ပုဒ်မ ၆၆(ဃ) ပြင်ဆင်ပေးဖို့ ဆန္ဒပြတောင်းဆို

ဆက်သွယ်ရေး ဥပဒေပုဒ်မ ၆၆ (ဃ) ကို အမြန်ဆုံးပြင်ဆင်ပေးဖို့ အရပ်ဖက်အဖွဲ့တွေ၊ တက်ကြွ လှုပ်ရှားသူတွေ၊ ကျောင်းသားတွေနဲ့ ပုဒ်မ ၆၆(ဃ) နဲ့ အရေးယူခံခဲ့ရသူတွေ စုစုပေါင်း လူအင်အား ၂၀၀ နီးပါးက ဒီနေ့ ရန်ကုန်မြို့မဟာဗန္ဓုလပန်းခြံအနီးမှာ ဆန္ဒပြတောင်းဆိုကြပါတယ်။

ဒီမိုကရေစီနိုင်ငံကို သွားမယ်ဆိုတဲ့ အန်အယ်လ်ဒီအစိုးရအနေနဲ့ ပုဒ်မ ၆၆(ဃ) ကို ပြင်ဆင်ပေးဖို့ လိုအပ်ကြောင်း ဆက်သွယ်ရေးဥပဒေပုဒ်မ ၆၆(ဃ) ပြင်ဆင်ရေး ဦးဆောင်ကော်မတီဝင် ကဗျာဆရာ မောင်ဆောင်းခက ပြောပါတယ်။

"လက်ရှိဦးဆောင်နေတဲ့အစိုးရက ဒီမိုကရေစီကို သွားမယ်ဆိုတာ ယုံကြည်နေတာ၊ အခုတော့ ကျနော်တို့ကို တွေဝေသွားအောင် မလုပ်ကြပါနဲ့၊ ကျနော်တို့ တကယ်ပြည့်ပြည့်ဝဝ ယုံယုံကြည်ကြည်နဲ့ ခရီးဆက်ချင်ပါတယ်၊ ကျနော်တို့ ဒီမိုကရေစီအတွက်သော်လည်းကောင်း၊ နောက် ကျန်ရှိနေသေးတဲ့ လွှတ်တော်ထဲမှာရှိတဲ့ အစိတ်သားကို အပြင်ပြန်ရောက်အောင် လုပ်ဖို့သော်လည်းကောင်း၊ ဖွဲ့စည်းပုံအခြေခံဥပဒေ ပြင်ရေးသော်လည်းကောင်း ကျနော်တို့တွေအနေနဲ့ တက်တက်ကြွကြွ လုပ်ချင်ပါတယ်၊ ဒီလိုဘာမှမဟုတ်တဲ့ ၆၆(ဃ)နဲ့ လမ်းပေါ်မထွက်ချင်တော့ဘူး"