EU-ລາວ ບໍ່ເວົ້າເຣື້ອງຄຣິສຈຽນ ຖືກຈັບ

ອົງການ ສາສນາ ຄຣິສຈຽນ ສາກົນ ກ່າວວ່າ ທາງການລາວ ໄດ້ຈັບກຸມ ຊາວຄຣິສຈຽນ 11 ຄົນ ທີ່ ເມືອງ ສອງຄອນ ແຂວງ ສວັນນະເຂດ ເຖິງ ປັດຈຸບັນ ກໍຍັງ ບໍ່ຖືກປ່ອຍ ຕົວເທື່ອ.

ຜ່ານມາ ບັນຫາ ດັ່ງກ່າວ ບໍ່ໄດ້ ຖືກຍົກມາ ໂອ້ລົມ ກັນເລີຍ ໃນ ກອງປະຊຸມ ວ່າດ້ວຍ ສິດທິມະນຸດ ແລະ ການ ປົກຄອງ ແບບ ຣະບົບ ກົດຫມາຍ ໃນລາວ ຣະຫວ່າງ ເຈົ້າຫນ້າທີ່ ສະພາ ຢູໂຣບ ກັບ ເຈົ້າຫນ້າທີ່ ລາວ ທີ່ ກຸງ ບຣາສໂຊ ທັ້ງໆທີ່ ເຈົ້າຫນ້າທີ່ ຈາກ ອົງການ ສາສນາ ຄຣິສຈຽນ ສາກົນ ຫລື CSW ຮຽກຮ້ອງ ໃຫ້ມີການ ໂອ້ລົມ ກັນ ກ່ຽວກັບ ບັນຫາ ນີ້ ກັບ ສປປລາວ.

ຊາວຄຣິສຈຽນ ລາວ 11 ຄົນ ທີ່ ບ້ານປາກຊອງ ເມືອງ ສອງຄອນ ແຂວງ ສວັນນະເຂດ ຖືກຈັບ ໃນວັນທີ 11 ພຶສພາ ຜ່ານມາ ໃນ ຂໍ້ກ່າວຫາ ຈັດພິທີ ທາງ ສາສນາ ໃນ ໂບດ ທີ່ ບໍ່ໄດ້ຮັບ ອະນຸຍາດ  ຊາວບ້ານ ຜູ້ທີ່ຖືກຈັບ ຄົນອຶ່ນໆ ອີກ 12 ຄົນ ທີ່ ຮ່ວມດ້ວຍ ແມ່ຍິງ ແລະ ເດັກນ້ອຍ ນັ້ນຖືກ ປ່ອຍຕົວ ຍ້ອນຍອມ ເຊັນ ສັນຍາ ວ່າ ຈະບໍ່ຈັດ ພິທີ ທາງ ການສາສນາ ໃນ ສະຖານທີ່ ແຫ່ງ ນັ້ນອີກ.

ອົງການ ສິ້ງຊອມ ດ້ານ ສິດທິ ການ ນັບຖື ສາສນາ ສາກົນ ເວົ້າວ່າ ເຈົ້າຫນ້າທີ່ ລາວ ຮ່ວມດ້ວຍ ພໍ່ບ້ານ ຜູ້ໃຫມ່ ອ້າງວ່າ ຊາວ ຄຣິສຈຽນ ບໍ່ໄດ້ຮັບ ອະນຸຍາດ ຈັດພິທີ ໃນໂບດ ດັ່ງກ່າວ ແຕ່ ຊາວຄຣິສຈຽນ ບອກວ່າ ພວກຂະເຈົ້າ ໄດ້ຮັບ ອະນຸຍາດ ຈາກ ພໍ່ບ້ານ ຄົນເກົ່າ ໃນປີ ຜ່ານມາ ວ່າໃຫ້ ຈັດພິທີ ໄດ້.