ཨ་རུ་ན་ཅལ་ནི་རྒྱ་གར་གྱི་ཁ་བྲལ་མི་རུང་བའི་ཁོངས་གཏོགས་ཡིན།

༄༅༎རྒྱ་གར་གྱི་གཞུང་འཛིན་ཀོང་རེ་སི་ཚོགས་པའི་སྤྱི་ཁྱབ་དྲུང་ཆེ་རཱ་ཧུལ་གྷན་རྡི་མཆོག་གིས་ཨ་རུ་ན་ཅལ་པཱར་རྡེཤ་ཞེས་མོན་རྟ་དབང་ཁུལ་གྱི་མངའ་སྡེ་དེ་ནི་རྒྱ་གར་གྱི་ཆ་ཤས་ཡིན་སྐོར་ཁ་ས་གསུངས་འདུག

རྒྱ་གར་གྱི་སྲིད་བློན་མཱན་མོ་ཧན་སིང་མཆོག་རྒྱ་གར་བྱང་ཤར་མངའ་སྡེ་ཨ་རུ་ན་ཅལ་མངའ་སྡེའི་ནང་ས་གནས་འོས་བསྡུ་བྱེད་འཆར་དང་བསྟུན་ནས་ཀོང་རེ་སི་སྲིད་དོན་ཚོགས་པའི་འོས་མིར་རྒྱབ་སྐྱོར་གནང་ཕྱིར་འདི་ཟླའི་ཚེས་གསུམ་ཉིན་ཕེབས་པར་རྒྱ་ནག་གཞུང་ངོས་ནས་ངོ་རྒོལ་སྐྱོན་བརྗོད་བྱེད་བཞིན་པའི་སྐབས་དེར་ཁ་ས་ཀོང་རེ་སི་སྲིད་དོན་ཚོགས་པའི་སྤྱི་ཁྱབ་དྲུང་ཆེ་རཱ་ཧུལ་གྷན་རྡི་མཆོག་གིས་གསུངས་དོན་ལ་ཨ་རུ་ན་ཅལ་མངའ་སྡེ་དེ་ནི་རྒྱ་གར་གྱི་མངའ་སྡེ་ཞིག་རེད། ཊ་མིལ་ན་དྲུ་ཡང་རྒྱ་གར་གྱི་མངའ་སྡེ་ཞིག་རེད། ཇའར་ཁན་ཡང་རྒྱ་གར་གྱི་མངའ་སྡེ་ཞིག་རེད། ངས་རྒྱ་གར་གྱི་མངའ་སྡེ་ཚང་མར་བལྟ་སྟངས་གཅིག་མཚུངས་འཛིན་གྱི་ཡོད། དེ་ལ་འགྱུར་བ་གང་ཡང་འགྲོ་གི་མ་རེད་ཅེས་ཇའར་ཁན་མངའ་སྡེའི་ནང་གཟིགས་སྐོར་ཕེབས་སྐབས་གསར་འགོད་པ་ཚོར་གསུངས་འདུག དེའི་གོང་ལ་རྒྱ་གར་གྱི་ཕྱི་སྲིད་བློན་ཆེན་ཨེསི་ཨེམ་ཀི་རིཤ་ན་མཆོག་གིས་ཀྱང་ཨ་རུ་ན་ཅལ་མངའ་སྡེ་དེ་ནི་རྒྱ་གར་གྱི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་དང་བོད་ཀྱི་དབུ་འཁྲིད་བླ་ན་མེད་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རུ་ན་ཅལ་མངའ་སྡེའི་མོན་རྟ་དབང་ཁུལ་གཙོས་པའི་རྒྱ་གར་གྱི་ས་གནས་གང་དུ་ཡང་ཆིབས་བསྒྱུར་བསྐྱངས་ཆོག་པའི་རང་དབང་ཡོད་ལུགས་ཀྱང་གསུངས་ཡོད་པ་རེད་ལ་ཡང་རྒྱ་གར་གྱི་ཕྱི་སྲིད་བློན་ཆེན་ཟུར་པ་དང་དེང་སྐབས་རྒྱ་གར་དབུས་གཞུང་གི་དཔལ་འབྱོར་བློན་ཆེན་པཱར་ནབ་མུ་ཁར་ཇི་མཆོག་གིས་ཀྱང་ཨ་རུ་ན་ཅལ་མངའ་སྡེ་དེ་བཞིན་རྒྱ་གར་གྱི་ཁ་བྲལ་ཐབས་མེད་པའི་ཆ་ཤས་ཤིག་ཡིན་སྟབས་རྒྱ་གར་གྱི་སྲིད་བློན་མཆོག་མངའ་སྡེ་དེའི་ནང་ཕེབས་ཆོག་པའི་རང་དབང་ཆ་ཚང་ཡོད་སྐོར་ཡང་གསུངས་ཡོད་པའི་གནས་ཚུལ་འདུག།