မြန်မာနှစ်သစ်အတွက် အမေရိကန်နိုင်ငံခြားရေးဝန်ကြီး ဆုတောင်း

သင်္ကြန်ဆိုတာ နှစ်ဟောင်းက အညစ်အကြေးတွေကို ဆေးကြောသန့်စင်တဲ့ အခါသမယဖြစ်ပြီး စစ်တပ်က အာဏာသိမ်းချိန်ကစလို့ မြန်မာပြည်သူတွေဟာ ဒုက္ခမျိုးစုံနဲ့ ရင်ဆိုင်ကြုံတွေ့နေရကြောင်းနဲ့ သင်္ကြန်အခါသမယမှာ မြန်မာပြည်သူတွေကောင်းခြင်းမင်္ဂလာနဲ့ ပြည့်စုံပါစေလို့ အမေရိကန်နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။

စစ်အာဏာရှင်ကို ဆန့်ကျင်ရာမှာ ထူးချွန်ပြောင်မြောက်ပြီး ကြံ့ကြံ့ခံနိုင်စွမ်းကို မြန်မာပြည်သူတွေက ပြသခဲ့ကြတယ်လို့ အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ထုတ်ပြန်ချက်မှာ ဖော်ပြထားပါတယ်။

အမေရိကန်ပြည်ထောင်စုက မြန်မာပြည်သူတို့နဲ့အတူ ဆက်လက်ရပ်တည်သွားမှာဖြစ်ပြီး အာဏာသိမ်းမှုနဲ့ စစ်အာဏာရှင်အဖွဲ့က ကျူးလွန်ခဲ့တဲ့ အကြမ်းဖက်မှုတွေအပေါ်တာဝန်ခံမှုရှိဖို့ ဆက်လက်ဆောင်ရွက်သွားမယ်လို့လည်း ထုတ်ပြန်ထားပါတယ်။

မြန်မာနိုင်ငံမှာ အားလုံးပါဝင်တဲ့ ဒီမိုကရေစီစနစ် ပြန်လည်ဖော်ဆောင်ဖို့နဲ့ ရေရှည်တည်တံ့တဲ့ ငြိမ်းချမ်းရေးရရှိဖို့ အကူအညီပေးဖို့ အမေရိကန်ပြည်ထောင်စုက သံန္နိဋ္ဌာန်ခိုင်ခိုင်မာမာချထားတယ်လို့ ဆိုပါတယ်။
ဒီနှစ်သင်္ကြန်ကို တော်လှန်သင်္ကြန်အဖြစ်ပါဝင် ဆင်နွှဲကြဖို့ စစ်အာဏာဆန့်ကျင်ရေး ဆန္ဒပြသပိတ် ခေါင်းဆောင်တွေက တိုက်တွန်းထားပါတယ်။

ဧပြီလ ၈ ရက်နေ့က ရန်ကုန်မြို့တော်ဝန် သင်္ကြန်မဏ္ဍပ်အနီး ဖောက်ခွဲ တိုက်ခိုက်မှု တစ်ခုဖြစ်ခဲ့ပါတယ်။ သင်္ကြန်ကာလအတွင်းမှာ တော်လှန်ရေးအင်အားစုတွေအနေနဲ့ စစ်ကောင်စီကို တိုက်ခိုက်မယ်လို့ တရားဝင် ကြေညာထားပြီး လူထုအနေနဲ့ သင်္ကြန်မဏ္ဍပ်တွေနဲ့ ပျော်ပွဲရွှင်ပွဲတွေအနား မသွားလာကြဖို့ သတိပေး ထားပါတယ်။

ကပ်ရောဂါဖြစ်ပွားချိန် ၂၀၂၀ ခုနှစ်ကစလို့ မြန်မာနိုင်ငံမှာ သင်္ကြန်ပွဲတော်မှာ မကျင်းပခဲ့တာ ဖြစ်ပါတယ်။