မောင်တောဒေသကို ရိက္ခာပို့ခွင့်မရလို့ WFP ပြောကြား

ရခိုင်ပြည်နယ်မြောက်ပိုင်း မောင်တောဒေသက လူဦးရေ ၈ သောင်းကျော်ထံကို အစားအစာတွေ ပေးပို့နိုင်ခြင်း မရှိဘူးလို့ WFP ကမ္ဘာ့စားနပ်ရိက္ခာအစီအစဉ်က ဗုဒ္ဓဟူးနေ့မှာ ထုတ်ဖေါ်ပြောကြားပါတယ်။ အဲဒီ မြန်မာနဲ့ ဘင်္ဂလားဒေ့ရ်ှ နယ်ခြားဒေသဟာ WFP က ပုံမှန်ထောက်ပံ့ကူညီနေတဲ့ဒေသဖြစ်ပြီး မြန်မာ့တပ်မတော်က အခု ဝင်ရောက်ခွင့်မပြုတဲ့အတွက် လူထုကို သွားရောက်ကူညီလို့မရကြောင်း WFP နဲ့ ပူးပေါင်းဆောင်ရွက်နေတဲ့ အဖွဲ့တဖွဲ့က ပြောဆိုတယ်လို့ AFP သတင်းမှာ ဖေါ်ပြထားပါတယ်။

ဒီအတွင်း မောင်တောမြို့က ဗုဒ္ဓဘာသာဝင်တွေ ယာယီခိုလှုံနေတဲ့ ဘုန်းတော်ကြီးကျောင်းတခုရှေ့မှာတော့ ကုလသမဂ္ဂနဲ့ အစိုးရမဟုတ်တဲ့ တခြားအဖွဲ့အစည်းတွေထံကနေ မိမိတို့ ဘာအကူအညီမှမလိုဘူးလို့ အင်္ဂလိပ်လို စာလုံးကြီးတွေနဲ့ ရေးထားတဲ့ ဆိုင်းဘုတ်တခု စိုက်ထူထားပါတယ်။