ဘူးသီးတောင်နဲ့ စစ်တွေကို မစ္စယန်ဟီးလီ သွားရောက်

"မောင်တောနဲ့ ဘူးသီးတောင်ဖြစ်စဉ်မှာ ဘင်္ဂါလီတွေဘက်က အကြမ်းဖက်တာတို့၊ တပ်မတော်တို့ ရဲဝန်ထမ်း တို့ကို လည်လှီးသတ်ဖြတ်တာတို့ကို တွေ့ခဲ့ရတာဟာ လက်ခံနိုင်စရာအကြောင်းမရှိဘူး။ ဒါကို တော်တော် ဆိုးဝါးတဲ့လုပ်ရပ်ဆိုတာကို စိတ်ပျက်စရာကောင်းတယ်ဆိုတာကို သူကမှတ်ချက်ချတယ်လေ"

မြန်မာနိုင်ငံဆိုင်ရာ ကုလသမဂ္ဂ လူ့အခွင့်ရေးကိုယ်စားလှယ် မစ္စယန်ဟီးလီဟာ ဘူးသီးတောင်မြို့နယ်ကနေ ဒီနေ့ စစ်တွေမြို့ကို လာရောက်ခဲ့တာဖြစ်ပြီး စစ်တွေအကျဉ်းထောင်ကိုလည်း သွားရောက်လေ့လာခဲ့ပါတယ်။

ကုလသမဂ္ဂ လူ့အခွင့်အရေး ကိုယ်စားလှယ်အနေနဲ့ ရခိုင်ပြည်နယ်ခရီးစဉ်အတွင်း လွတ်လွတ်လပ်လပ် သွားလာခွင့် ရခဲ့ကြောင်းနဲ့ သူ့အနေနဲ့ ရခိုင်ပြည်နယ်အတွင်းမှာ နှစ်ဖက်လူ့အခွင့်အရေးရရှိဖို့အတွက် ဆောင်ရွက်နေတယ်ဆိုတာ ကို ယုံကြည်ပေးဖို့ ရွှေစေတီကျောင်းဆရာတော်ထံ တောင်းဆိုခဲ့တယ်လို့ သိရပါတယ်။

မစ္စယန်ဟီးလီဟာ အခုလ ၁၃ ရက်နေ့ကနေ ဒီနေ့အထိ ၄ ရက်ကြာ ရခိုင်ပြည်နယ်ကို သွားရောက် လေ့လာခဲ့ တာဖြစ်ပြီး စစ်တွေမြို့မှာ အစိုးရအဖွဲ့ တာဝန်ရှိသူတွေကို တွေ့ဆုံခဲ့သလို အကြမ်းဖက်မှုတွေ ဖြစ်ပွားခဲ့တဲ့ ရသေ့တောင်၊ ဘူးသီးတောင်နဲ့ မောင်တောမြို့နယ်က ဒေသခံတွေ၊ ရဲတပ်ဖွဲ့ဝင်တွေနဲ့လည်း တွေ့ဆုံခဲ့တာ ဖြစ် ပါတယ်။