ဆားလင်းကြီးမှာ တိုက်ပွဲကြောင့် ဒေသခံ ခုနစ်ထောင်နီးပါး ထွက်ပြေး

စစ်ကိုင်းတိုင်း၊ ဆားလင်းကြီးမြို့နယ် မြောက်ဘက်ခြမ်းမှာ ဇန်နဝါရီလ ၂၈ ရက် မနက်ပိုင်း က တိုက်ပွဲဖြစ်ပွားခဲ့ပြီး အရပ်သား ခုနစ်ထောင်နီးပါး အိုးအိမ်စွန့်ခွာထွက်ပြေးခဲ့ရတယ်လို့ ဒေသခံတွေက ပြောပါတယ်။

စစ်ကောင်စီတပ်တွေနဲ့ ဒေသခံကာကွယ်ရေးတပ်ဖွဲ့တွေ ပုသိမ်-မုံရွာ ကားလမ်းပေါ်မှာ တိုက်ပွဲဖြစ်ပွားခဲ့တာပါ။

တိုက်ပွဲဖြစ်ပွားမှုကြောင့် အနီးပတ်ဝန်းကျင်က ဂုဏ်တော၊ ကံကုန်းနဲ့ ဒုံးတောရွာတွေက အရပ်သားတွေ ထွက်ပြေးကြတာလို့ ကံကုန်းရွာဒေသခံတစ်ဦးက RFA ကို ပြောပါတယ်။

“ပုသိမ်-မုံရွာလမ်းပေါ်ကို ကျနော်တို့ ရွာထိပ်ကဖောက်တာ အချက်သုံးလေးဆယ် လောက် ဖောက်တာဗျ။ နောက်ကျတော့ လက်နက်ကြီးပစ်တယ်ပေါ့ဗျာ။ အဲဒီအခြေအနေမှာ ကျနော်တို့က အကုန်လုံးပြေးကြတာ”

ဒုံးတောရွာမှာ အိမ်ခြေ သုံးရာကျော်၊ ဂုဏ်တောရွာမှာ အိမ်ခြေ လေးရာကျော်နဲ့ ကံကုန်းရွာမှာ အိမ်ခြေ တစ်ထောင်ကျော် စုစုပေါင်း အိမ်ခြေ ၁၇၀၀ ကျော်ရှိတယ်လို့ ဆိုပါတယ်။

ဒီကိစ္စနဲ့ပတ်သက်လို့ စစ်ကိုင်းတိုင်းက စစ်ကောင်စီပြောရေးဆိုခွင့်ရှိသူ ဦးအေးလှိုင်ကို RFA က တယ်လီဖုန်းနဲ့ ဆက်သွယ်ခဲ့ပေမယ့် အကြောင်းမပြန်ပါဘူး။

တိုက်ပွဲငြိမ်သွားလို့ ဇန်နဝါရီလ ၂၈ ရက်နေ့လယ်ပိုင်းမှာတော့ တချို့ကနေရပ်ပြန် နေကြတယ်လို့ ဒေသခံတစ်ဦးက ပြောပါတယ်။

ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA) ရဲ့ စာရင်းတွေအရ အာဏာသိမ်းပြီးနောက် စစ်ကိုင်းတိုင်းအတွင်း အရပ်သား ခြောက်သိန်းခွဲကျော် အိုးအိမ်စွန့်ခွာထွက်ပြေးခဲ့ရပါတယ်။