ຈີນຈະຊ່ວຍລາວຕິດຕັ້ງ ສາຍສື່ສານ ຫລືໂທຣະຄົມມະນາຄົມ ເພື່ອເຮັດໃຫ້ລາວ ກາຍເປັນ ສູນກາງຕິດຕໍ່ ໃນເຂດ ອ່າງແມ່ນ້ຳຂອງ

ບໍຣິສັດໂທຣະຄົມມະນາຄົມ ຂອງຈີນ ຫລື China Telecom ຈະໃຫ້ການຊ່ວຍເຫຼືອ ທາງດ້ານວິຊາການ ແກ່ສປປລາວ ເພື່ອຕິດຕັ້ງ ສາຍໄຍແກ້ວ ຣະຫວ່າງລາວ ແລະປະເທດເພື່ອນບ້ານ.

ນັກວິຊາການຈີນ ຈະມາຊ່ວຍສຶກສາຄົ້ນຄວ້າ ຄວາມເປັນໄປໄດ້ ໃນການຕິດຕັ້ງ ໃນແຕ່ຣະຍະຣະຍະ ດັ່ງ ເຈົ້າໜ້າທີ່ ບໍຣິສັດໂທຣະຄົມລາວ ທ່ານນຶ່ງ ໄດ້ກ່າວວ່າ:

(ສຽງ) "ຝ່າຍສປຈີນ ເຂົາຈະໃຫ້ China Telecom ມາເປັນຕົວແທນ ຂອງຝ່າຍສປຈີນ ມາເປັນສະມາຊິກຂອງ GMS ນີ້ ສະຖາບັນຄົ້ນຄວ້າ ເຂົາຈະຊ່ວຍຄົ້ນຄວ້າ ຄວາມເປັນໄປໄດ້ ຂອງແຕ່ລະເຟສ."

ແຜນການຕິດຕັ້ງ ສາຍໂທຣະຄົມມະນາຄົມນີ້ ແບ່ງອອກເປັນສີ່ຣະຍະຫລື Phases ຣະຍະທຳອິດ ຈະແມ່ນການຕິດຕັ້ງ ສາຍຣະຫວ່າງ ລາວ ແລະໄທ ເພື່ອປັບປຸງສັນຍານ ການຕິດຕໍ່ທາງໂທຣະສັບ ໂທຣະທັດ ແລະອິນເຕີແນັດ ຣະຫວ່າງສອງປະເທດ ໃຫ້ດີຂື້ນ ແລະຄາດວ່າຈະໃຫ້ສຳເຣັດ ພາຍໃນປີ 2008 ນີ້.

ຣະຍະຫລື Phase ທີ່ສອງ ແມ່ນການຕິດຕັ້ງ ຣະຫວ່າງ ລາວ ແລະວຽດນາມ, Phase ທີ່ສາມ ຣະຫວ່າງ ລາວ ແລະ ກຳພູຊາ Phase ທີ່ສີ່ ຣະຫວ່າງລາວ ແລະພາກໃຕ້ຂອງຈີນ. ເຈົ້າໜ້າທີ່ໂທຣະຄົມລາວ ທ່ານດຽວກັນນັ້ນ ອະທິບາຍກ່ຽວກັບ ການດຳເນີນ ໃນແຕ່ລະຣະຍະຣະຍະຕື່ມວ່າ:

ສຽງ) "ເພາະວ່າ ຕາມໂຄງການ ຈະມີສີ່ເຟສ ເຟສວັນຈະໃຫ້ສຳເຣັດໃນປີນີ້ ແຕ່ມາເບິ່ງແລ້ວ ໂຄງການເຊື່ອມຕໍ່ ຣະວຫ່າງບາງຈຸດ ຍັງບໍ່ທັນສຳເຣັດ ທ້າຍປີ 2008 ຈະໃຫ້ສຳເຣັດເຟສວັນໝົດ."

ເນື່ອງຈາກລາວ ເປັນປະເທດ ຢູ່ຣະຫວ່າງກາງ ຂອງທຸກປະເທດ ໃນເຂດອ່າງແມ່ນ້ຳ ຂອງ; ສະນັ້ນຣັຖບານລາວ ແລະປະເທດໃກ້ຄຽງ ຈຶ່ງຢາກສ້າງໃຫ້ ລາວກາຍເປັນສູນ ກາງຕິດຕໍ່ ທາງໂທຣະຄົມມະນາຄົມ.

ອາວະຣີ ຣາຍງານ