8 ສະຕຣີ ໃຈກ້າ ກູ້ລະເບີດດ້ານ ຄ້າງສົງຄາມ
ເຖິງຈະຖືພາ ໃກ້ເດືອນຄອງ ກໍຕາມ, ນາງ ແພງ ສຸວັນທອງ ຍັງຕັດສີນໃຈ ສ່ຽງກັບອັນຕຣາຍ ເພື່ອສ້າງຄວາມປອດໄພ ໃຫ້ພີ່ນ້ອງຮ່ວມຊາດ.
-
ຊີດນີ ຣາຍງານ
2008-04-14 -
-
-
ທີມເກັບກູ້ລູກຣະເບີດ, ທີ່ບໍ່ທັນແຕກ ຫລື UXO, ຊຶ່ງເປັນຜູ້ຍີງລາວທັງຫມົດ 8 ຄົນ ໄດ້ທຳການເກັບກູ້ຣະເບີດ ຢ່າງມີປະສິດທິຜົລ ແລະ ເອົາຈິງເອົາຈັງ ໃນພາຣະກິດ ທີ່ມີຄວາມສ່ຽງ ແລະກັນດານ ແຕ່ລະວັນ. ແຂວງຊຽງຂວາງ ເປັນແຫລ່ງ ທີ່ມີການຖີ້ມຣະເບີດຫລາຍທີ່ສຸດແຫ່ງນື່ງໃນລາວ ປາງສົງຄາມ.
ນາງ ແພງ ສຸວັນທອງ, ອາຍຸ 25 ປີ ຜູ້ທີ່ເປັນຫວົຫນ້າທີມ, ຖືພາ 8 ເດືອນ, ໄດ້ຢືນ ທ້າມກາງແສງແດດ ແລະ ລົມແຮງ ຢ່າງຫ້ຽວຫານ ໃນການໃຫ້ຄຳແນະນຳ ເພື່ອນຮ່ວມງານ ທີ່ເປັນຜູ້ຍີງ ດ້ວຍກັນ ໃນການແກ້ະ ຫົວຣະເບີດ ອອກຈາກລູກຣະເບີດ ທີ່ໜ່ວຍງານ ຂອງ ນາງຄົ້ນພົບ. ຖ້າຜິດພາດ, ຫມົດທຸກຄົນໃນທີມ ກໍ່ອາດຈະເສັຽຊີວີດ. ນາງແພງ ເປັນຫົວໜ້າທີມ ແລະ ເປັນພນັກງານ ເກັບກູ້ຣະເບີດຈາກ ອົງການແນະນຳການເກັບກູ້ ຣະເບີດ ຫລື Mine Advisory group ຈາກ ປະເທດອັງກີດ ທີ່ມາທຳການ ເກັບກູ່ ຣະເບີດທີ່ບໍ່ທັນແຕກ ໃນລາວ, ໂດຍສເພາະ ຢູ່ແຂວງຊຽງຂວາງ.
ນາງ ແພງ ກ່າວຕໍ່ນັກຂ່າວ Reuters, ໃນເຂດເກັບກູ້ຣະເບີດ ເມືອງຫນອງແຮດ, ທາງພາກເຫນືອ ແຂວງຊຽງຂວາງ, ກ່ຽວກັບ ວຽກງານຂອງນາງວ່າ ນາງ ມີຫນ້າທີ່ປົກປ້ອງ ຊິວີດເພື່ອນຮ່ວມງານ ຂອງນາງ, ໃນເວລາດຽວກັນ ກໍ່ເປັນການຊ່ອຍຊາວກຳສິກອນ ແລະປະຊາຊົນແຂວງຊຽງຂວາງ ຈາກລູກຣະເບີດ ເລົ່ານີ້, ຊາວກະສີກອນ ກໍ່ຈະມີພື້ນທີ່ທຳມາຫາກີນ.
ໃນຂນະທີ່ນາງກ່າວ ຕໍ່ນັກຂ່າວຢູ່ນັ້ນ ເພື່ອນຮ່ວມງານຂອງນາງ ຊຶ່ງເປັນຜູ້ຍີງ ດ້ວຍກັນສອງຄົນ ທີ່ກຳລັງທຳງານເກັບກູ້ຢູ່ ກໍ່ເລີຍພົບລູກຣະເບີດອີກລູກນື່ງ ທີ່ຍັງບໍ່ທັນແຕກ ຈື່ງຮອ້ງມາ ຜ່ານ megaphone ວ່າ ໃຫ້ນາງອອກຈາກທີ່ນັ້ນ ແລະ ປະກາດໃຫ້ຊາວນາ ໃນເຂດນັ້ນ ອອກຈາກ ສຖານທີ່ທັນທີ. ນາງກ່າວວ່າ ສິ່ງເລົ່ານີ້ ເກີດຂື້ນຢູ່ຕຣອດ ໃນການປະຕິບັດ ຂອງທີມງານຂອງນາງ; ແຕ່ຕອ້ງມີການຕຽມຕົວ ຢູ່ທຸກຣະຍະ, ບໍ່ຮູ້ວ່າ ຈະມີຫຍັງເກີດຂື້ນມາອີກ, ເພາະລູກຣະເບີດ ທີ່ເອີ້ນກັນວ່າ ບອມບີ້ ນັ້ນ ໄດ້ກະຈ່າຍໄປທົ່ວ ແຂວງຊຽງຂວາງ ແລະ ພື້ນທີ່ 15 ໃນ ຈຳນວນ 18 ແຂວງຂອງລາວ ປົກຫຸ້ມໄປດ້ວຍ ລູກຣະເບີດ ທີ່ບໍ່ທັນແຕກ ຊຶ່ງແມ່ນ ສະຫະຣັຖ ໄດ້ຖີ້ມໃນ ປາງສົງຄາມ.