တပ်မတော်သားတွေကို နိုင်ငံတော် ကသာ ထောက်ပံ့ဖို့ လွှတ်တော်မှာဆွေးနွေး

မြန်မာနိုင်ငံမှာ နိုင်ငံတကာရဲ့စီးပွားရေး ပိတ်ဆို့မှုဒဏ်တွေကြောင့် စီမံခန့်ခွဲမှု လိုအပ်ချက်တွေရှိခဲ့ပြီး၊ အခုအချိန်မှာ ပြည်သူလူထုမှာ အလုပ်လက်မဲ့ခံစားမှုတွေ၊ ဆင်းရဲနွမ်းပါးမှုဒဏ်တွေ ခံစားနေကြရတဲ့အတွက် အမျိုးသားစီမံကိန်းမူကြမ်းမှာ ထည့်သွင်းစဉ်းစားနိုင်ဖို့ကိုလည်း ရန်ကုန်တိုင်းဒေသကြီးမဲဆန္ဒနယ်မှ ဒေါ်ခင်ဝိုင်းကြည်က ဆွေးနွေးသွားပါတယ်။

ဒီကနေ့ ပြည်ထောင်စုလွှတ်တော်မှာ ပဉ္စမ ငါးနှစ်တိုကာလ အမျိုးသားစီမံကိန်းမူကြမ်းနဲ့ ပတ်သက်လို့ ဒုတိယနေ့အဖြစ် လွှတ်တော်ကိုယ်စားလှယ် ၁၈ဦးတို့က ဆွေးနွေးခဲ့ကြပြီး၊ အဲဒီဆွေးနွေးပွဲမှာ ဒေသအလိုက် ပြည်သူတွေရဲ့ ခံစားနေရတဲ့ ကျန်းမာရေး၊ ပညာရေး၊ ဆက်သွယ်ရေး၊ အလုပ်အကိုင်အခွင့်အရေး၊ လျှပ်စစ်၊ ကာကွယ်ရေး၊ လယ်ယာစိုက်ပျိုးရေးနဲ့ သစ်တောရေးရာ စတဲ့ ကိစ္စရပ်တွေကို အများဆုံးဆွေးနွေးခဲ့ကြပါတယ်။