ມາດາມ Jill Biden ຢ້ຽມຢາມລາວ

ການສຶກສາ ແລະ ບັນຫາ ຕ່າງໆ ຂອງ ແມ່ຍິງ ໃນໂລກ ເປັນ ນຶ່ງ ໃນ ວຽກງານ ຂອງ ມາດາມ Jill Biden, ພັລຍາ ຂອງ ຮອງ ປະທານາທິບໍດີ ສະຫະຣັດ ອະເມຣິກາ ທ່ານ Joe Biden Biden, ທີ່ ເດີນທາງ ໄປເຖິງ ນະຄອນ ຫຼວງວຽງຈັນ ໃນ ວັນ ອັງຄານ ນີ້, ແລະ ຢູ່ຢ້ຽມຢາມ ເປັນ ເວລາ 2 ວັນ ຊຶ່ງ ຖືເປັນ ການຢ້ຽມຢາມ ລາວ ຄັ້ງ ທໍາອິດ ຂອງ ຜູ້ຕາງໜ້າ ຈາກ ທໍານຽບ ຂາວ ຊຸດ ປັຈຈຸບັນ.

ຂ່າວ ຈາກ ນະຄອນ ຫຼວງວຽງຈັນ ໃນ ວັນທີ 21 ກໍຣະກະດາ ນີ້, ຣາຍງານ ວ່າ ຜົລ ຂອງ ໂຄງການ ອາຫານ ກາງເວັນ ສໍາລັບ ເດັກນ້ອຍ ນັກຮຽນ ມູນຄ່າ 27 ລ້ານ ໂດລາ ສະຫະຣັດ, ແລະ ໂຄງການ ສນັບສນູນ ການ ສຶກສາ ຕ່າງໆ ມີ ກໍານົດ ນໍາຂຶ້ນ ປຶກສາ ຫາຣື ກັນ ກັບ ຮອງ ນາຍົກ ຣັຖມົນຕຣີ ລາວ ພັນຄໍາ ວິພາວັນ ໃນ ວັນພຸດ ນີ້.

ມາດາມ Jill Biden ຢ້ຽມຢາມ ສໍານັກງານ ໃຫຽ່ ສູນ ພັທນາ ແມ່ຍິງ ລາວ ພິການ, ຊຶ່ງ ມີທູດ ພິເສດ ສະຫະຣັດ ດ້ານ ກິຈກັມ ແມ່ຍິງ ໂລກ Global Women ຮ່ວມ ເດີນທາງ ໄປນໍາ, ແລະ ໂດຍມອບ ເງິນ ຊ່ວຍເຫລືອ 230 ພັນ ໂດລາ ສະຫະຣັດ ສໍາລັບ ໃຊ້ເຂົ້າ ໃນການ ຂຍາຍ ໂອກາດ ການ ຈ້າງງານ, ເພື່ອ ຊ່ວຍ ແມ່ຍິງ ທີ່ ໄດ້ຮັບ ການຝຶກ ອົບຮົມ ທຸກຄົນ ໃຫ້ ກຸ້ມ ຕົນເອງ ຫລາຍຂຶ້ນ ທາງດ້ານ ເສຖກິດ.

ຄວາມພິການ ຍ້ອນ ຣະເບີດ ທີ່ ຕົກຄ້າງ ຈາກ ປາງ ສົງຄາມ ແຕກໃສ່ ຍັງເປັນ ບັນຫາ ຢູ່ເຂດ ຊົນນະບົດ ຂອງລາວ, ພ້ອມດຽວ ກັນ ມາດາມ Biden ຍັງມີ ກໍານົດ ຢ້ຽມຢາມ ໂຄງການ ການສຶກສາ ຂອງ ອົງການ World Vision ແລະ ວຽກງານ ປົກປັກ ຮັກສາ ວັທນະທັມ ທີ່ ເມືອງ ມໍຣະດົກ ໂລກ ຫຼວງພຣະບາງ ນໍາດ້ວຍ.