នៅថ្ងៃទី២២ឧសភា សហភាពអឺរ៉ុបបានចេញរបាយការណ៍ប្រចាំឆ្នាំ ស្ដីពីស្ថានភាពសិទ្ធិមនុស្សនិងលទ្ធិប្រជាធិបតេយ្យនៅជុំវិញពិភពលោក សម្រាប់២០២៤ ដោយក្នុងនោះសហភាពអឺរ៉ុបបានលើកឡើងថា ប្រទេសកម្ពុជា ចាប់តាំងពីលោក ហ៊ុន មាណែត បានក្លាយជានាយករដ្ឋមន្ត្រី មិនបានធ្វើឱ្យមានការផ្លាស់ប្ដូរល្អប្រសើរនៃស្ថានភាពសិទ្ធិមនុស្សនិងលទ្ធិប្រជាធិបតេយ្យ ខុសពីឪពុករបស់លោក គឺលោក ហ៊ុន សែន ឡើយ។
សហភាពអឺរ៉ុបក៏បានរំឭកថា ការសម្រេចកាត់ប្រព័ន្ធអនុគ្រោះពន្ធ EBA ២០% តាំងពីឆ្នាំ២០២០ ដោយសារស្ថានភាពរំលោភសិទ្ធិមនុស្សនិងលទ្ធិប្រជាធិបតេយ្យធ្ងន់ធ្ងរ និងជាលក្ខណៈប្រព័ន្ធ គឺនៅតែបន្តអនុវត្ត។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ មើលឃើញថា សហភាពអឺរ៉ុបអាចពិចារណាផ្ដល់ប្រព័ន្ធអនុគ្រោះពន្ធ EBA២០% មកវិញ ប្រសិនបើកម្ពុជាបង្ហាញឱ្យឃើញពីឆន្ទៈពិតប្រាកដ ក្នុងការងាកទៅគោរពសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ។
ខ្ញុំគិតថា លក្ខខណ្ឌនេះ វាទាមទារឱ្យអាជ្ញាធររដ្ឋ ត្រូវមានវិធានការឆ្លើយតបយ៉ាងណា ដើម្បីអាចជឿទុកចិត្តបាន ដើម្បីស្វែងរកឱកាសក្នុងការធ្វើកិច្ចការជាមួយសហភាពអឺរ៉ុប ដើម្បីធ្វើឱ្យស្ថានភាពសេដ្ឋកិច្ច និងការនាំចេញទំនិញរបស់កម្ពុជា ឱ្យបានប្រសើរឡើង។
— លោក ឃុន ថារ៉ូ
នៅក្នុងរបាយការណ៍ដដែល សហភាពអឺរ៉ុបបានបន្តថា កត្តាធ្វើឱ្យសិទ្ធិពលរដ្ឋនិងនយោបាយ នៅតែជាបញ្ហាដ៏ធំមួយ ដោយសារអ្នកនយោបាយជំទាស់ អ្នកការពារសិទ្ធិមនុស្ស អ្នកសារព័ត៌មាន និងសកម្មជនដីធ្លីជាដើម នៅតែទទួលរងការយាយី ការបំភិតបំភ័យ និងអំពើហិង្សាតាមគ្រប់រូបភាព ក្នុងនោះ រួមទាំងករណីយាយីលើអង្គការសង់ត្រាល់ជាដើម។
សហភាពអឺរ៉ុប បានលើកឡើងពីការកាត់ទោសលើសកម្មជនបរិស្ថានមាតាធម្មជាតិទាំង១០នាក់ ការចាប់ខ្លួនតាមទំនើងចិត្តលើអ្នករិះគន់កិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ និងវៀតណាម យ៉ាងហោចណាស់៩៤នាក់ ការចាប់បញ្ជូនអ្នកនយោបាយប្រឆាំង៦នាក់ពីប្រទេសថៃមកឃុំខ្លួននៅកម្ពុជា រួមទាំងការចោទប្រកាន់លើអ្នកសារព័ត៌មាន៤៦នាក់ និងករណីបាញ់សម្លាប់អ្នកសារព័ត៌មានរាយការណ៍ពីបទល្មើសព្រៃឈើលោក ឈឿង ឈឹង កាលពីចុងឆ្នាំ២០២៤។
ប្រធានអង្គការប្រជាធិបតេយ្យខ្មែរនៅប្រទេសអូស្ត្រាលី (KDO) លោក ស៊ឹង សែនករុណា យល់ឃើញថា កម្ពុជាកំពុងដឹកនាំដោយគ្រួសារនិយម និងបក្ខពួកនិយម និងដើម្បីឱ្យងាកទៅគោរពតាមកិច្ចព្រមព្រៀងសន្ដិភាពទីក្រុងប៉ារីស សហរដ្ឋអឺរ៉ុបគួររកវិធីដាក់សម្ពាធផ្សេង ក្រៅពីការកាត់បន្ថយប្រព័ន្ធអនុគ្រោះពន្ធ២០%។
ការរំលោភបំពានសិទ្ធិមនុស្ស និងលទ្ធិប្រជាធិបតេយ្យនៅកម្ពុជា គឺមានរយៈពេលយូរមកហើយ គឺតាំងពីមានការរំលាយគណបក្សប្រឆាំងដ៏ធំមួយក្នុងឆ្នាំ២០១៧ មកដល់បច្ចុប្បន្ននេះ។ អ៊ីចឹង ខ្ញុំទទូចឱ្យសហភាពអឺរ៉ុបពិនិត្យមើលឡើងវិញ តើវិធានការអ្វី ដែលអាចមានការកែប្រែពីការរំលោភបំពានទាំងអស់ហ្នឹង ឱ្យមកមានភាពល្អប្រសើរឡើងវិញ។
— លោក ស៊ឹង សែនករុណា
ទោះជាយ៉ាងណា សហភាពអឺរ៉ុបបញ្ជាក់ថា ក្នុងផែនការសកម្មភាពស្ដីពីសិទ្ធិមនុស្ស និងលទ្ធិប្រជាធិបតេយ្យឆ្នាំ២០២០ដល់ឆ្នាំ២០២៧ សហភាពអឺរ៉ុបនៅតែបន្តផ្តោតសំខាន់លើការការពារនិងលើកកម្ពស់សិទ្ធិមនុស្សនិងនយោបាយ ជាពិសេសនឹងបន្តតាមឃ្លាំមើលសវនាការលើក្រុមអ្នកការពារសិទ្ធិមនុស្ស សកម្មជននយោបាយ និងអ្នកនយោបាយនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។