မြစ်ကြီးနားကနေ ချီတက်လာတဲ့ ငြိမ်းချမ်းရေးတွဲလက်များ အဖွဲ့ နေပြည်တော်ရောက်ရှိ

မြန်မာနိုင်ငံမှာ ပြည်တွင်းစစ်ကြီးအဆုံးသတ်ဖို့ ၊ တိုင်းပြည်ငြိမ်းချမ်းရေးအတွက် ဆွေးနွေးမှု စားပွဲဝိုင်းမှာ ညှိနှိုင်း အဖြေရှာဖို့နဲ့ စစ်ဘေးဒုက္ခသည်တွေကို ကူညီထောက်ပံ့ဖို့ စတဲ့ တောင်းဆိုမှုတွေ နဲ့ ချီတက်လာတာဖြစ်ပါတယ်။

အဲဒီအဖွဲ့ဟာ မူလက ဖေဖော်ဝါရီလ ၂၈ ရက်နေ့မှာ ကျင်းပမယ့် ၂၁- ရာစုပင်လုံ ပြည်ထောင်စု ငြိမ်းချမ်းရေး ညီလာခံအမီ လာရောက်ကြတာဖြစ်ပါတယ်။

ငြိမ်းချမ်းရေးတွဲလက်များအဖွဲ့ဟာ နိုင်ငံတော်အတိုင်ပင်ခံပုဂ္ဂိုလ်နဲ့ တွေ့ဆုံခွင့်ရရှိဖို့ တင်ပြထားတယ်လို့လည်း အဖွဲ့ခေါင်းဆောင် ဦးသိန်းလွင် က ပြောပါတယ်။

ဒါ့အပြင် မြစ်ကြီးနားမြို့ကနေ နေပြည်တော်အထိ ဖြတ်သန်းခဲ့တဲ့ လမ်းတစ်လျှောက်မှာ ငြိမ်းချမ်းရေး အတွက် ပြည်သူလူထုထံက လက်မှတ်တွေ ကောက်ခံခဲ့ပြီး ငြိမ်းချမ်းရေးညီလာခံထံ တိုက်ရိုက်တင်ပြဖို့ စီစဉ်ထားတာဖြစ်ပါတယ်။

ငြိမ်းချမ်းရေးတွဲလက်များ အဖွဲ့ဟာ ဖေဖော်ဝါရီလ ၁၅ ရက်နေ့ က စတင်ပြီး မြစ်ကြီးနား မြို့ကနေထွက်ခွာလာ တာဖြစ်ပါတယ်။