ယူနီဖောင်းချွတ်၊ အရပ်ဝတ်လဲသော်လည်း အမေရိကန်အမြင် မပြောင်းလဲ

မြန်မာနိုင်ငံက စစ်ဗိုလ်ချုပ်တွေ ယူနီဖောင်းချွတ်ပြီး အရပ်ဝတ်လဲလိုက်တဲ့ ကိစ္စဟာ ဒီမိုကရေစီ အသွင်ကူးပြောင်းရေးကို ဦးတည်သွားပါသလားလို့ သတင်းထောက်တဦးက မေးမြန်းတာကို အမေရိကန်နိုင်ငံခြားရေးဌာန ပြောခွင့်ရပုဂ္ဂိုလ် မစ္စတာ ဖိလစ် ခရော်လီက အခုလို ပြန်လည်ဖြေကြားခဲ့တာ ဖြစ်ပါတယ်။

မစ္စတာ ခရော်လီ ပြောသွားတာကတော့ ယူနီဖောင်းကနေ အရပ်ဝတ် ပြောင်းဝတ်ပေမဲ့ အာဏာရှင်ဆိုတာ အာဏာရှင်ပါပဲ၊ မြန်မာနိုင်ငံမှာ နိုင်ငံရေးအရ ဖိနှိပ်မှုတွေက ဆက်လြက်ပီး ရှိနေမှာပါ၊ အရပ်သားအဖြစ် ပြောင်းလဲလိုက်တာဟာ အဖြေမဟုတ်ပါဘူး၊ မြန်မာနိုင်ငံမှာ တကယ် လုပ်ရမှာကတော့ နိုင်ငံရေးအရ ပွင့်လင်းမှုတွေ ရှိလာအောင် လုပ်ရပါမယ်။ စစ်အစိုးရအနေနဲ့ အတိုက်အခံတွေ၊ တိုင်းရင်သား အင်အားစုတွေနဲ့ တွေ့ဆုံဆွေးနွေးဖို့ လိုပါတယ်လို့ ဆိုပါတယ်။

ဒါ့အပြင် မြန်မာနိုင်ငံအတွင်း အတိုက်အခံ နိုင်ငံရေးပါတီတွေကို ကောင်းမွန်စွာ ရှင်သန်ခွင့်ပြုပြီး၊ လွတ်လွတ်လပ်လပ် ယှဉ်ပြိုင်လုပ်ကိုင်ခွင့် ပြုရပါမယ်။ အခုလို လုပ်ဆောင်မှုတွေ မရှိရင်တော့ လာမဲ့ ရွေးကောက်ပွဲမှာ စစ်ခေါင်းဆောင်တွေ၊ အရပ်ဖက်ခေါင်းဆောင်တွေ ပါဝင်ပေမဲ့လည်း လွတ်လပ်ပြီး တရားမျှတတဲ့ အများ ယုံကြည်လက်ခံနိုင်တဲ့ ရွေးကောက်ပွဲတရပ် ဖြစ်မှာ မဟုတ်ဘူးလို့ အမေရိကန် နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် မစ္စတာ ခရော်လီက ပြောကြားသွားခဲ့ပါတယ်။