ထင်ရှားတဲ့ နိုင်ငံရေးအကျဉ်းသား တချို့ ထောင်ပြောင်း

• 
  2011-11-16

အဲဒီလို ထောင်ပြောင်းတဲ့ အထဲမှာ စစ်ကိုင်းတိုင်း ကလေးမြို့ အကျဉ်းထောင်က နိုင်ငံရေး အကျဉ်းကျ အရှင် ဂမ္ဘီရနဲ့ ရခိုင်ပြည်နယ် ဂွမြို့နယ် လွှတ်တော် အမတ် ဦးညီပု တို့လည်း ပါဝင်တယ်လို့ သိရပါတယ်။

ဘယ်ထောင်ပြောင်းတယ် ဆိုတာ အတိအကျ မသိရပေမဲ့ ရန်ကုန် အင်းစိန်ထောင်ကို ပြောင်းတယ်လို့ ထင်ကြေးပေးနေကြ ပါတယ်။

အရှင် ဂမ္ဘီရနဲ့ ဦးညီပုတို့ကို အများ မမြင်အောင် လေယာဉ်နား အထိ ကားနဲ့ ခေါ်သွားတဲ့ အကြောင်း အရှင် ဂမ္ဘီရရဲ့မယ်တော် ဒေါ်ရေးက ကလေးမြို့ လေဆိပ် အနီးကနေ အာရ်အက်ဖ်အေကို ပြောပါတယ်။

အခုလို အကျဉ်းသားတွေကို ပြောင်းရွှေ့တာ မိဘ ဆွေမျိုးတွေကို အကြောင်းကြားခြင်း မရှိဘူးလို့ သိရပါတယ်။ အာရ်အက်ဖ်အေက လက်လှမ်းမှီသမျှ စုံစမ်းရရှိတဲ့ သတင်းတွေ အရ ကျိုင်းတုံထောင်က ကိုမင်းကိုနိုင်ကို သရက်ထောင်၊ ပူတာအိုထောင်က ဦးခွန်ထွန်းဦးကို တောင်ငူထောင်၊ ကိုစည်သူဇေယျကို အင်းစိန်ထောင် ကနေ ဟင်္သာတထောင်၊ ကျောက်ဖြူထောင်က ကိုသူရိန်ကျော်ကို ဖားအံထောင် အသီးသီး ပြောင်းရွှေ့လိုက်တယ်လို့ သိရပါတယ်။

အခုလ ၁၃ ရက်က မြန်မာနိုင်ငံ အမျိုးသား လူ့အခွင့်အရေး ကော်မရှင်ကနေ နယ်ဝေးထောင်တွေမှာ ယုံကြည်ချက်ကြောင့် အကျဉ်းကျ ခံနေရတဲ့သူတွေကို လွတ်ငြိမ်း ချမ်းသာခွင့်မှာ ထည့်မပေးနိုင်သေးရင် မိသားစုနဲ့ နီးစပ်တဲ့ နေရာတွေက ထောင်တွေကို ပြောင်းပေးဖို့ သမ္မတ ဦးသိန်းစိန်ကို မေတ္တာရပ်ခံခဲ့ပါတယ်။