ဝါရင့်နိုင်ငံရေးသမားကြီး သခင်အုန်းမြင့်ဈာပန ကျင်းပ

• 
  2010-09-19

“NLD အဖွဲ့ဝင် အတော်များများလည်း တွေ့ပါတယ်။ ဦးတင်ဦး၊ ဆရာဦးဝင်းတင်တို့ NLD စီအီးစီ တော်တော်များများ တွေ့ပါတယ်။ နောက် နိုင်ငံရေးသမားဟောင်းကြီးတွေ တော်တော်များများ လာကြတယ်။ ကျန်တဲ့ နိုင်ငံရေးပါတီတွေက လူတွေလည်း လာကြပါတယ်။ အများဆုံးကတော့ လူငယ်ကျောင်းသားတွေ လာကြတာ တွေ့ရတယ်။ အဘဦးအုန်းမြင့်ရဲ့ ကိုယ်ရေး အချက်အလက်တွေ ပါတဲ့ Pamphlet လည်း သူ့မိသားစုက ဝေတယ်။ ဆရာ ပန်းချီမောင်ညိုဝင်း ရေးဆွဲထားတဲ့ အဘရဲ့ ပုံတူပန်းချီကားကြီးလည်း တွေ့ရတယ်”

NLD လူမှု အထောက်အကူပြု အဖွဲ့ ဒုတိယဥက္ကဌ သခင်အုန်းမြင့်ဟာ ဗိုလ်ချုပ်အောင်ဆန်းနဲ့ ရင်းနှီးသူဖြစ်ပြီး ဗိုလ်ချုပ်ကတော် ဒေါ်ခင်ကြည်ကို ကွယ်လွန်ချိန်အထိ အနီးကပ် စောင့်ရှောက်ခဲ့သူပါ။ NLD ပါတီဝင် မဟုတ်ပေမယ့် ဒေါ်အောင်ဆန်းစုကြည်နဲ့လည်း မိသားစုဝင်တဦး ပမာ ရင်းနှီးသူ ဖြစ်ပါတယ်။

ဒီနေ့ ကျင်းပတဲ့ ဈာပနအခမ်းအနားမှာ သခင်အုန်းမြင့်ရဲ့ နိုင်ငံရေးနဲ့ လူမှုရေး ဆောင်ရွက်ချက်တွေအပေါ် ဂုဏ်ပြုတဲ့အနေနဲ့ ကြွင်းကျန်တဲ့ ရုပ်ကလာပ်ကို တက်ရောက်လာကြသူတွေက ဦးညွှတ် အလေးပြုကြတယ်လို့လည်း ဆိုပါတယ်။

သခင်အုန်းမြင့်ဟာ ၁၉၃၃ ခုနှစ်မှာ တို့ဗမာအစည်းအရုံး ဝင်ပြီး ဇာတိ လက်ပံတန်းကနေ ရန်ကုန် ရောက်လာတဲ့အခါ ကြီးပွားရေး မဂ္ဂဇင်း၊ တိုးတက်ရေး သတင်းစာနဲ့ မြန်မာ့အလင်း သတင်းစာ အယ်ဒီတာအဖွဲ့တွေမှာ ပါဝင် ရေးသားခဲ့ပါတယ်။

သခင်အုန်းမြင့်ဟာ ၁၉၅၈- ၆၀ ဗိုလ်ချုပ်နေဝင်း အိမ်စောင့်အစိုးရ လက်ထက်မှာ ပုဒ်မ- ၅ နဲ့ ထိန်းသိမ်းခံရပြီး ကိုကိုးကျွန်းကို ပို့ဆောင်ခံရပါတယ်။ အဲဒီနောက် ပြန်လွတ်လာပြီး စစ်အစိုးရလက်ထက် ၁၉၈၉ ခုနှစ်မှာ ထပ်မံ ဖမ်းဆီးခံရပြီး ထောင်ဒဏ် ၃ နှစ် ကျခံခဲ့ရသလို ၁၉၉၈ ခုနှစ်မှာ ထောင်ဒဏ် ၇ နှစ် ကျခံရပြီး ၃ နှစ်ခွဲ အကြာမှာ ပြန်လွတ်လာပါတယ်။

သခင်အုန်းမြင့်ဟာ အသက် ၉၃ နှစ်အရွယ်မှာ လူကြီးရောဂါနဲ့ ရန်ကုန်မြို့နေအိမ်မှာ စက်တင်ဘာလ ၁၇ ရက်နေ့က ကွယ်လွန်ခဲ့ပါတယ်။