អ្នកអត្ថាធិប្បាយនយោបាយ លោក គឹម សុខ បានប្រាប់វិទ្យុអាស៊ីសេរីនៅថ្ងៃទី៩វិច្ឆិកាថា ក្រៅពីនេះ សហរដ្ឋអាមេរិកក៏ទំនងធុញទ្រាន់នឹងរដ្ឋាភិបាលលោក ហ៊ុន ម៉ាណែត ដែលមានការជាប់ពាក់ព័ន្ធនឹងគ្រួសារត្រកូលហ៊ុន ក្នុងជំនួញឧក្រិដ្ឋកម្មឆ្លងដែន។ លោកបញ្ជាក់ថា ប្រសិនបើកម្ពុជាមិនកែលម្អបញ្ហាប្រជាធិបតេយ្យ និងបញ្ហាពាណិជ្ជកម្មកខ្វក់ទេនោះ ទោះជាទៅចរចាប៉ុន្មានលើកទៀតក៏មិនទទួលបានលទ្ធផលដែរ។
ចំណុចដែលសហរដ្ឋអាមេរិកធុញទ្រាន់បំផុតនឹងរដ្ឋាភិបាលលោក ហ៊ុន ម៉ាណែត ត្រង់ថារដ្ឋាភិបាលត្រកូលហ៊ុននេះ កាន់តែសន្យាធ្វើកំណែទម្រង់ កម្ពុជាកាន់តែលង់វិបត្តិគ្រប់វិស័យ។ ឥឡូវគណបក្សប្រជាជនកម្ពុជាក្លាយទៅជាស្ថាប័នប្រព្រឹត្តឧក្រិដ្ឋកម្មឆ្លងដែនទៅហើយ។
— លោក គឹម សុខ
ការលើកឡើងនេះ ធ្វើឡើងបន្ទាប់ពីអង្គភាពអ្នកនាំពាក្យរដ្ឋាភិបាលបានអះអាងថា ការចរចាបដិការពាណិជ្ជកម្មជុំទី២ជាមួយអាមេរិក ដែលដឹកនាំដោយឧបនាយករដ្ឋមន្ត្រី លោក ស៊ុន ចាន់ថុល និងអ្នកស្រី ចម និម្មល រដ្ឋមន្ត្រីក្រសួងពាណិជ្ជកម្ម កាលពីថ្ងៃទី៤ដល់ថ្ងៃទី៥មិថុនា បានដំណើរការដោយរលូន។
អង្គភាពអ្នកនាំពាក្យរដ្ឋាភិបាលបានបញ្ជាក់នៅក្នុងសេចក្ដីប្រកាសព័ត៌មានចុះថ្ងៃទី៧មិថុនាថា ភាគីទាំងពីរបានបន្តពិភាក្សាគ្នាអំពីសេចក្ដីព្រាងកិច្ចព្រមព្រៀងពាណិជ្ជកម្មបដិការ ដោយឈរលើស្មារតីយោគយល់គ្នាខ្ពស់ និងបានឈានទៅរកការឯកភាពគ្នាលើបញ្ញត្តិជាច្រើន។ ប៉ុន្តែមិនបានបញ្ជាក់ថា មានអ្វីខ្លះនោះទេ ហើយភាគីទាំងពីរនឹងជួបចរចាគ្នាជុំទី៣នៅរដ្ឋធានីវ៉ាស៊ីនតោនបន្តទៀតក្នុងពេលឆាប់ខាងមុខ។
អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ មានប្រសាសន៍ថា ការចរចាបញ្ហាពន្ធជាមួយអាមេរិកលើកទី២នេះមិនទទួលបានផ្លែផ្កាអ្វីនោះទេ។ លោកបញ្ជាក់ថា រឿងនេះដោយសារតែសហរដ្ឋអាមេរិកបានបង្ហាញក្ដីកង្វល់អំពីការឆបោកតាមអ៊ីនធឺណិត ការជួញដូរមនុស្ស ការលាងលុយកខ្វក់ បញ្ហាប្រជាធិបតេយ្យ និងការលាងជម្រះអំពីការធ្វើអាជីវកម្មកខ្វក់ជាមួយសហរដ្ឋអាមេរិក។
អ៊ីចឹង លក្ខខណ្ឌទាំងអស់នេះ វានៅតែជាបញ្ហាអត្ថិភាពដែលទាមទារឱ្យមានវិធានការជាក់លាក់ ហើយត្រូវមានក្របខ័ណ្ឌមួយដែលជឿទុកចិត្តបានពីសំណាក់រដ្ឋបាលសហរដ្ឋអាមេរិក ជាពិសេសនៅក្នុងក្របខ័ណ្ឌតំណាងពាណិជ្ជកម្មសហរដ្ឋអាមេរិកដែលយូអេសធីអរ(USTR)នេះ វាជាភ្នាក់ងារមួយសំខាន់របស់សហរដ្ឋអាមេរិកនៅក្នុងការវាយតម្លៃនៅក្នុងស្ថានភាពជាក់ស្ដែង សម្រាប់ប្រទេសនីមួយៗដែលនាំចេញទៅសហរដ្ឋអាមេរិក។
— លោក ឃុន ថារ៉ូ
រដ្ឋាភិបាលលោក ដូណាល់ ត្រាំ (Donald Trump) បានប្រកាសដាក់ពន្ធលើទំនិញនាំចេញពីកម្ពុជា និងប្រទេសលើពិភពលោកជាង៧០ប្រទេសផ្សេងទៀត។ ប៉ុន្តែលោក ដូណាល់ ត្រាំ បានប្រកាសជាថ្មី ទុកពេល៩០ថ្ងៃឱ្យប្រទេសទាំងនោះចរចា ដោយទុកឱ្យអនុវត្តពន្ធត្រឹមតែ១០%សិន។
កាលពីថ្ងៃទី១៣ដល់១៥ខែឧសភាមន្ត្រីរដ្ឋាភិបាលកម្ពុជាបានបរាជ័យម្ដងហើយក្នុងចរចាបញ្ហាពន្ធជុំទី១ជាមួយតំណាងសហរដ្ឋអាមេរិក នៅរដ្ឋធានីវ៉ាស៊ីនតោន។ ភាគីទាំងពីរបានត្រឹមតែជជែកគ្នាត្រង់ទៅត្រង់មកលើការពង្រឹងទំនាក់ទំនងពាណិជ្ជកម្មទ្វេភាគី និងពិភាក្សាសេចក្ដីព្រាងកិច្ចព្រៀងពាណិជ្ជកម្មបដិការ។
អ្នកឃ្លាំមើលលើកឡើងថា កម្ពុជាគួរតែកែលម្អបញ្ហាតាមការស្នើសុំរបស់អាមេរិក ដើម្បីបានបន្ធូរបន្ថយពន្ធ ដែលជាប្រយោជន៍ដល់ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។