ရိုဟင်ဂျာအရေး နိုင်ငံတကာ အထောက်အကူရဖို့ ဘင်္ဂလားဒေ့ရှ် ကြိုးစား

မြန်မာနိုင်ငံမှာ လက်နက်ကိုင် ပဋိပက္ခတွေ ဆက်လက်ဖြစ်ပွားနေတာ၊ အထူးသဖြင့် ရခိုင်ပြည်နယ်က ပဋိပက္ခကို အထူးစိုးရိမ်မကင်းဖြစ်ရကြောင်း ဘင်္ဂလားဒေ့ရှ်နိုင်ငံခြားရေးဝန်ကြီး Jashim Uddin က ပြောကြားလိုက်ပါတယ်။

ရခိုင်ပြည်က ပဋိပက္ခကြောင့် ဘင်္ဂလားဒေ့ရှ်ကို မြန်မာနိုင်ငံက လူတွေ ထပ်မံရောက်ရှိလာတယ်လို့ ပြောပါတယ်။

နိုင်ငံခြားရေးဝန်ကြီးဌာနမှာ မြန်မာနိုင်ငံဆိုင်ရာ ပြင်သစ်သံအမတ်နဲ့ ဒီလ ၁၂ ရက်က တွေ့ဆုံချိန်မှာ ပြောကြားတာပါ။

ရိုဟင်ဂျာပြဿနာ ရေရှည်အဖြေရှာဖို့ ပြင်သစ်အစိုးရ အပါအဝင် နိုင်ငံတကာ အထောက်အကူရဖို့ ဘင်္ဂလားဒေ့ရှ် နိုင်ငံခြားရေးဝန်ကြီးက ကြိုးစားနေတယ်လို့လည်း BSS သတင်းက နိုဝင်ဘာ ၁၃ ရက်မှာ ဖော်ပြပါတယ်။

နေရပ်က အဓမ္မရွှေ့ပြောင်းခံရသူတွေကို မြန်မာနိုင်ငံ ပြန်ပို့ရေးကိစ္စမှာ ဘယ်လိုမှ တိုးတက်မလာတဲ့အတွက် ဘင်္ဂလားဒေ့ရှ်က စိတ်ပျက်ရတယ်လို့ ပြင်သစ်သံအမတ်ကို ဝန်ကြီးက ပြောကြားပါတယ်။

ရိုဟင်ဂျာတွေကို ဘင်္ဂလားဒေ့ရှ်က လူသားချင်းစာနာရေး အကူအညီပေးတဲ့အတွက် ပြင်သစ်က လေးစားသိအမှတ်ပြုကြောင်း ပြင်သစ်သံအမတ်က ပြောကြားပြီး ရိုဟင်ဂျာအရေးမှာ ဘင်္ဂလားဒေ့ရှ်ကို အထောက်အကူပေးမဲ့ အကြောင်းလည်း ပြောပါတယ်။