རྒྱ་ནག་གིས་ཨ་རི་ལ་ཡིད་གཟབ་བྱེད་དགོས་ལུགས་བརྗོད་པ།

• 
  2010-10-30

༄༅༎རེས་གཟའ་སྤེན་པའི་ཉིན་རྒྱ་ནག་གི་ཕྱི་སྲིད་བློན་ཆེན་ཡང་ཇིཡེ་ཆིས་ཨ་མི་རི་ཀའི་ངོས་ནས་རྩོད་གཞི་ཅན་གྱི་ཤར་རྒྱ་ནག་རྒྱ་མཚོའི་ནང་གི་མཚོ་གླིང་སྐོར་བགྲོ་གླེང་བྱེད་སྐབས་ཡིད་གཟབ་བྱེད་དགོས་ལུགས་བརྗོད་ཡོད་པ་རེད།

རྒྱ་ནག་གི་ཕྱི་སྲིད་བློན་ཆེན་གྱི་རེ་འདུན་དེ་ཨ་མི་རི་ཀའི་ཕྱི་སྲིད་བློན་ཆེན་ཧི་ལ་རི་ཀིལན་ཀྲན་ལ་དངོས་སུ་སྟོན་ཡོད་པ་དང་ དེ་ཡང་ལྕམ་ཧི་ལ་རི་ཀིལན་ཀྲན་གྱིས་ཨེ་ཤི་ཡའི་ཡུལ་གྲུ་ཁག་གི་ཆེས་མཐོའི་ལྷན་ཚོགས་ཤིག་གི་སྐབས་མཚོ་གླིང་གི་དཀའ་རྙོག་དེ་དག་རྒྱལ་སྤྱིའི་ཁྲིམས་ལུགས་ཀྱི་ཐོག་ནས་སེལ་ཐབས་དགོས་ལུགས་གསུངས་པའི་རྗེས་སུ་བྱུང་བ་ཞིག་ཡིན་ཞིང་ རྒྱ་ནག་གི་ངོས་ནས་རྙོག་ཁྲ་དེ་དག་རྩོད་རྙོག་ཡོད་པའི་འབྲེལ་ཡོད་ཡུལ་གྲུ་ཁག་དང་ཐད་ཀར་འབྲེལ་བ་བྱེད་དེ་སེལ་རྒྱུ་ཡིན་ལུགས་བརྗོད་བཞིན་ཡོད་ལ་བྱ་སྟངས་དེའི་ཐོག་ནས་རྒྱ་ནག་རང་ཉིད་ཀྱི་་སྟོབས་ཤུགས་ལོངས་སུ་སྤྱོད་རྒྱུའི་གོ་སྐབས་ཆེ་བ་ཡོང་རྒྱུ་ཡིན་པ་རེད།

རྒྱ་ནག་ཕྱི་སྲིད་ལས་ཁུངས་ཀྱི་དྲ་རྒྱའི་ཐོག་ཕྱི་སྲིད་བློན་ཆེན་ཡང་གིས་ཏའོ་ཡུའུ་མཚོ་གླིང་ཐོག་གི་རྒྱ་ནག་གི་ལངས་ཕྱོགས་གསལ་སྟོན་གནང་སྟེ་ཨ་མི་རི་ཀའི་ངོས་ནས་ཧ་ཅང་རྣོ་ངར་ཆེ་བའི་གནད་དོན་འདིའི་ཐད་ཡིད་གཟབ་ཡོང་བའི་འབོད་བསྐུལ་གནང་ཡོད་པ་རེད་ཅེས་བཀོད་འདུག་ལ་ དེ་བཞིན་རྒྱ་ནག་གི་ཕྱི་སྲིད་བློན་ཆེན་གྱིས་ཨ་མི་རི་ཀའི་ངོས་ནས་རྒྱ་ནག་གི་མངའ་དབང་དང་ཡུལ་བབས་གཅིག་བསྒྲིལ་གྱི་གནས་སྟངས་ལ་གུས་བརྩི་དགོས་ལུགས་ཀྱང་བརྗོད་ཡོད་འདུག།