་ལྦི་ཛ་མཐོང་མཆན་ཕུལ་མེད་པའི་རྐྱེན་གྱིས་ལྷོ་ཨཕ་རི་ཀའི་གཞུང་གི་གནང་ཕྱོགས་ལ་རྒྱལ་ཁབ་ནང་ཁུལ་ནས་ཞི་བདེའི་བྱ་དགའ་བཞེས་མཁན་གྲས་ཡེ་ཤུའི་བླ་ཆེན་ཊུ་ཊུ་དང་སྲིད་འཛིན་ཟུར་པ་ཨེཕ་ཌབ་ལུ་ཌི་ཀ་ལརྑ་རྣམ་གཉིས་ནས་ལྷན་ཚོགས་ནང་མཉམ་ཞུགས་གནང་རྒྱུ་ཕྱིར་འཐེན་གནང་སྟེ་ཞི་བདེའི་ལྷན་ཚོགས་ཕྱིར་འགྱངས་བྱ་དགོས་བྱུང་པ་མ་ཟད་ཨཕ་རི་ཀའི་གསར་འགྱུར་བརྒྱུད་ལམ་ཁག་དང་གཞུང་དམངས་གཉིས་ཀའི་ཁྲོད་ནས་ལྷོ་ཨཕ་རི་ཀའི་གཞུང་ལ་ཁ་རྡུང་དང་སྐྱོན་བརྗོད་ཤུགས་ཆེ་བྱེད་བཞིན་ཡོད་པ་རེད། ལྷོ་ཨཕ་རི་ཀའི་གཞུང་གིས་ད་རེས་༸གོང་ས་མཆོག་ལ་ཐོང་མཆན་འབུལ་རྒྱུ་བཀག་འགོག་བྱས་པ་དེ་རྒྱལ་ཁབ་ཀྱི་ཁེ་ཕན་ཁོ་ནར་དམིགས་པའི་ཐག་གཅོད་ཡིན་པ་ལས་རྒྱ་ནག་གཞུང་གི་གནོན་ཤུགས་སྤྲད་མེད་ཚུལ་གཏམ་བཤད་སྤེལ་ཡོད་པ་རེད། ཡིན་ཡང་༸གོང་ས་མཆོག་ལ་མཐོང་མཆན་བཀག་འགོག་བྱས་པའི་གནས་ཚུལ་དེ་ད་ཆ་ལྷོ་ཨཕ་རི་ཀའི་ནང་བགྲོ་གླེང་དང་རྩོད་གླེང་གི་གནད་དོན་ཆེན་པོ་ཞིག་ཏུ་འགྱུར་བཞིན་ཡོད་སྟབས་ལྷོ་ཨཕ་རི་ཀས་རེས་གཟའ་ལྷག་པའི་ཉིན་གསར་འགོད་གསལ་བསྒྲགས་ཤིག་སྤེལ་བ་བརྒྱུད་༸གོང་ས་མཆོག་ལ་མཐོང་མཆན་བཀག་འགོག་བྱས་པ་དེ་ལྷོ་ཨཕ་རི་ཀ་དང་རྒྱ་ནག་གཉིས་ཀྱི་འབྲེལ་བའི་འཕེལ་རིམ་ལ་དོ་ཕོག་མི་ཡོང་བའི་ཆེད་ཐག་གཅོད་བྱས་པ་ཞིག་ཡིན་སྐོར་ངོས་ལེན་བྱས་ཡོད་པ་རེད༎