ຕ້ານການໃຊ້ ຄວາມຮຸນແຮງ ຕໍ່ແມ່ຍິງ
ສປປລາວ ສນັບສນູນ ໂຄງການ ຕ້ານການໃຊ້ ກຳລັງຮຸນແຮງ ຕໍ່ແມ່ຍິງ ແລະ ສົ່ງເສີມ ສິດທິແມ່ຍິງ.
-
ອາວະຣີ ຣາຍງານ
2008-11-03 -
-
-
Your browser doesn’t support HTML5 audio
ເມື່ອວັນທີ່ 31 ເດືອນຕຸລາ ທີ່ຫາກໍຜ່ານມາ ສະຫະພັນ ແມ່ຍິງ ວຽດນາມ ໄດ້ເລິ້ມ ການໂຄສະນາຫາ ສຽງສນັບສນູນ ໂຄງການ ຕ້ານການໃຊ້ກຳລັງ ຮຸນແຮງ ຕໍ່ແມ່ຍິງ ຊຶ່ງເປັນໂຄງການ ຂອງສະຫະປະຊາຊາດ ເພື່ອສົ່ງເສີມ ສິດທິ ຂອງແມ່ຍິງ ໃນທົ່ວໂລກ.
ໃນໂຄງການດັ່ງກ່າວ ອົງການ ສະຫະ ປະຊາຊາດ ໄດ້ເປີດ ແວບໄຊທ໌ ທາງອິນເຕີແນັດ ຮຽກຮ້ອງປະຊາຊົນ ໃນທຸກປະເທດ ເຊັນຊື່ ສນັບສນູນ ການໂຄສະນາ ຕ້ານການໃຊ້ ກຳລັງຮຸນແຮງ ຕໍ່ຜູ້ຍິງດັ່ງກ່າວ ແລະ ຖ້າມີຄົນ ເຊັນຊື່ ສນັບສນູນ ເຖິງນຶ່ງລ້ານຄົນ ທາງການສະປະຊາຊາດ ຈຶ່ງຈະຮ່າງ ຂໍ້ສເນີຂື້ນມາໄດ້ ເພື່ອກົດດັນ ໃຫ້ຣັຖບານ ຂອງທຸກປະເທດ ປະຕິບັດ ຕາມນະໂຍບາຍ ຕ້ານການໃຊ້ ກຳລັງຮຸນແຮງ ຕໍ່ແມ່ຍິງນັ້ນ.
ສະນັ້ນ ເມື່ອສັປດາ ທີ່ຜ່ານມາ ເອກອັກຄະຣາຊທູດ ສປປລາວ ປະຈຳ ວຽດນາມ ກໍໄດ້ເຊັນຊື່ ສນັບສນູນໂຄງການ ດັ່ງກ່າວ. ເອກອັກຄະຣາຊທູດ ປະເທດຟີລິບປິ່ນ ການາດາ ສະເປ່ນ ແລະ ໄອແລ່ນ ກໍເຊັ່ນສນັບສນຸນ ເຊັ່ນກັນ.
ລາວ ເປັນປະເທດນຶ່ງ ທີ່ມີການຂົ່ມເຫັງ ແລະ ໃຊ້ກຳລັງ ຮຸນແຮງ ຕໍ່ແມ່ຍິງ. ເມື່ອບໍ່ດົນຜ່ານມາ ສະພາແຫ່ງຊາດລາວ ກໍໄດ້ອອກກົດໝາຍ ປົກປ້ອງສິດທິ ຂອງແມ່ຍິງ ແລະ ເດັກນ້ອຍແລ້ວ; ແຕ່ບັນຫາ ມີຢູ່ວ່າ ໃນປະເທດລາວ ການປະຕິບັດ ຕາມກົດໝາຍ ຍັງບໍ່ມີ ປະສິດທິພາບເທື່ອ ໝາຍຄວາມວ່າ ສິດທິ ຂອງແມ່ຍິງ ຍັງຈະບໍ່ຖືກ ປົກປ້ອງດີ ເທົ່າທີ່ຄວນ ເຊັ່ນ ຖ້າຜູ້ເປັນຜົວ ຕີທຳຮ້າຍ ຮ່າງກາຍເມັຍ ເຈົ້າໜ້າທີ່ ກໍອາດຈະບໍ່ຈັບກຸມ ແລະ ລົງໂທດ ຢ່າງເຂັ້ມງວດເທື່ອ.
ອີງຕາມ ສະຖິຕິ ຂອງສະຫະປະຊາຊາດ ຜູ້ຍິງ ຢູ່ໃນທົ່ວໂລກ ເຖິງນຶ່ງສ່ວນສາມ ຕ້ອງຖືກທຳຮ້າຍ ຮ່າງກາຍ ຢ່າງນ້ອຍ ນຶ່ງເທື່ອ ໃນຊີວິດ; ຢູ່ວຽດນາມ ແມ່ຍິງເຖິງ 70 ສ່ວນຮ້ອຍ ຖືກທຳຮ້າຍ ທາງດ້ານຮ່າງກາຍ ຫລື ຈິດໃຈ. ສ່ວນຢູ່ລາວນັ້ນ ຍັງບໍ່ມີສະຖິຕິ ກ່ຽວກັບ ເຣື່ອງນີ້ ເປີດເຜີຍເທື່ອ.