བལ་ཡུལ་གཞུང་གིས་བོད་མིར་དམ་དྲག་བྱེད་རྒྱུ་རྒྱ་ནག་ལ་ཁས་ལེན།

• 
  2015-03-31

རྒྱ་ནག་གིས་བལ་ཡུལ་ལ་དཔལ་འབྱོར་གྱི་རོགས་རམ་བྱེད་རྒྱུའི་ཁས་ལེན་དང་བལ་ཡུལ་གྱིས་བོད་མིར་དམ་དྲག་བྱེད་རྒྱུའི་ཁས་ལེན་བྱས་འདུག
དེ་ཡང་རྒྱ་ནག་གཞུང་གིས་བལ་ཡུལ་ལ་རྨང་གཞིའི་འཛུགས་བསྐྲུན་དང་ཆུ་ཤུགས་གློག་འདོན་གྱི་ལས་འཆར་ཆེད་དཔལ་འབྱོར་གྱི་རོགས་རམ་ཆེན་པོ་བྱ་རྒྱུའི་ཁས་ལེན་བྱས་པ་དང་། བལ་ཡུལ་གཞུང་གིས་བལ་ཡུལ་ནང་བོད་དོན་ཆེད་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་མཁན་ཚོའི་ཐོག་མུ་མཐུད་དམ་བསྒྲགས་བྱ་རྒྱུའི་ཁས་ལེན་བྱས་ཡོད་པ་PTIརྒྱ་གར་དབུས་གསར་ལས་ཁང་གིས་གནས་ཚུལ་སྤེལ་འདུག དེ་ནི་རྒྱ་ནག་གི་སྲིད་འཛིན་ཞེ་ཅེན་ཕེན་དང་བལ་ཡུལ་གྱི་སྲིད་བློན་Ram Baran Yadavགཉིས་ཉེ་ཆར་རྒྱ་ནག་གི་ཧུའུ་ནན་ཞིང་ཆེན་གྱི་ནང་ཚུགས་པའི་ཨེ་ཤི་ཡའི་གནད་དོན་ཐད་ཀྱི་སྦའོ་གླེང་སྟེགས་ཞེས་པའི་ཚོགས་འདུའི་ཞོར་དུ་མཇལ་འཕྲད་གནང་བ་དང་། རྒྱ་ནག་གི་སྲིད་འཛིན་ཞེ་ཅེན་ཕེན་གྱིས་བལ་ཡུལ་ལ་རྒྱ་སྒོར་ས་ཡ་དགུ་བརྒྱ་ཐམ་པའི་རོགས་རམ་བྱ་རྒྱུའི་ཁས་ལེན་གནང་ཡོད་འདུག བལ་ཡུལ་ཕྱི་སྲིད་ལྷན་ཁང་གི་མི་སྣས་བརྗོད་དོན་ལྟར་ན། རོགས་དངུལ་དེ་དག་བལ་ཡུལ་དང་བོད་དབར་གྱི་རྒྱང་ཐག་སྤྱི་ལེ་༡༡༥ཙམ་ཡོད་པ་ཨ་ར་ནི་ཀོ་ཟེར་བའི་ལམ་ཆེན་ཉམས་གསོ་དང་། བལ་ཡུལ་ནང་གི་རྨང་གཞིའི་འཛུགས་བསྐྲུན་གྱི་ལས་གཞི། གཞན་ཡང་ཆུ་ཤུགས་གློག་འདོན་ལས་འཆར་སོགས་ཀྱི་ཐོག་གཏོང་རྒྱུ་ཡིན་པ་བརྗོད་འདུག
ལས་འཆར་རོགས་རམ་གྱི་དངུལ་འབོར་འདི་ནི་རྒྱ་ནག་གིས་བལ་ཡུལ་ལ་ལོ་ལྟར་ཨ་སྒོར་ས་ཡ་ཉི་ཤུ་རྩ་བཞི་སྤྲོད་བཞིན་པ་དེ་ཚུད་ཀྱི་མེད་པ་རེད།
རྒྱ་ནག་གི་སྲིད་འཛིན་དང་བལ་ཡུལ་གྱི་སྲིད་བློན་མཇལ་འཕྲད་སྐབས་རྒྱ་ནག་གི་སྲིད་འཛིན་གྱིས་བལ་ཡུལ་གྱི་ངོས་ནས་བོད་དང་ཐེ་ཝན་ལ་སོགས་པའི་དགག་རྩའི་རང་བཞིན་ཅན་གྱི་རྒྱ་ནག་གི་སྲིད་ཇུས་ཁག་ལ་རྒྱབ་སྐྱོར་བརྟན་པོ་གནང་པར་དགའ་བསུ་ཡོད་ཅེས་བརྗོད་འདུག་ལ།  ལྷག་པར་དུ་ཞེ་ཅིན་ཕེན་གྱིས་བལ་ཡུལ་གྱི་ངོས་ནས་བལ་ཡུལ་གྱི་ས་ཐོག་ནས་རྒྱ་ནག་ཁ་བྲལ་གྱི་ལས་དོན་རིགས་སྤེལ་མ་འཇུག་པར་ཐུགས་རྗེ་ཆེ་ཞུས་འདུག འདི་ནི་བལ་ཡུལ་གཞུང་གིས་བལ་ཡུལ་ནང་གནས་སྡོད་བོད་མི་ཚོར་བལ་ཡུལ་གྱི་ས་ཐོག་ནས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་བར་དམ་བསྒྲགས་ཤུགས་ཆེ་བྱེད་བཞིན་པར་རྒྱ་ནག་གི་སྲིད་འཛིན་གྱིས་དགའ་བསུ་ཞུ་དོན་མཚོན་པ་ཞིག་ཏུ་གནད་དོན་དབྱེ་ཞིབ་པ་ཚོས་ངོས་འཛིན་བྱེད་བཞིན་ཡོད་པ་རེད། བལ་ཡུལ་གྱི་སྲིད་བློན་གྱི་ངོས་ནས་ཀྱང་བལ་ཡུལ་གཞུང་གིས་མུ་མཐུད་ལས་དོན་དེ་རིགས་སྤེལ་མི་འཇུག་རྒྱུའི་ཁས་ལེན་ཡང་བྱས་ཡོད་འདུག

གསར་འགོད་པ་སྤྱི་ཁྱབ་རྩོམ་སྒྲིག་པ་སྐལ་ལྡན་བློ་གྲོས།