ລາວ ເພີ້ມຜລິດໄຟຟ້າ

ການຜລິດໄຟຟ້າ ໃນລາວ ປີນີ້ ໄດ້ເພີ້ມຂຶ້ນ ເປັນປະມານ 6,000 ລ້ານ ກິໂລວັດຊົ່ວໂມງ ຊຶ່ງສ່ວນຫລາຍແລ້ວແມ່ນຜລິດຈາກເຂື່ອນ ພລັງນໍ້າ ເພື່ອສົ່ງອອກຂາຍ ຕ່າງປະເທດ ທັ້ງໆທີ່ ຄວາມຕ້ອງການ ພາຍໃນປະທດຍັງບໍ່ພຽງພໍຢູ່. ຕາມຣາຍງານອົງການຂ່າວເບີນາມາ.

ຣາຍງານອົງການຂ່າວຊິນຫົວ ວ່າ ການສົ່ງອອກ ໄຟຟ້າຂອງລາວ ໄດ້ເພີ້ມຂຶ້ນ ເຖິງ 4,000 ລ້ານ ກິໂລວັດຊົ່ວໂມງແລ້ວສໍາລັບເຄິ່ງປີ ຂອງ ສົກປີການ ທໍາອິດ ໂດຍແບ່ງປັນ ສໍາລັບໃຊ້ພາຍໃນ ປະເທດ ພຽງແຕ່ 1,000 ລ້ານກິໂລວັດຊົ່ວໂມງ. ຣາຍໄດ້ຈາກການສົ່ງໄຟຟ້າ ອອກຂາຍໄປ ຕ່າງປະເທດ ມີເຖິງ 217 ລ້ານ ໂດລາ ສະຫະຣັຖ ສ່ວນຣາຍໄດ້ຈາກ ການບໍຣິໂພຄ ພາຍໃນປະເທດ ມີເຖິງ 112 ລ້ານ ໂດລາ ສະຫະຣັຖ.
ໂຕເລກ ທາງການລາວ ແຈ້ງວ່າ ປັດຈຸບັນ 83 ສ່ວນຮ້ອຍ ຂອງ ປະຊາຊົນ ໃນທົ່ວປະເທດ ມີໄຟຟ້າ ໃຊ້ແລ້ວ ໃນນັ້ນ ປະຊາຊົນ ໃນນະຄອນຫລວງ ວຽງຈັນ ທຸກຄົວເຮືອນມີໄຟຟ້າໃຊ້ ໃນຂະນະ ດຽວກັນ ປະຊາຊົນ ໃນ ແຂວງຫົວພັນ ພຽງແຕ່ 47 ສ່ວນຮ້ອຍ ເທົ່ານັ້ນ ທີ່ມີ ໄຟຟ້າໃຊ້.