ဆွစ်ဇာလန်မှာကျင်းပမယ့် စီးပွားရေးဆိုင်ရာ ထိပ်သီးညီလာခံမှာ မြန်မာကို ချန်လှပ်

ဆွစ်ဇာလန်နိုင်ငံ၊ ဂျီနီဗာမြို့မှာ ဒီဇင်ဘာ ၁၂ ရက်နေ့က ၁၄ ရက်နေ့ အထိကျင်းပဖို့ရှိနေတဲ့ ထိရောက်သော ဖွံဖြိုးတိုးတက်ရေး ပူးပေါင်းဆောင်ရွက်မှု ကမ္ဘာလုံးဆိုင်ရာ အဖွဲ့အစည်း (GPEDC)ရဲ့ ထိပ်သီးညီလာခံကို တက်ရောက်ဖို့ အတွက် မြန်မာနိုင်ငံကို မဖိတ်ကြားထားဘူးလို့ မြန်မာနိုင်ငံဆိုင်ရာ ဆွစ်ဇာလန်သံရုံးက ဒီဇင်ဘာလ ၇ ရက် မနေ့က ထုတ်ပြန်ပါတယ်။

အဲဒီညီလာခံကို တက်ရောက်ဖို့အတွက် ကုလသမဂ္ဂက အသိအမှတ်ပြုထားတဲ့ အစိုးရအဖွဲ့ ကိုယ်စားလှယ်တွေကို ဖိတ်ကြားမှာ ဖြစ်ပေမယ့် မြန်မာနိုင်ငံတော့ မပါဝင်သေးဘူးလို့ ဆွစ်ဇာလန်သံရုံး ထုတ်ပြန်ချက်မှာ ဖော်ပြပါတယ်။

ဒီထုတ်ပြန်ချက်နဲ့ ပတ်သက်ပြီး ကြိုဆိုတယ်လို့ စစ်ကောင်စီနဲ့ စီးပွားရေးလုပ်ငန်းတွေနဲ့ ပူးပေါင်းလုပ်ကိုင်နေတဲ့ ကုမ္ပဏီတွေ၊ လူပုဂ္ဂိုလ်တွေ အကြောင်းစုံစမ်းဖော်ထုတ်နေတဲ့ Justice for Myanmar က ဒီဇင်ဘာလ ၈ ရက်၊ ဒီနေ့မှာ ထုတ်ပြန်ပါတယ်။

GPEDC ထိပ်သီးညီလာခံကို စစ်ကောင်စီရဲ့ ရင်းနှီးမြုပ်နှံမှုနဲ့ နိုင်ငံခြား စီးပွားဆက်ဆံရေး ဝန်ကြီးဌာန ဒုဝန်ကြီး ဒေါက်တာ ဝါဝါမောင်က အွန်လိုင်းက တက်ရောက်ဖို့ရှိနေပြီး ဒီလိုတရားမဝင်တဲ့ စစ်ကောင်စီကို ဖိတ်ကြားတဲ့အတွက် ကန့်ကွက်ကြောင်း Justice for Myanmar ဒီဇင်ဘာလ ၇ ရက်နေ့မှာ စတင်ထုတ်ပြန်ခဲ့တာပါ။

အဲဒီနေ့မှာပဲ မြန်မာနိင်ငံဆိုင်ရာဆွစ်ဇာလန်သံရုံးကလည်း ဒီညီလာခံကိုတက်ရောက်ဖို့ ဖိတ်ကြားထားတဲ့အထဲ မြန်မာမပါဝင်သေးဘူးလို့ ထုတ်ပြန်ခဲ့တာ ဖြစ်ပါတယ်။

ထိရောက်သော ဖွံဖြိုးတိုးတက်ရေး ပူးပေါင်းဆောင်ရွက်မှု ကမ္ဘာလုံးဆိုင်ရာအဖွဲ့အစည်း GPEDC ကို နိုင်ငံတကာ ဖွံ့ဖြိုးတိုးတက်ရေးရည်ရွယ်ချက်နဲ့ ၂၀၁၂ ခုနှစ်မှာ စတင် ဖွဲ့စည်းခဲ့ပြီး နိုင်ငံတကာအစိုးရ အဖွဲ့အစည်းတွေ ပါဝင်ပါတယ်။