សាច់ញាតិអះអាងថា ពលករខ្មែរម្នាក់ ដែលអាជ្ញាធរម៉ាឡេស៊ី ចាប់បញ្ជូនដោយបង្ខំមកកម្ពុជា គឺកញ្ញា នួន តឿន មានជំងឺធ្ងន់ធ្ងរបណ្ដាលឱ្យប្រកាច់ដួលសន្លប់នៅក្នុងពន្ធនាគាររាជធានីភ្នំពេញ។ គ្រួសារ និងមន្ត្រីសិទ្ធិមនុស្សស្នើដល់អាជ្ញាធរយកចិត្តទុកដាក់ព្យាបាលអ្នកជាប់ឃុំ និងស្នើដល់មន្ត្រីពន្ធនាគារឱ្យបញ្ជូននាងទៅព្យាបាលជំងឺ នៅមន្ទីរពេទ្យនៅខាងក្រៅមន្ទីរឃុំឃាំង។ ប៉ុន្តែមន្ត្រីពន្ធនាគារបដិសេធការលើកឡើងថា កញ្ញា នួន តឿន ឈឺធ្ងន់ នៅក្នុងពន្ធនាគារនេះ។
សាច់ញាតិពលករខ្មែរ ដែលអាជ្ញាធរចាប់បញ្ជូនពីប្រទេសម៉ាឡេស៊ីព្រួយបារម្ភខ្លាចស្ថានភាពជំងឺរបស់កញ្ញា នួន តឿន វិវឌ្ឍទៅរកសភាពធ្ងន់ធ្ងរ។
ម្ដាយមីងរបស់កញ្ញា នួន តឿន នៅស្រុកបសេដ្ឋ ខេត្តកំពុងស្ពឺ គឺលោកស្រី ឆេង ថុល ប្រាប់វិទ្យុអាស៊ីសេរី នៅល្ងាចថ្ងៃទី២០ ខែធ្នូថា លោកស្រីបានទៅសួរសុខទុក្ខកញ្ញា នួន តឿន នៅក្នុងពន្ធនាគាររាជធានីភ្នំពេញ (ម២) បន្ទាប់ពីអ្នកជាប់ឃុំដូចគ្នាហៅទូរស័ព្ទប្រាប់លោកស្រីថា កាលពីថ្ងៃទី១៩ ធ្នូ កញ្ញា នួន តឿន មានជំងឺរាគ ក្អួត បណ្ដាលឱ្យសន្លប់ដេកស្ដូកស្ដឹងនៅទីនោះ។ លោកស្រីឱ្យដឹងថា បច្ចុប្បន្នអាការៈជំងឺរបស់កញ្ញា នួន តឿន បានធូរស្បើយខ្លះហើយ ដោយនៅចុកពោះ បើទោះបីគ្រូពេទ្យនៅពន្ធនាគារចាក់ថ្នាំពេទ្យរួចមកក្ដី។ លោកស្រី ឆេង ថុល ប្រាប់ថា លោកស្រីអាណិតខ្លោចចិត្ត ពេលឃើញក្មួយស្រីស្គមស្គាំងនិយាយមួយៗ រៀបរាប់ពីទុក្ខលំបាក បន្ទាប់មកនាងស្នើសុំមន្ត្រីពន្ធនាគារឱ្យបញ្ជូនទៅព្យាបាលជំងឺនៅខាងក្រៅមន្ទីរឃុំឃាំង ដើម្បីរកមូលហេតុនៃជំងឺ និងផ្តល់ការព្យាបាលឱ្យបានត្រឹមត្រូវ។
លោកស្រី ឆេង ថុល៖«ក្មួយខ្ញុំមានអាការៈមិនទាន់ប្រសើរនៅឡើយទេ ពីព្រោះគាត់នៅឈឺនៅឡើយ។ និយាយទៅ គាត់មានអាការៈយ៉ាប់ខ្លាំងតែម្ដង ទឹកមុខឡើងស្ងួត។ ពីមុន ខ្ញុំទៅជួបគ្រាន់បានសើចបានអី តែឥឡូវអត់ទេ គឺទឹកមុខឡើងខ្មៅ។ និយាយទៅ តាំងពីគាត់ចូលពន្ធនាគារនៅហ្នឹងមក គាត់ឈឺរហូតតែម្ដង សឹងតែរាល់ ខែ។ ខ្ញុំស្នើសុំឱ្យសម្ដេចដោះលែងក្មួយខ្ញុំឱ្យត្រឡប់មកផ្ទះវិញមក ពីព្រោះក្មួយខ្ញុំនិយាយអត់បានដឹងអី ណាមួយវាឈឺផង»។
លោកស្រីឱ្យដឹងថាកញ្ញា នួន តឿន មិនដែលមានជំងឺពីមុនមកទេ ប៉ុន្តែឋ ក្រោយពេលនាងជាប់ឃុំជាច្រើនខែមក មានជំងឺច្រើនមុខ ខណៈការហូបចុកនៅក្នុងពន្ធនាគារមិនបានគ្រប់គ្រាន់ និងគ្មានជីវជាតិជាដើម។
ឆ្លើយតបរឿងនេះ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក ឃៀង សុណាឌីន ប្រាប់វិទ្យុអាស៊ីសេរីថា កញ្ញា នួន តឿន ពុំមានស្ថានភាពជំងឺធ្ងន់ធ្ងរ ដូចការលើកឡើងនោះទេ។ លោកថា បើសិនករណីជនជាប់ឃុំរូបនោះ មានស្ថានភាពជំងឺធ្ងន់ធ្ងរ មន្ត្រីពន្ធនាគារម២ នឹងស្នើសុំគោលការណ៍ពីព្រះរាជអាជ្ញា ដើម្បីបញ្ជូនជននេះទៅព្យាបាលជំងឺនៅមន្ទីរពេទ្យខាងក្រៅពន្ធនាគារហើយ។ ប៉ុន្តែ លោកព្រមានចាត់វិធានការ ចំពោះអ្នកដែលទម្លាយរឿងនេះ។
លោក ឃៀង សុណាឌីន៖«តើការព្យាយាមផ្តល់ព័ត៌មានមិនពិតលើស ហួសហេតុនេះ រួមជាមួយការចុះផ្សាយព័ត៌មាននេះជាសាធារណៈ ដែលវាប៉ះពាល់ដល់សិទ្ធិបុគ្គល ព័ត៌មានបុគ្គលនេះ តើធ្វើឡើងក្នុងចេតនាបែបណាដែរ បើសិនជារឿងនេះផ្សព្វផ្សាយចេញជាសាធារណៈមែន ក៏ត្រូវឱ្យមានការទទួលខុសត្រូវក្នុងរឿងនេះដែរ»។
អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា ជនជាប់ឃុំបាត់បង់តែសេរីភាពដើរហើរ តែពួកគាត់មានសិទ្ធិទទួលបានការថែទាំព្យាបាលជំងឺដោយស្មើភាព និងគ្មានការរើសអើង។ លោកយល់ថា បើសិនគ្រូពេទ្យនៅក្នុងពន្ធនាគារពុំមានលទ្ធភាពព្យាបាលជំងឺនោះទេ មន្ត្រីពន្ធនាគារគួរតែអនុញ្ញាតឱ្យជនជាប់ឃុំ ដែលមានជំងឺធ្ងន់ធ្ងរបានទៅព្យាបាលជំងឺនៅខាងក្រៅពន្ធនាគារឱ្យបានទាន់ពេល ដើម្បីកុំឱ្យសុខភាពកាន់តែធ្ងន់ និងជៀសវាងការធ្វេសប្រហែស ធ្វើឱ្យប៉ះពាល់ជីវិតរបស់ជនជាប់ឃុំ។
លោក យិន ម៉េងលី៖«នេះបញ្ហាមួយពាក់ព័ន្ធដល់រឿងមនុស្សធម៌ ទោះគាត់ជាប់បទល្មើសអ្វីក៏ដោយ សំខាន់ណាស់គាត់នៅសិទ្ធិភាពជាមនុស្សដដែល។ អ៊ីចឹង ការទទួលព្យាបាលពួកគាត់ត្រូវប្រព្រឹត្តដូចអ្នកដទៃទៀតដែរ នេះជាន័យមនុស្សធម៌។ គាត់បាត់សិទ្ធិនៅចំណុចមួយចំនួន គឺសេរីភាពក្នុងការជួបជុំគ្រួសារមានពេលកំណត់ អ៊ីចឹងសិទ្ធិជាមនុស្សរបស់គាត់ នៅតែមានដូចគេឯងដែរ»។
កញ្ញា នួន តឿន មានស្រុកកំណើតនៅស្រុកបសេដ្ឋ នៅខេត្តកំពង់ស្ពឺ និងជាកូនកំព្រាឪពុកម្ដាយ។ នាងគឺជាពលករខ្មែរធ្វើការស្របច្បាប់ជាង ១៦ឆ្នាំ នៅប្រទេសម៉ាឡេស៊ីដែលចេញមុខគាំទ្រគណបក្សប្រឆាំង។
កាលថ្ងៃទី៣០ ខែកញ្ញា ប៉ូលិសម៉ាឡេស៊ីបានចាប់កញ្ញា នួន តឿន និរទេសទៅកម្ពុជា តាមសំណើរបស់អាជ្ញាធរក្រុងភ្នំពេញ។ តុលាការបានចោទប្រកាន់កញ្ញា អំពីបទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឱ្យមានការរើសអើង» ពាក់ព័ន្ធកញ្ញារិះគន់ខ្លាំងៗ ជុំវិញការដឹកនាំរបស់លោក ហ៊ុន សែន ប្រធានព្រឹទ្ធសភា និងលោកនាយករដ្ឋមន្ត្រី ហ៊ុន ម៉ាណែត នៅលើបណ្ដាញសង្គម។
លោក យិន ម៉េងលី បញ្ជាក់ថា មេធាវីសមាគមអាដហុក គ្រោងទៅជួប ពិនិត្យមើលស្ថានភាពសុខភាពរបស់កញ្ញា នួន តឿន នៅក្នុងពន្ធនាគារនៅសប្ដាហ៍ក្រោយ ដើម្បីអនុវត្តនីតិវិធីតាមផ្លូវច្បាប់ ដូចជា ការដាក់ពាក្យស្នើសុំតុលាការដោះលែងកញ្ញា នួន តឿន ឱ្យបាននៅក្រៅឃុំ បើទោះជាមកដល់ពេលនេះ ចៅក្រមបានបិទការស៊ើបសួរ និងបញ្ជូនសំណុំទៅជំនុំជម្រះក្ដីនៅពេលខាងមុខនេះក្តី។
គ្រួសារ និងមន្ត្រីសិទ្ធិមនុស្សស្នើដល់តុលាការ និងរដ្ឋាភិបាលលោក ហ៊ុន ម៉ាណែត ឱ្យដោះលែងពលករខ្មែររូបនេះឱ្យមានសេរីភាពវិញ ពីព្រោះអ្វី ដែលនាងនិយាយរិះគន់មេដឹកនាំក្រុងភ្នំពេញកន្លងមក គឺជាការអនុវត្តសិទ្ធិបញ្ចេញមតិដោយមិនមែនជាអំពើល្មើសច្បាប់អ្វីនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។