རང་ལུས་མེར་བསྲེག་གིས་ངོ་རྒོལ་བ་ཆོས་འཕེལ་འདས་གྲོངས།

༄༅༎ཕྱི་ལོ་ ༢༠༡༡ ཟླ་ ༡༠ ཚེས་ ༡༡ ཉིན་གྱི་བོད་ནང་གི་ཕྱི་དྲོའི་དུས་ཚོད་ ༢ ཙམ་ལ་ཕྱི་ཟླ་ ༡༠ ཚེས་ ༧ ཉིན་རང་ལུས་མེར་བསྲེག་བཏང་ནས་རྒྱ་གཞུང་ལ་ངོ་རྒོལ་གནང་མཁན་ཆོས་འཕེལ་ལགས་། རང་ལོ་ ༡༩ ཡིན་པ་ཁོང་འབར་ཁམས་སུ་ཡོད་པའི་རྔ་པ་ཁུལ་གྱི་སྨན་ཁང་ནང་འདས་གྲོངས་སུ་གྱུར་ཡོད་པ་ བཞུགས་སྒར་རྡ་རམ་ས་ལ་ནས་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་ཁང་ནས་གནས་ཚུལ་སྤེལ་འདུག།
སླར་ཡང་ཆོས་འཕེལ་ལགས་ཀྱི་ནང་མི་ཚོས་འབྲེལ་ཡོད་རྒྱ་མིའི་ལས་ཁུངས་ལ་ ཁོང་གི་སྐུ་ཕུང་ནང་མིར་སྤྲོད་དགོས་པའི་རེ་འདུན་བཏོན་འདུག་ཀྱང་ད་བར་སྤྲད་མེད་པ་དང་ ཆོས་འཕེལ་ལགས་དང་མཉམ་དུ་རང་ལུས་མེར་བསྲེགས་གཏོང་མཁན་འདས་གྲོངས་སུ་གྱུར་པ་མཁའ་དབྱིངས་ལགས་ཀྱི་ནང་མིར་བཤད་པ་ལྟར་དགེ་འདུན་པ་ལྔ་ལས་མང་བ་དུས་གཅིག་ལ་གདན་འདྲེན་ཞུ་མི་ཆོག་པ་དང༌། རྔ་པ་མི་མང་སེམས་གསོ་བྱེད་པར་གཏོང་གི་མེད་པ་སོགས་སྔར་ལས་ལྷག་པའི་དམ་བསྒྲཌ་ཆེན་པོ་བྱེད་མུས་ཡིན་འདུག
དེ་རིང་ཕྱི་ཚེས་ ༡༡ ཉིན་བོད་ཚེས་ ༡༥ འཁེལ་་སྟབས་རྔ་པ་སྟོད་སྨད་བར་གསུམ་གྱི་མི་མང་ཚོས་ལས་ཀ་ཡོངས་རྫོགས་མཚམས་འཇོག་བྱས་ཏེ་འདས་གྲོངས་སུ་གྱུར་པ་དང་དཀའ་སྡུག་མནར་གཅོད་འོག་ཡོད་པའི་མི་རྣམས་ཀྱི་ཆེད་དུ་ཀིརྟི་དགོན་པ་གཙོ་བོར་གྱུར་པའི་དགོན་པ་ཁག་ལ་བསྔོ་རྟེན་འཇོག་པ་དང༌། མཆོད་མེ་སྒྲོན་པ། ཕྱག་འཚལ་སྐོར་སྦྱོང་སོགས་བྱས་ཡོད་པ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་ཁང་ནས་གནས་ཚུལ་སྤེལ་འདུག།