ສານສູງ ມາເລ ຕັດສິນຈຳຄຸກ ອະດີດ ນາຍົກຣັຖມົນຕຣີ
ອະດີດ ນາຍົກຣັຖມົນຕຣີ ມາເລເຊັຽ ທ່ານ ນາຈິບ ຣາຊັກ ຖືກສານຕັດສິນ ໃຫ້ຕິດຄຸກ 12 ປີ ໃນຂໍ້ຫາສໍ້ຣາຊບັງຫຼວງ ຂະນະທີ່ ທ່ານ ນາຈິບ ອ້າງວ່າ ຕົນເອງ ບໍ່ໄດ້ຮັບຄວາມເປັນທັມ, ບໍ່ໄດ້ມີໂອກາດ ໃຫ້ການຊີ້ແຈງ ໃນສານ.
-
ອຸ່ນແກ້ວ
2022-08-27 -
-
-
Your browser doesn’t support HTML5 audio
ສຳນັກຂ່າວ Benar News ໄດ້ຣາຍງານວ່າ ສານສູງສຸດຂອງຣັຖບານກາງມາເຊັຽ ໄດ້ຕັດສິນຈຳຄຸກ ທ່ານ ນາຈິບ ຣາຊັກ ອະດີດ ນາຍົກຣັຖມົນຕຣີ ຂອງມາເລເຊັຽ ເປັນເວລາ 12 ປີ ໂດຍ ບໍ່ມີການຝາກໂທດ ໃນຂໍ້ຫາ ສໍ້ຣາສບັງຫຼວງ ເງິນກອງທຶນພັທນາມາເລເຊັຽ.
ໃນວັນທີ 23 ສິງຫາ ທີ່ຜ່ານມາ, ທ່ານ ນາຈິບ ຣາຊັກ ອາດີດນາຍົກຣັຖມົນ ຕຣີຂອງມາເລເຊັຽ ຖືກນຳໂຕໄປຂັງຄຸກ ຫຼັງຈາກສານສູງສຸດ ຂອງຣັຖບານກາງມາເລເຊັຽ ອ່ານຄຳຕັດສິນ ວ່າ ທ່ານ ນາຈີບ ມີຄວາມຜິດ ໃນຂໍ້ຫາສໍ້ຣາສບັງຫລວງເງິນກອງທຶນ ພັທນາມາເລເຊັຽ.
ການຕັດສິນຂອງສານ ເຮັດໃຫ້ນັກການເມືອງ ຂອງມາເລເຊັຽ ລົງຈາກອຳນາດ ໃນປວັດສາຕ ທາງການເມືອງຂອງມາເລເຊັຽ.
ກ່ອນໜ້ານີ້ ອະດີດ ນາຍົກຣັຖມົນຕຣີມາເລເຊັຽ ຖືກສານສູງກົວລາແລມເປີ ຕັດສິນຈຳຄຸກເປັນເວລາ 2 ປີ ໃນປີ 2020, ແຕ່ ທ່ານ ຕໍ່ສູ້ຊັ້ນສານອຸທອນ ແລະ ສຸດທ້າຍແມ່ນ ຕໍ່ສູ້ກັນຢູ່ຂັ້ນສານສູງສຸດ ຂອງຣັຖບານກາງ.
ຫົວໜ້າຜູ້ພິພາກສາສານ ທີ່ເປັນແມ່ຍິງຢູ່ໃນມາເລເຊັຽ ໄດ້ກ່າວວ່າ: “ນີ້ເປັນກໍຣະນີ ການສວຍໃຊ້ອຳນາດທີ່ຊັດເຈນ, ການທຳລາຍຄວາມໜ້າເຊື່ອຖື ແລະ ການຟອກເງິນ.”
ຍານາງ ກ່າວຕື່ມວ່າ: “ໃນຄຳຕັດສິນຂອງສານ, ບົດສລຸບການຕັດສິນ ຂອງສານກ່ຽວກັບຈຳເລີຍ ຖືກຕ້ອງແລ້ວ. ຈຳເລີຍ ບໍ່ສາມາດຕອບຂໍ້ສົງສັຍ ຢ່າງເປັນເຫດເປັນຜົນ ກ່ຽວກັບການຟ້ອງຮ້ອງ ຄະດີດັ່ງກ່າວ.”
ຈຳເລີຍຕອບຂໍ້ຊັກຖາມ ຕໍ່ຄະດີດັ່ງກ່າວ ບໍ່ມີຄວາມຕໍ່ເນື່ອງ ແລະ ບໍ່ມີຄວາມໜ້າເຊື່ອຖື ສະນັ້ນ ການຍື່ນຂໍອຸທອນ ຂອງຈຳເລີຍ ຢູ່ໃນສານອຸທອນ ຈຶ່ງຖືກຍົກເລີກໄປ ແລະ ສານສູງສຸດ ຂອງຣັຖບານກາງ ຍັງຄົງຕັດສິນໃຫ້ ທ່ານ ນາຈີບ ມີຄວາມຜິດ.
ຫຼັງຈາກສານຕັດສິນແລ້ວ, ທ່ານ ນາຈິບ ຍັງຢູ່ໃນສານ ເປັນເວລາປະມານ 1 ຊົ່ວໂມງ ເພື່ອພົບກັບຄອບຄົວ ແລະ ໝູ່ເພື່ອນ ກ່ອນທີ່ທ່ານ ຈະຖືກນຳໄປຂັງຄຸກ ຖ່າມກາງການຮັກສາຄວາມປອດພັຍ.
ຫຼາຍອາທິດ ກ່ອນທີ່ຈະມີການຕັດສິນ, ຫົວໜ້າຜູ້ພິພາກສາສານ ແລະ ຄະນະລູກຂຸນ ໄດ້ປະຕິເສດ ຄວາມພະຍາຍາມ ຂອງທະນາຍ ອະດີດນາຍົກຂອງ ທ່ານ ນາຈີບ ທີ່ພະຍາຍາມຊະລໍ ການດຳເນີນຄະດີດັ່ງກ່າວ ເພື່ອຫຼີກລ້ຽງການທີ່ຈະຖືກຈຳຄຸກ.
ເມື່ອບໍ່ດົນມານີ້, ທະນາຍຄວາມ ທ່ານ ນາຈີບ ໄດ້ພະຍາຍາມໃຫ້ຫົວໜ້າ ຜູ້ພິພາກສາຂອງສານ ຍົກເລີກກໍຣະນີດັ່ງກ່າວ ໂດຍໃຫ້ມີການກ່າວຫາວ່າ ເປັນການຟ້ອງຮ້ອງ ກໍຣະນີເຣື່ອງການມີຜົລປໂຍດ ທັບຊ້ອນ, ແຕ່ ວ່າ ຄະນະລູກຂຸນປະຕິເສດ ຄຳອຸທອນຂອງ ທ່ານ ນາຈີບ.
ໃນເດືອນກໍຣະກະດາ ປີ 2020, ສານສູງກົວລາລັມເປີຣ໌ ຂອງມາເລເຊັຽ ຕັດສິນ ທ່ານ ນາຈີບ ຣາຊັກ ໃນຂໍ້ຫາທີ 1 ຄື ການສວາຍໃຊ້ອຳນາດ, ອີກ 3 ຂໍ້ຫາ ຄື ການທຳຄວາມຊອບທ້ຳ, ແລະ ອີກ 3 ຂໍ້ຫາ ຄື ການຟອກເງິນ ໂດຍ ການຮັບເງິນ 42 ລ້ານໂດລາ ທີ່ບໍ່ຖືກຕ້ອງ ເຊິ່ງເງິນດັ່ງກ່າວເປັນສ່ວນນຶ່ງ ຂອງເງິນກອງທຶນພັທນາມາເລເຊັຽ.
ສານໄດ້ປັບໃໝ ທ່ານ ນາຈີບ ເປັນເງິນ 49 ລ້ານໂດລ້າຣ໌ ໃນເວລາສິ້ນສຸດຄະດີດັ່ງກ່າວ. ທ່ານ ນາຈີບ ກ່າວໃນຖແລງການ ຢູ່ໃນສານ ວ່າ ທ່ານເອງ ບໍ່ໄດ້ມີໂອກາດ ທີ່ຈະຊີ້ແຈງໃຫ້ກັບໂຕເອງ ແລະ ບໍ່ໄດ້ຕອບຂໍ້ຊັກຖາມ ເຖິງສະພາບທີ່ ເຮັດໃຫ້ ທ່ານມາຢູ່ທີ່ສານແຫ່ງນີ້.
ທ່ານ ນາຈີບ ອາະດີດນາຍົກຣັຖມົນຕຣີ ມາເລເຊັຽ ກ່າວວ່າ: “ຜູ້ຄົນເວົ້າວ່າ ຈຳເລີຍ ຄື ທ່ານ ນາຈີບ ເປັນບຸກຄົນທີ່ສຳຄັນ ຢູ່ໃນສານອາສຍາ. ອາຈເປັນທຳນອງທີ່ວ່າ ຂ້າພະເຈົ້າ ຮູ້ສຶກວ່າ ຖືກປະຕິບັດແບບທົ່ວໄປ ແລະ ຂ້າພະເຈົ້າຮູ້ສຶກວາ ບໍ່ໄດ້ຮັບຄວາມຍຸຕິທັມ ໃນຕອນທ້າຍຂອງການດຳເນີນຄະດີ ຂ້າພະເຈົ້າມີຄວາມຮູ້ສຶກບໍ່ດີທີ່ສຸດ ທີ່ຮູ້ວ່າ ກົນໄກທາງຕຸລາການ ກະທຳກັບຂ້າພະເຈົ້າ ໃນທາງທີ່ບໍ່ເປັນທັມ.”
ໃນຕອນເຊົ້າຂອງວັນທີ 23 ສິງຫາ, ຄອບຄົວຂອງ ທ່ານ ນາຈີບ ແລະ ພັນທະມິຕທາງການເມືອງ ຂອງທ່ານ ໄດ້ຕິດຕາມທ່ານ ມາສານ ໃນຂະນະທີ່ປະຊາຊົນ ຜູ້ສນັບສນູນຫຼາຍ 100 ຄົນ ພາກັນຊຸມນຸມ ຢູ່ນອກຕຶກອາຄານຂອງສານ ເຊິ່ງຜູ້ສນັບສນູນບາງຄົນ ກໍພາກັນຮ້ອງວິງວອນ ໃຫ້ພະເຈົ້າຄຸ້ມຄອງທ່ານນາຈີບ.
ຜູ້ສັງເກດການ ທາງການເມືອງ ແລະ ນັກການເມືອງຝ່າຍຄ້ານ ກໍພາກັນວິຈານວ່າ ການຕັດສິນຄັ້ງນີ້ ໄດ້ສະແດງໃຫ້ເຫັນເຖິງ ຄວາມເປັນອິສຣະ ຂອງອົງການຕຸລາການ ຫຼື ສານ.
ທ່ານ Tunku Mohar ອາຈານ ຈາກມະຫາວິທະຍາໄລ ແຫ່ງຊາຕ ອິສລາມ ມາເລເຊັຽ ໄດ້ກ່າວວ່າ: “ພວກເຮົາ ບໍ່ສາມາດທີ່ເວົ້າໄດ້ວ່າ ຈະມີການຂໍອະພັຍໂທດ ໃຫ້ແກ່ທ່ານ ນາຈິບ ໃນອະນາຄົຕອັນໃກ້ນີ້, ແຕ່ ຄອບຄົວຂອງທ່ານ ນາຈິບ ຢູ່ໃນສະຖານະ ທີ່ຈະຂໍອະພັຍໂທດ.”
ທ່ານ Tunku Mohar ຍັງກ່າວຕື່ມອີກວ່າ: “ມັນຖືກຕ້ອງ ແລະ ເປັນທັມ ທີ່ລະບຽບກົດໝາຍ ມີຄວາມສັກສິທ. ຄວາມເຊື່ອໝັ້ນ ຕໍ່ແກ່ຂບວນການສານ ຂອງມາເລເຊັຽ ຈະສູງຂຶ້ນ ແລະ ເສຖກິຈຂອງປະເທດກໍຈະມີການຂັບເຂື່ອນ.”
ທ່ານ ນາຈິບ ເປັນຫົວໜ້າພັກການເມືອງ ຂອງມາເລເຊັຽ ທີ່ມີຊື່ວ່າ UMNO ໄດ້ສ້າງຕັ້ງກອງທຶນພັທນາມາເລເຊັຽຂຶ້ນມາ ໃນປີ 2009 ໃນເວລາທີ່ ທ່ານດຳຣົງຕຳແໜ່ງ ເປັນນາຍົກຣັຖມົນຕຣີ ແລະ ເປັນຣັຖມົນຕຣີ ການເງິນຂອງມາເລເຊັຽ ໂດຍ ທ່ານ ອ້າງວ່າ ເງິນກອງທຶນດັ່ງກ່າວ ແມ່ນເພື່ອຜົລປໂຍດຂອງປະຊາຊົນມາເລເຊັຽ.
ໃນປີ 2018 ມີຣາຍງານຂ່າວອອກມາວ່າ ມີການໂອນເງິນປະມານ 500 ໂດລ້າຣ໌ ຈາກບັນຊີກອງທຶນພັທນາມາເລເຊັຽ ມາເຂົ້າບັນຊີຄົນໃຊ້ຊິດ ແລະ ກຸ່ມຄົນທີ່ເປັນເຄືອຂ່າຍຂອງ ທ່ານ ນາຈີບ.
ອັນນັ້ນ ຢູ່ປະເທດມາເລເຊັຽ ທີ່ສານມີອຳນາດ ໃນການຕັດສິນ ນັກການເມືອງ ທີ່ພົວພັນການສໍ້ຣາສບັງຫລວງ, ແຕ່ ຢູ່ປະເທດລາວ ຄົງຈະບໍ່ເຫັນກໍລະນີແບບນີ້.
ນັກທຸຣະກິຈ ທ່ານນຶ່ງ ໃຫ້ສັມພາດຕໍ່ວິທຍຸເອເຊັຽເສຣີ ວ່າ: “ເປັນຈັ່ງຊີ້..................”
ສ່ວນວ່າ ທ່ານ ນາຈີບ ອາດີດນາຍົກຣັຖມົນຕຣີ ຄົນທີ6 ຂອງມາເລເຊັຽ ເປັນລູກຊາຍ ຂອງອະດີດນາຍົກຣັຖມົນຕຣີຄົນທີ 2 ຂອງມາເລເຊັຽ ທີ່ຊື່ ອັບດູນ ຣາຊັກ. ທ່ານ ນາຈີບ ເລີ່ມລົງຫຼິ້ນການເມືອງ ມາແຕ່ປີ 1982 ໃນເວລທີ່ ທ່ານ ອາຍຸໄດ້ 29 ປີ. ທ່ານ ນາຈິບ ໄດ້ດຳລົງຕຳແໜ່ງ ເປັນນາຍົກຣັຖມົນຕຣີຂອງມາເລເຊັຽ ແຕ່ປີ 2009-2019.