လွှတ်တော်အမတ်အဖြစ်က ဖယ်ရှားမှု နိုင်ငံရေးထိုးနှက်ချက် ဖြစ်ကြောင်း RNDP ပါတီပြောကြား

နိုင်ငံရေးအရ အခုလို ထိုးနှက်ခံရတဲ့အပေါ် ပြည်သူတရပ်လုံး သိရှိအောင် ထောက်ပြလိုတဲ့အတွက် RNDP ပါတီက ပြည်သူ့လွှတ်တော် အမတ် ၈ ဦးနဲ့ အမျိုးသားလွှတ်တော်အမတ် ၇ ဦး စုပေါင်း လက်မှတ် ရေးထိုးပြီး ဒီ ကြေညာချက်ကို ထုတ်ပြန်ရတာ ဖြစ်တယ်လို့ ပါတီဥက္ကဋ္ဌ ဖြစ်သူ အမျိုးသားလွှတ်တော်အမတ် ဒေါက်တာအေးမောင်က ပြောပါတယ်။

“ဒါဟာ နိုင်ငံရေးအားဖြင့် လုပ်ကြံခံရတယ်ဆိုတဲ့ ယူဆချက်နဲ့ ကျနော်တို့က ကမ္ဘာသူ ကမ္ဘာသားတွေလည်း သိအောင်၊ တကယ်တမ်း စစ်စစ်မှန်မှန် မဲပေးခဲ့တဲ့ ရခိုင်ပြည်သူလူထုကလည်း သိအောင်၊ ကျနော်တို့ ပါတီဝင်ထုကလည်း သိအောင် ကျနော်တို့ရဲ့ ရခိုင်တိုင်းရင်းသားများ တိုးတက်ရေးပါတီက လွှတ်တော်အမတ်တွေရဲ့ တကယ့်ရင်ထဲက ဆန္ဒကို လူထုသိအောင် ချပြတဲ့ ကြေညာချက်ပါ”

RNDP ပါတီ အမတ် ဦးအောင်ကျော်ဇံဟာ ရွေးကောက်ပွဲမှာ မတရားသဖြင့် အောင်မြင်ခဲ့တာ ဖြစ်ကြောင်း ပြိုင်ဘက် ကြံ့ခိုင်ဖွံ့ဖြိုးရေး ပါတီက ဝင်ရောက်ယှဉ်ပြိုင်ခဲ့သူ ဦးထွန်းအောင်ခိုင်က တိုင်ကြားထားတဲ့ အမှုကို ရွေးကောက်ပွဲကော်မရှင်က သုံးကြိမ် စစ်ဆေးပြီးနောက် ဦးအောင်ကျော်ဇံကို လွှတ်တော်အမတ်က ပယ်ဖျက်ကြောင်း၊ ဦးထွန်းအောင်ခိုင် သာလျင် အနိုင်ရရှိတဲ့ လွှတ်တော်ကိုယ်စားလှယ် ဖြစ်ကြောင်း ပြည်ထောင်စု ရွေးကောက်ပွဲကော်မရှင် ဥက္ကဋ္ဌ ဦးတင်အေး က စက်တင်ဘာလ ၉ ရက် နေ့စွဲနဲ့ ထုတ်ပြန်ကြေညာခဲ့ ပါတယ်။

အမှုကို အရံှုးအနိုင် မကြေညာခင်မှာ ကော်မရှင်က ဘယ်လို ဆုံးဖြတ်မယ်ဆိုတာ ကြိုတင်သတင်းတွေ ပေါ်ထွက်ခဲ့ကြောင်း၊ နိုင်ငံရေးအရ လုပ်ကြံမှုကြောင့် ပေါ်ပေါက်ခဲ့ရတဲ့ ပြည်သူ့လွှတ်တော် ကိုယ်စားလှယ် ဦးအောင်ကျော်ဇံရဲ့ နစ်နာမှုတွေအပေါ် စိတ်မကောင်း ဖြစ်ရကြောင်း၊ ဒီအမှုနဲ့ပတ်သက်လို့ အခုလို ပေါ်ထွက်ခဲ့တဲ့ ရလဒ်ဟာ လုံးဝ လက်မခံနိုင်စရာဖြစ်ပြီး၊ ပြစ်တင်ရှုံ့ချကြောင်း RNDP ရခိုင်တိုင်းရင်းသားများ တိုးတက်ရေးပါတီရဲ့ ကြေညာချက်မှာ ဖော်ပြထားပါတယ်။