ສປປ ລາວ ຕຣຽມ ເປັນປະທານວຽນ ອາຊ້ຽນ ທ່າມກາງ ບັນຫາຫຼາຍດ້ານ
ປະເທດລາວ ຖືກສເນີ ໃຫ້ເປັນປະທານວຽນ ອາຊ້ຽນ ໃນປີ 2024 ແລະ ປັດຈຸບັນ ພາກສ່ວນກ່ຽວຂ້ອງກຳລັງຫາລືກັນ ເພື່ອຕຣຽມຄວາມພ້ອມຫຼາຍດ້ານ ໃນຂະນະທີ່ ບັນຫາຄ່າຊົດເຊີຍທີ່ດິນ, ສິ່ງແວດລ້ອມ ແລະ ສິທທິມະນຸສ ກໍຍັງບໍ່ທັນໄດ້ຮັບການແກ້ໄຂ.
-
ອຸ່ນແກ້ວ
2022-07-22 -
-
-
Your browser doesn’t support HTML5 audio
ປະເທດລາວ ຖືກສເນີ ເປັນປະທານ ວຽນອາຊ້ຽນ ໃນປີ 2024 ແລະ ປັດຈຸບັນ ພາກສ່ວນກ່ຽວຂ້ອງ ກຳລັງຫາລືກັນ ເພື່ອຕຣຽມຄວາມພ້ອມຫຼາຍດ້ານ. ໃນວັນທີ 15 ກໍຣະກະດາ ທີ່ຜ່ານມາ ທ່ານ ສະເຫລີມໄຊ ກົມມະສິດ ຣັຖມົນ ຕຣີກະຊວງ ການຕ່າງປະເທດ ໄດ້ເປັນປະທານ ກອງປະຊຸມປຶກສາຫາລື ເພື່ອຕຣຽມຄວາມພ້ອມ ແລະ ດຳເນີນການເປັນປະທານອາຊ້ຽນ ໃນປີ 2024 ໂດຍ ມີການມອບໝາຍໃຫ້ 13 ອະນຸກັມມະການ ລະດົມຄວາມຄິດ “ຄຳຂວັນ”, ກາໝາຍ ແລະ ບູລິມະສິທຂອງ ການເປັນປະທານອາຊ້ຽນ ແລະ ສະຖານທີ່ພັກສຳລັບຄະນະຜູ້ແທນ ທີ່ຈະມາພັກເຊົາໃນເວລາມາຮ່ວມກອງປະຊຸມ ແລະ ສະຖານທີ່ຈັດກອງປະຊຸມ.
ເຈົ້າໜ້າທີ່ ປະຈຳກົມອາຊ້ຽນ ກະຊວງການຕ່າງປະເທດ ຜູ້ທີ່ຂໍສງວນຊື່ ແລະ ສຽງ ໄດ້ກ່າວວ່າ:
“ປັດຈຸບັນ ທາງຄະນະເຈົ້າໜ້າທີ່ ຂອງກົມອາຊ້ຽນ ແລະ ພາກສ່ວນກ່ຽວຂ້ອງ ກຳລັງມີການກະຕຣຽມ ປຶກສາຫາລື ກັນຢູ່ ກ່ຽວກັບວຽກງານກະຕຣຽມ ໃນດ້ານຕ່າງໆ. ຄັນວ່າ ມີຄວາມພ້ອມແນວໃດ ກໍຈະມີການ ຖແລງຂ່າວ ໃຫ້ສື່ມວນຊົນ ຮັບຊາຍອີກເທື່ອນຶ່ງ ແລະ ຍັງບໍ່ສາມາດໃຫ້ຣາຍລະອຽດ ຫຼາຍໄປກວ່ານີ້ໄດ້.”
ຫຼັງຈາກທີ່ຊາວລາວຮູ້ວ່າ ປະເທດລາວ ຈະເປັນປະທານວຽນອາຊ້ຽນ ໃນປີ 2024, ບາງກຄົນກໍຢາກໃຫ້ແກ້ໄຂບັນຫາຕ່າງໆ ໃຫ້ຄົນລາວກ່ອນ. ຊາວບ້ານ ນາງ ນຶ່ງ ໄດ້ກ່າວຕໍ່ວິທຍຸເອເຊັຽເສຣີ ໃນວັນທີ 22 ກໍຣະກະດາ ວ່າ:
“ກະຢາກໃຫ້ໃຫ້ສິດຜົລປໂຍດ ຄົນລາວຫຼາຍກວ່າຄົນຕ່າງປະເທດເນາະ ກະອຳນວຍຄວາມສະດວກໃຫ້ເທົ່າທີ່ວ່າຈຳເປັນ ວ່າຊັ້ນສາ ຫຼັກໆກະຄື ຢາກໃຫ້ເຫັນປະຊາຊົນເປັນອັບ 1 ກ່ອນ. ມື້ນີ້ ປະເທດຊາດລາວ ແຕ່ວ່າຄົນລາວ ໜ້ອຍກວ່າປະເທດອື່ນ.”
ໃນຂະນະທີ່ຊາວບ້ານ ທີ່ໄດ້ຮັບຜົລກະທົບ ຈາກໂຄງການຕ່າງໆ ກໍຍັງບບໍ່ໄດ້ຮັບຄ່າຊົດເຊີຍ ແລະ ຊາວບ້ານກໍຢາກໃຫ້ ທາງການລາວ ເລັ່ງແກ້ໄຂບັນຫາທີ່ຄ້າງຄາ ແລະ ຊຸກຢູ່ໃຫ້ມີການຊົດເຊີຍແກ່ຊາວບ້ານ ໃຫສຳເຣັດຮຽບຮ້ອຍ ກ່ອນທີ່ລາວຈະເປັນປະທານວຽນອາຊ້ຽນ ໃນປີ 2024 ເພື່ອຄວາມເໝາະສົມໃນຖານະ ປະທານອາຊ້ຽນ.
ຊາວບ້ານ ນາງນຶ່ງ ທີ່ໄດ້ຮັບຜົລກະທົບ ຈາກໂຄງການທາງຣົຖໄຟ ລາວ-ຈີນ ແລະ ເຂດໂລຈິສຕິກ ພາກ ໄດ້ກ່າວວ່າ:
“ກະຢາກໃຫ້ເພິ່ນແກ້ໄຂບັນຫານີ້ແຫຼະ ຄວາມທຸກຍາກຂອງປະຊາຊົນ ທີ່ໄດ້ຖືກຜົລກະທົບທີ່ເສັຽດິນ-ເສັຽດອນໄປນີ້ແຫຼະ. ແກ້ໄຂບັນຫາໃຫ້ມັນແລ້ວ ມັນທົ່ວ ກະຊິບໍ່ເໝາະສົມຫັ້ນແຫຼະ ເພາະວ່າ ແກ້ໄຂບັນຫາໃຫ້ປະຊາຊົນອັນນີ້ ກະຍັງບໍ່ໄດ້ເນາະ. ໄປມາໝົດທຸກຢ່າງແລ້ວ ເພິນກະຍັງບໍ່ໃຫ້ຄຳຕອບ.”
ນັກສິທທິມະນຸສ ກໍຍັງສະແດງຄວາມກັງວົນ ກັບເຣື່ອງບັນຫາ ສິທທິມະນຸສ ທີ່ເກີດຂຶ້ນໃນລາວ ແລະ ບໍ່ສາມາດແກ້ໄຂໄດ້ ໃນຂະນະທີ່ ລາວຈະເປັນປະທານວຽນອາຊ້ຽນ. ທ່ານ Phil Robertson ຮອງຜູ້ອຳນວຍການ ອົງການສິ້ງຊອມດ້ານສິທທິມະນຸສ ຫຼື Human Rights Watch ປະຈຳເຂດເອເຊັຽ ໄດ້ກ່າວວ່າ:
“ເປັນບັນຫາຂອງລາວຢູ່ຕລອດ ກ່ຽວກັບເຣື່ອງການລະເມີດສິທທິມະນຸສ ເປັນຕົ້ນບັນຫາເຣື່ອງທີ່ດິນ ເຊິ່ງນາຍທຶນມັກຈະຮ້ອງຂໍ ໃຫ້ເຈົ້າໜ້າທີ່ໄປຍຶດເອົາທີ່ດິນ ຂອງຊາວບ້ານ. ຫຼື ແມ່ນວ່າ ຈະເປັນການຈຳກັດບໍ່ໃຫ້ປະຊາຊົນ ມີການປາກເວົ້າ ໃນການສະແດງຄວາມຄິດເຫັນ ຕໍ່ພັກ-ຣັຖ ແລະ ກໍມີການຫາຍສາບສູນຫຼາຍກໍລະນີ ໃນລາວ ທີ່ຍັງບໍ່ທັນແກ້ໄຂ ເປັນຕົ້ນ ກໍລະນີ ທ່ານ ສົມບັດ ສົມພອນ ເຊິ່ງຍັງບໍ່ທັນມີຄຳຕອບເທື່ອວ່າ ທ່ານ ໄດ້ຫາຍໄປໃສ.”
ນອກຈາກນີ້ ຍັງມີເຣື່ອງບັນຫາຜົລກະທົບຂ້າມຊາຍແດນ ຢູ່ແມ່ນ້ຳຂອງ ອັນເກີດມາຈາກການສ້າງເຂື່ອນ ເຊິ່ງບັນຫານີ້ ກໍຍັງບໍ່ທັນໄດ້ຮັບການແກ້ໄຂ.
ຜູ້ຕ່າງໜ້າ ກຸ່ມຮັກຊຽງຂອງ ແຂວງ ຊຽງຮາຍປະເທດໄທຍ ໄດ້ກ່າວວ່າ:
“ການຄັດເລືອກ ໃຫ້ລາວເປັນປະທານອາຊ້ຽນ ສິ່ງທີ່ລາວຈະຕ້ອງເປັນຫ່ວງໃຫ້ຫຼາຍທີ່ສຸດ ຄືເຣື່ອງຄຸນນະພາບຊີວິຕຂອງປະຊາຊົນ ຍ້ອນທີ່ຜ່ານມາ ຂ້ອນຂ້າງທີ່ຈະໄດ້ຮັບການເບິ່ງແຍງໜ້ອຍ ແລະ ເຣື່ອງແມ່ນ້ຳຂອງ ຈະຕ້ອງມີຄວາຊັດເຈນ ບໍ່ວ່າ ລາວຈະຕ້ອງການຜົລປໂຍດ ຈາກການຜລິຕກະແສໄຟຟ້າ ຫຼາຍສ່ຳໃດ ກໍຕາມ ແຕ່ຈະຕ້ອງບໍ່ສົ່ງຜົລກະທົບ ກັບປະເທດເພື່ອນບ້ານ.”
ປະເທດລາວ ໄດ້ເຂົ້າເປັນສະມາຊິກອາຊ້ຽນ ໃນປີ 1997 ແລະ ໄດ້ຮັບກຽດເປັນປະທານວຽນ ອາຊ້ຽນແລ້ວ 2 ຄັ້ງ:
- ຄັ້ງທຳອິດ ໃນປີ 2004
- ຄັ້ງທີ 2 ໃນປີ 2016 ເຊິ່ງ ໃນເວລານັ້ນ ທ່ານ ບາຣັກ ໂອບາມ້າ ອະດີດປະທານາທິບໍດີ ສະຫະຣັຖອາເມຣິກາ ກໍໄດ້ເຂົ້າຮ່ວມກອງປະຊຸມ ສຸດຍອດຜູ້ນຳອາຊ້ຽນ.
ສຳລັບການເປັນປະທານວຽນ ອາຊ້ຽນ ຄັ້ງທີ 3 ຂອງປະເທດລາວ ຈະເຣີ່ມແຕ່ວັນທີ 1 ມົກກະຣາ ຫາ ວັນທີ 31 ທັນວາ ປີ 2024 ແລະ ໃນລະຫວ່າງນັ້ນ ປະເທດລາວ ກໍຈະເປັນເຈົ້າພາບ ຈັດກອງປະຊຸມ ສຸດຍອດຜູ້ນຳອາຊ້ຽນ ນຳອີກດ້ວຍ.