ທາງຣົດໄຟ ລາວບາວ ສວັນນະເຂດ

ການສຶກສາ ຜົນກະທົບ ຕໍ່ ສິ່ງແວດລ້ອມ ຂອງ ໂຄງການ ຣົດໄຟ  ລາວ-ວຽດນາມ ຍັງບໍ່ໄດ້ ລົງມື.

ເຈົ້າໜ້າທີ່ ກົມຣົດໄຟ ທີ່ ບໍ່ປະສົງ ອອກຊື່ ບອກກັບເອເຊັຽເສຣີ ວ່າ ເຖິງແມ່ນວ່າ ບໍຣິສັດ Giant Consolidated ຂອງ ມາເລເຊັຽ ໄດ້ເຊັນສັນຍາ ຢືມເງິນ 5 ພັນ ລ້ານໂດລາ ສະຫະຣັດ ຈາກ ສະຖາບັນ ການເງິນ Rich Banco Berhad ຂອງ ປະເທດ ນີວຊີແລັນ  ເພື່ອນໍາມາສ້າງ ເສັ້ນທາງ ຣົດໄຟ ຈາກ ລາວ ຫາ ວຽດນາມ ເມື່ອອາທິດ ຜ່ານມາ ແລ້ວກໍຕາມ, ແຕ່ທາງ ບໍຣິສັດ ຍັງບໍ່ທັນ ເລີ້ມສຶກສາ ຜົນກະທົບ ຕໍ່ ສິ່ງແວດລ້ອມ ຂອງໂຄງການ ນີ້ເທື່ອ. ທ່ານວ່າ ຕາມກົດໝາຍ ໃໝ່ ຂອງລາວ ການພັທນາ ໂຄງການ ໃດກໍດີ ຕ້ອງມີ ການສຶກສາ ຜົນກະທົບ ຕໍ່ ສິ່ງແວດລ້ອມໃຫ້ລະອຽດ ເສັຽກ່ອນ ຈຶ່ງ ຈະພິຈາຣະນາ ໃຫ້ລົງມື ສ້າງໄດ້.

ທ່ານເວົ້າວ່າ ບໍຣິສັດ Giant Consolidated ໄດ້ເຊັນ ສັນຍາແມ່ ເພື່ອສ້າງ ທາງຣົດໄຟ ສາຍນີ້ ທີ່ ມີຄວາມຍາວ ປະມານ 220 ກິໂລແມັດ ຈາກ ເມືອງໄກສອນ ພົມວິຫານ ຫາ ເມືອງລາວບາວ ເມືອງຊາຍແດນ ວຽດນາມ ຕັ້ງແຕ່ ກອງປະຊຸມ ສຸດຍອດ ອາຊຽນ ປີຜ່ານມາ.

ປັຈຈຸບັນ ທາງບໍຣິສັດ ຫາເງິນມາ ລົງທຶນ ໄດ້ແລ້ວ ການລົງມື ກໍ່ສ້າງ ອາດໄປໄວກວ່າ ໂຄງການ ສ້າງທາງຣົດໄຟ ລາວ-ຈີນ ເພາະວ່າ ຝ່າຍລາວ ບໍ່ຕ້ອງ ເປັນຫ່ວງນໍາ ຫລາຍຢ່າງ, ເຊັ່ນເງິນ ລົງທຶນ ຕລອດຮອດ ແຮງງານ ກໍແມ່ນ ຂອງ ບໍຣິສັດ ເປັນຜູ້ຈັດການ ຫາເອງ. ຍັງບໍ່ເທົ່ານັ້ນ ເຂົາເຈົ້າຍັງ ໃຫ້ຮຸ້ນລົມ ແກ່ ຣັຖບານລາວ ຕື່ມອີກ 10 ສ່ວນຮ້ອຍ. ຮູບການສ້າງ ແມ່ນປະເພດ ບີໂອທີ ໝາຍຄວາມວ່າ ບໍຣິສັດ ເປັນຜູ້ລົງທຶນ ສ້າງເອງ ເປັນເຈົ້າຂອງ ດໍາເນີນ ກິຈການ ແລ້ວໂອນໃຫ້ ຣັຖບານ ຕາມການຕົກລົງ ທີ່ກໍານົດໄວ້ ໃນສັນຍາ.

ເມື່ອຖາມວ່າ ຈະລົງມືສ້າງ ມື້ໃດແທ້ ທ່ານ ກໍຕອບວ່າ ດຽວນີ້ ຍັງສຶກສາ ຄວາມເປັນໄປໄດ້ ຢູ່, ຈາກນັ້ນ ກໍຈະມີການ ສຶກສາ ການອອກແບບ ຢ່າງລະອຽດ ຊຶ່ງ ທາງ ບໍຣິສັດ ຄາດວ່າ ຈະໃຫ້ແລ້ວ ພາຍໃນ ເດືອນສິງຫາ. ຜົນຂອງການ ສໍາຣວດ ເສັ້ນທາງຣົດໄຟ ສາຍນີ້ ບໍ່ທັນນໍາ ອອກມາ ເປີດເຜີຽ ເທື່ອວ່າ ຈະຜ່ານ ຈຸດໃດແດ່ ແລະ ຈະໃຊ້ແຮງງານ ເທົ່າໃດ ແລະ ຈາກໃສແດ່.