စားဝတ်နေရေးခက်ခဲလာတဲ့ ရန်ကုန်မြို့ခံများ

• 2022-08-01

ရန်ကုန်မြို့ ဗိုလ်ချုပ်အောင်ဆန်းလမ်းမပေါ်က သရက်တောကျောင်းတိုက်၊ သဘာဝတရားရိပ်သာအရှေ့မှာ နေ့စဉ် နေ့လယ်စာ ထမင်းနဲ့ဟင်း ဝေငှလှူဒါန်းနေတာ တစ်နှစ်ကျော်ပြီဖြစ်ပါတယ်။

လိုအပ်နေသူတွေအနေနဲ့ နေ့လယ်စာ ထမင်းနဲ့ဟင်း လှူဒါန်းမှုကို လာရောက်တန်းစီပြီး ယူကြတာ တစ်နေ့ထက်တစ်နေ့ များလာတယ်လို့ အနီးနားရှိသူတွေက ပြောပါတယ်။

အရင်က လာရောက်သူ အနည်းငယ်သာရှိလို့ ကျောင်းမှာရှိတာပဲ လှူဒါန်းခဲ့ပေမဲ့ အခုနောက်ပိုင်း လာရောက်သူ ၄၀၀ ကျော် ရှိလာတာကြောင့် ရန်ကုန်ဆေးရုံကြီးက လိုအပ်နေသူတွေနဲ့ ဝေယျာ၀စ္စအဖွဲ့တွေအတွက်ပါ ရောပြီး လူ ၅၀၀ စာခန့်ကို ချက်ပြုတ်လှူဒါန်းနေတယ်လို့ ကျောင်းတာဝန်ခံ ဆရာတော် အရှင်ဥတ္တမသီရိက မိန့်ပါတယ်။

လာရောက် လှူဒါန်းလိုသူတွေအတွက် အသားဟင်းနဲ့တစ်နပ်စာ ကျပ်ငွေ သုံးသိန်း၊ ပဲကုလားဟင်းနဲ့ဆိုရင် နှစ်သိန်းနဲ့ သတ်မှတ်ပြီး ကျောင်းကပဲ တာဝန်ယူ ချက်ပြုတ်ပေးနေတယ်လို့ ဆရာတော်က မိန့်ပါတယ်။

လူမျိုးမရွေး ဘာသာမရွေး လာရောက်ယူနိုင်အောင် စီစဉ်ထားပြီး အလှူရှင်တွေရဲ့ လှူဒါန်းမှုလည်း ရှိသလို အလှူရှင်မရှိတဲ့ ရက်တွေမှာလည်း ဘုန်းကြီးကျောင်းကပဲ ဦးဆောင်ပြီး လှူဒါန်းနေတယ်လို့လည်း ကျောင်းတာဝန်ခံ ဆရာတော် အရှင်ဥတ္တမသီရိက မိန့်ပါတယ်။