ក្រសួងការពារជាតិកម្ពុជាបានចេញសេចក្ដីប្រកាសនៅថ្ងៃទី០៩ខែមិថុនាថា កម្ពុជាពុំបានដកទ័ពចេញពីដែនអធិបតេយ្យភាព ដែលបានកាន់កាប់ជាយូរមកហើយនោះទេ ប៉ុន្តែជាការរៀបចំកម្លាំងកងទ័ព រាប់ទាំងការឈរជើង ការពង្រាយ ការចល័ត និងការកែសម្រួលកម្លាំងកងទ័ព។
ក្រសួងការពារជាតិបន្តថា កងទ័ពកម្ពុជាគាំទ្រការខិតខំស្វែងរកដំណោះស្រាយដោយសន្ដិវិធី ក្នុងនោះការចរចាវាស់វែងខណ្ឌសីមានិងបោះបង្គោះព្រំដែននៅសេសសល់ និងការប្ដឹងទៅតុលាការយុត្តិធម៌អន្តរជាតិ (IJC) ប៉ុន្តែក៏ត្រៀមខ្លួនការពារបូរណភាពទឹកដី និងប្រឆាំងរាល់ការប៉ុនប៉ងឈ្លានពានពីទ័ពថៃដែរ។
ការចេញសេចក្ដីប្រកាសព័ត៌មានពីក្រសួងការពារជាតិកម្ពុជានេះធ្វើឡើង ក្រោយពេលបណ្ដាសារព័ត៌មានថៃបានលើកឡើងថា កងទ័ពខ្មែរនិងថៃបានព្រមព្រៀងដកទ័ពចេញពីតំបន់ជម្លោះ ក្រោយពីមានជំនួបរវាងលោកឧត្ដមសេនីយ៍ឯក ស្រី ឌឹក មេបញ្ជាការរងកងទ័ពជើងគោកកម្ពុជា ជាមួយលោកឧត្ដមសេនីយ៍ទោ សោមភូប ផារ៉ាវ៉េត (Somphop Parawej) មេបញ្ជាការកងកម្លាំងសុរៈណារី ដែលតំណាងឱ្យកងទ័ពជើងគោកថៃ។
រដ្ឋមន្ត្រីក្រសួងការពារជាតិថៃលោក ភូមិថាំ វេឆាយ៉ាឆៃ (Phumtham Wechayachai) ក៏បានលើកឡើងនៅក្នុងសេចក្ដីថ្លែងការណ៍មួយ ដើម្បីអរគុណភាគីរដ្ឋាភិបាល និងកងទ័ពជួរមុខរបស់កម្ពុជា ដែលបានចូលរួមជជែកគ្នា បន្ធូរបន្ថយភាពតានតឹងនៅព្រំដែន។ លោកបញ្ជាក់ថា កងទ័ពប្រទេសទាំងពីរ ត្រូវបានដកត្រឡប់ទៅទីតាំងដើម ដែលត្រូវបានព្រមព្រៀងគ្នាដូចកាលពីឆ្នាំ២០២៤។
បើទោះជាភាគីថៃលើកឡើងដូច្នេះក្ដី ប្រធានព្រឹទ្ធសភាលោក ហ៊ុន សែន បានបញ្ជាក់ហ្វេសប៊ុកនៅថ្ងៃទី០៩ ខែមិថុនាថា កម្ពុជាបានកែសម្រួលការឈរជើងរបស់កងទ័ពនៅតំបន់ជម្លោះ ដែលមានការស្រុះស្រួលគ្នានៃមេបញ្ជាការកងទ័ពប្រទេសទាំងពីរ ដើម្បីបញ្ចៀសការប៉ះទង្គិចបង្ហូរឈាមទ្រង់ទ្រាយធំ និងមិនមែនជាការដកទ័ពចេញពីទឹកដីកម្ពុជានោះទេ។
តំបន់ព្រំដែនកម្ពុជានិងថៃឡើងកម្ដៅខ្លាំង បន្ទាប់ពីកងទ័ពថៃបានលួចឆ្មក់បាញ់ប្រហារនៅតំបន់មុំបីបណ្ដាលឱ្យទាហានខ្មែរម្នាក់ឈ្មោះ សួន រ៉ោន បានស្លាប់កាលពីព្រឹក ថ្ងៃទី២៨ខែឧសភា។
កម្ពុជានឹងធ្វើជាម្ចាស់ផ្ទះកិច្ចប្រជុំគណៈកម្មការព្រំដែនចម្រុះជាមួយថៃនៅថ្ងៃទី១៤មិថុនា ប៉ុន្តែនឹងមិនពិភាក្សាជុំវិញតំបន់ជម្លោះព្រំដែនរសើបទាំង៤ គឺប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបីឡើយ ដោយសារកម្ពុជាបានសម្រេចយកតំបន់ទាំង៤នេះ ត្រៀមប្ដឹងទៅតុលាការយុត្តិធម៌អន្តរជាតិ។
ចំណែកលោក ហ៊ុន ម៉ាណែត បានបញ្ជាក់ជំហរចុងក្រោយរបស់ខ្លួន នៅថ្ងៃទី៩ ខែមិថុនា រដ្ឋាភិបាលនៅតែបន្តសហការជាមួយប្រទេសថៃ ដើម្បីវាស់វែងខណ្ឌសីមានិងបោះបង្គោះព្រំដែននៅសេសសល់ ដោយប្រើប្រាស់យន្តការគណៈកម្មការព្រំដែនចម្រុះ (JBC) ដែលបានមកពីអនុស្សរណៈយោគយល់គ្នាឆ្នាំ២០០០ និងការប្រើប្រាស់យន្តការអន្តរជាតិ ដូចជាករណីប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី ដែលកម្ពុជានឹងបញ្ជូនពាក្យបណ្ដឹងទៅតុលាការយុត្តិធម៌អន្តរជាតិនៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។