ສະຖານທູດສະຫະຣັຖຈະສອນ ພາສາອັງກລິສຟຣີ

ເພຶ່ອຕອບສນອງ ຕຣຽມພ້ອມ ໃນການທີ່ ສປປລາວ ຈະເຂົ້າຮ່ວມ ປະຊາຄົມ ເສຖກິດ ອາຊຽນ ໃນປີ 2015 ທາງການ ສະຫະຣັຖ ຖືວ່າ ພາສາອັງກລິສ ເປັນສີ່ງສຳຄັນ ໃນການ ພັທນາ ຊັພຍາກອນ ມະນຸດໃນລາວ. ດັ່ງນັ້ນທາງສະຖານທູດສະຫະຣັຖ ທີ່ນະຄອນຫຼວງ ວຽງຈັນ ຈຶ່ງຈັດໃຫ້ມີການສອນພາສາອັງກລິສໃຫ້ນັກຮຽນ ນັກສຶກສາ ຂ້າຣາຊການ ແລະ ປະຊາຊົນລາວ ທົ່ວໄປ ໂດຍບໍ່ມີຄ່າຈ້າງໃດໆ.

ລາຍການ ສອນພາສາ ອັງກລິສ ຂອງ ສະຖານທູດ ຈະມີຂື້ນ ທຸກ ອາທິດ ໃນມື້ ວັນອັງຄານ ວັນພະຫັດ ແລະວັນສຸກ ຄືດັ່ງນີ້: ໃນວັນ ອັງຄານ ທາງ ສະຖານທູດ ຈະເປີດສອນ ພາສາອັງກລິສ ຂັ້ນຕົ້ນ ເວລາ 10 ໂມງ ຫາ 11 ໂມງເຊົ້າ, ມື້ວັນພະຫັດ ພາສາອັງກລິສ ຂັ້ນຕົ້ນ ຈະສອນໃນເວລາ 9 ໂມງຫາ 10 ໂມງ ແລະ 10 ໂມງຫາ 11 ໂມງ ແມ່ນຂັ້ນກາງ ສຳລັບ ວັນສຸກນັ້ນ ຂັ້ນກາງ ຈະເປີດສອນ ໃນເວລາ 9ໂມງຫາ 10 ໂມງ ແລະ ຂັ້ນຕົ້ນ ຈະສອນ ໃນເວລາ 10 ໂມງ ຫາ 11 ໂມງ ກົງກັນຂ້າມ ກັບ ວັນພະຫັດ.

ສະຖານທີ່ສອນ ຈະຈັດຂຶ້ນທີ່ ສູນການຂ່າວ ຜແນກ ນະໂຍບາຍ ຊ່ອຍຊຸມຊົນ ທີ່ຕຶກ ສະຖານທູດ ສະຫະຣັຖ ຢູ່ ນະຄອນຫລວງ ວຽງຈັນ. ຜູ້ສົນໃຈ ໃຫ້ຕິດຕໍ່ ລົງທະບຽນ ກັບ ສະຖານທູດ. ໃນຣະຍະ ຫລັງໆມານີ້ ສະຖານທູດ ສະຫະຣັຖ ໄດ້ຈັດກິຈກັມ ຊ່ອຍປະຊາຊົນ ແລະ ນັກຮຽນ ນັກສຶກສາ ໃນລາວ ໃນຫລາຍໂຄງການ ເພື່ອທຳການ ຄຸ້ນເຄີຍ ແລະ ສ້າງຄວາມລື້ງແກ່ນ ກັບຄົນລາວ ແລະ ນັກສຶກສາ ປັນຍາຊົນ ລາວ ໃຫ້ຫລາຍຂື້ນ.