ສະຫະຣັຖ ຣາຍງານບັນຫາ ສິດທິມະນຸດ ຢູ່ລາວ

ກະຊວງການຕ່າງປະເທດ ສະຫະຣັຖ ອະເມຣິກາ ໄດ້ອອກເຜີຍແຜ່ ບົດຣາຍງານໂດຍຫຍໍ້ ກ່ຽວກັບບັນຫາ ການປະຕິບັດ ສິດທິມະນຸດ ປະຈຳປີ 2018 ຢູ່ລາວ.

ຢູ່ໃນບົດຣາຍງານ ໄດ້ຣະບຸວ່າ ປະເທດລາວ ຍັງມີບັນຫາເລື້ອງການລະເມີດ ສິດທິມະນຸດຫຼາຍຢ່າງ ບໍ່ວ່າຈະເປັນບັນຫາເລື້ອງການບີບ ບັງຄັບບຸກຄົນໃຫ້ຫາຍສາບສູນ, ຄື ທ່ານ ສົມບັດ ສົມພອນ ນັກພັທນາອາວຸໂສ ດີເດັ່ນຂອງລາວ ທີ່ຖືກລັກພາຕົວ ແຕ່ປີ 2012 ແລະ ຍັງບໍ່ມີຄວາມຄືບໜ້າ ເລື້ອງການຊອກຫາຕົວ ຂອງທ່ານເລີຍ.

ບັນຫາສະພາບໃນຄຸກຄຸມຂັງ ແລະ ນັກໂທດ ຢູ່ໃນປະເທດລາວ ໂດຍສະເພາະ ເລື້ອງການຂາດແຄນອາຫານການກິນ, ຄຸກມີສະພາບ ແອອັດ, ມີນັກໂທດຈຳນວນຫລາຍ ແຕ່ຄຸກກັກຂັງນັກໂທດ ຄັບແຄບ, ທ່ານໝໍ ແລະ ພະຍາບານ ແລະ ອຸປະກອນ ການແພດຕ່າງໆ ເພື່ອປິ່ນປົວ ແລະ ດູແລນັກໂທດ ຍັງບໍ່ພຽງພໍ.

ຕາມກົດໝາຍແລ້ວ ໃນເວລາຈັບກຸມບຸກຄົນໃດນຶ່ງ ຈະຕ້ອງມີໝາຍສານ ແລະແຈ້ງຂໍ້ກ່າວຜູ້ທີ່ຖືກຈັບກຸມພາຍໃນ 24 ຊົ່ວໂມງ, ແຕ່ຕົວຈິງ ຢູ່ໃນປະເທດລາວ ບໍ່ມີການປະຕິບັດແນວນັ້ນ, ມີເຈົ້າໜ້າທີ່ຕຳຣວດ ແລະ ຜູ້ປະຕິບັດກົດໝາຍ ສາມາດຈັບໄດ້ ຕາມໃຈ.

ຢູ່ປະເທດລາວ ຍັງບໍ່ມີຈຳນວນນັກໂທດການເມືອງ ຢ່າງເປັນທາງການ ຈາກຣັຖບານລາວ, ແຕ່ວ່າຫລ້າສຸດ ອົງການຈັດຕັ້ງທາງສັງຄົມ ໄດ້ຣາຍງານວ່າ ມີນັກໂທດການເມືອງ 3 ຄົນ ຊື່ ທ. ສົມພອນ ພິມມະສອນ ທ. ສຸການ ໃຈທັດ, ແລະ ນາງ ຫລອດຄຳ ທຳມະວົງ ທີ່ຫາກໍ່ຖືກສານຕັດສິນ ຈຳຄຸກ 20 ປີ, 16 ປີ, ແລະ 12 ປີ ໃນປີ 2017 ໃນຂໍ້ຫາ ໂຄສະນາວິຈານ ພັກ-ຣັຖ ຜ່ານທາງສື່ສັງຄົມອອນລາຍ.

ມີການຈຳກັດ ການເຮັດວຽກຂອງອົງການຈັດຕັ້ງສາກົນ ແລະ ອົງການຈັດຕັ້ງທາງສັງຄົມ ທີ່ເຮັດວຽກຢູ່ປະເທດລາວ ແລະ ຮວມທັງ ການຈຳກັດສິດທິ ຂອງສື່ມວນຊົນລາວ.

ນອກຈາກນີ້ ບົດຣາຍງານ ຍັງໄດ້ເວົ້າເຖິງບັນຫາ ການຈຳກັດການໂຮມຊຸມນຸມ ແບບສັນຕິ ແລະ ການເຊື່ອຖືທາງດ້ານສາສນາ, ແລະ ບັນຫາການສໍ້ຣາດບັງຫລວງ ທີ່ມີຢ່າງແຜ່ຫລາຍໃນປັດຈຸບັນ.