ປະຊາຊົນລາວ ໃຫ້ຄວາມສົນໃຈ ໃນການອ່ານຂໍ້ມູນ ຂ່າວສານຂ້ອນຂ້າງໜ້ອຍ ຊຶ່ງເປັນສາເຫດນຶ່ງ ທີ່ເຮັດໃຫ້ ພາດໂອກາດຮັບຮູ້ຂ່າວສານ ກ່ຽວກັບໄພ ການຕົກເປັນເຫຍື່ອ ການຄ້າມະນຸດ

ທ່ານ ກອນກົດ ແວນວັນຄໍາ ເຈົ້າໜ້າທີ່ ອົງການແຮງງານສາກົນ ຫລື ILO ປະຈໍາລາວ ເຜີຍວ່າ ການສໍາຣວດ ປະຊາຊົນລາວ ອາຍຸ ຣະຫວ່າງ 25 - 50 ປີ ໃນ 3 ແຂວງ ຂອງລາວ ຄື ຈໍາປາສັກ ໄຊຍະບູລີ ຄໍາມ່ວນ ຈໍານວນ 346 ຄົນ ພົບວ່າຊາວລາວ ມັກເບີ່ງໂທຣະທັດ ຫລາຍທີ່ສຸດ ໂດຍມີຮອດ 75 ເປີເຊັນ.

ຮອງລົງມາ ກໍຄືຟັງວິທະຍຸ 68 ເປີເຊັນ, ໜັງສືພິມ 34 ເປີເຊັນ ຊຶ່ງນັ້ນສະແດງວ່າ ປະຊາຊົນ ໃຫ້ຄວາມສົນໃຈ ໃນການອ່ານຂໍ້ມູນ-ຂ່າວສານ ຂ້ອນຂ້າງໜ້ອຍ ອັນເປັນສາເຫດນຶ່ງ ໃນການພາດໂອກາດ ຮັບຮູ້ຂໍ້ມູນ-ຂ່າວສານ ທີ່ເປັນປະໂຫຍດ ໂດຍສະເພາະ ກ່ຽວກັບເລື່ອງ ຄວາມຮຸ່ນແຮງ ໃນການຕົກເປັນເຫຍື່ອ ການຄ້າມະນຸດ.

ຂະນະດຽວກັນ ຍັງພົບວ່າ ປະຊາຊົນຜູ້ມັກເບີ່ງໂທຣະທັດນັ້ນ ສ່ວນໃຫຍ່ມັກເບີ່ງລະຄອນ ໂດຍສະເພາະ ລະຄອນໃທ ແລະຟັງເພງ ເພື່ອຄວາມບັນເທີງ. ດັ່ງນັ້ນຈຶ່ງຢາກໃຫ້ ລະຄອນໃທ ສະເນີກ່ຽວກັບໂທດໄພ ການຕົກເປັນເຫຍື່ອ ການຄ້າມະນຸດດ້ວຍ ເພື່ອເປັນການກະຕຸ້ນ ເຕືອນຊາວລາວ ທີ່ຢາກເຂົ້າໄປ ຊອກວຽກງານເຮັດ ຢູ່ປະເທດໃທ.

ທ່ານ ຈັກກຣິດ ຈັນແສງ ເຈົ້າໜ້າທີ່ ມູນນິທິສູນພັກ-ສິດ ທິເດັກ ກ່າວເພີ່ມເຕີມວ່າ ປັດຈຸບັນ ຕາມບໍຣິເວນ ຊາຍແດນລາວ-ໃທ ມີການອົບພະຍົບ ຍ້າຍຖີ່ນຖານ ຈໍານວນຫລວງຫລາຍ ຈົນກາຍເປັນ ເລື່ອງປົກກະຕິ. ຄົນລາວທີ່ຂ້າມໄປໃທ ສ່ວນໃຫຍ່ ມີຈຸດປະສົງ ໄປຫາງານທໍາເທົ່ານັ້ນ ແຕ່ບາງຄັ້ງ ໃນການເດີນທາງເຂົ້າໄປ ໂດຍມີຂໍ້ມູນ ບໍ່ພຽງພໍ ຫລືຮູ້ບໍ່ເທົ່າທັນ ອາດເຮັດໃຫ້ຕົກຢູ່ໃນສະພາບທີ່ ຄາດບໍ່ເຖີງ ກາຍເປັນເຫຍື່ອ ການຄ້າມະນຸດ ໃນທີ່ສຸດ ຊຶ່ງກ່ອນນັ້ນຜູ້ເສັຽຫາຍ ທີ່ຕົກເປັນເຫຍື່ອ ການຄ້າມະນຸດ ແມ່ນມາຈາກພະມ່າ ຫລາຍທີ່ສຸດ. ແຕ່ປັດຈຸບັນ ພົບວ່າ ຜູ້ເສັຽຫາຍຈາກປະເທດລາວ ມີຈໍານວນຫລາຍທີ່ສຸດ.

ສະຕຣີ ຜູ້ເສັຽຫາຍ ທີ່ເຂົ້າມາຮັບການຄຸ້ມຄອງ ຈາກໜ່ວຍງານ ກະຊວງການພັດທະນາສັງຄົມ ແລະຄວາມໝັ້ນຄົງ ຂອງມະນຸດ ຣະຫວ່າງ ປີ 2005 - 2007 ພົບວ່າ ຜູ້ເສັຽຫາຍຈາກພະມ່າ ມີ 874 ຄົນ ຂະນະທີ່ຈາກສປປລາວມີ 1072 ຄົນ.

ມະນີຈັນ ຣາຍງານ