ပုလောမှာ အုပ်ချုပ်ရေးမှူးနဲ့ သားဖြစ်သူ သတ်ဖြတ်ခံရ

တနင်္သာရီတိုင်း၊ ပုလောမြို့ အမှတ် ၃ ရပ်ကွက်က စစ်ကောင်စီခန့်ထားတဲ့ ရပ်ကွက်အုပ်ချုပ်ရေးမှူးနဲ့ သားဖြစ်သူ စာတိုက်စာရေးကို ပစ်ခတ်ရှင်းလင်းခဲ့တယ်လို့ ပြည်သူ့ကာကွယ်ရေးတပ်မတော် မြိတ်ခရိုင် အမှတ် (၁) တပ်ရင်းက မတ်လ ၁ ရက်နေ့မှာ ထုတ်ပြန်ပါတယ်။

ဖေဖော်ဝါရီလ ၂၇ ရက်နေ့ ညနေက အသက် ၇၄ နှစ်အရွယ် အုပ်ချုပ်ရေးမှူး ဦးထွန်းမြင့်နဲ့ သားဖြစ်သူ အသက် ၄၁ နှစ်အရွယ် စာတိုက်စာရေး ကိုဝင်းမင်းထွန်းကိုတို့ကို သူတို့နေအိမ်မှာပဲ မြိတ်ခရိုင် အမှတ်(၁) တပ်ရင်း၊ ကရင်အမျိုးသားကာကွယ်ရေးတပ် KNDO တပ်ရင်း ၇ ပူးပေါင်းတပ်တွေက ပစ်ခတ်ရှင်းလင်းခဲ့တာလို့ ဆိုပါတယ်။

သူတို့ဟာ စစ်မှုထမ်းအတွက် လူသစ်စုဆောင်းတာနဲ့ ပြည်သူတွေကို ခြိမ်းခြောက်တာကြောင့် ရှင်းလင်းတာလို့ မြိတ်ခရိုင် အမှတ်(၁) တပ်ရင်းတာဝန်ရှိသူက RFA ကို ပြောပါတယ်။

"၂၇ ရက်နေ့ ညနေ ခြောက်နာခွဲလောက်မှာ ရှင်းလင်းခဲ့တယ် ခင်ဗျ။ အဓိက အကြောင်းအရင်းကတော့ စစ်မှုထမ်း လူသစ် စုဆောင်းတာ၊ ခြိမ်းခြောက်တာ၊ ငွေညှစ်တာ၊ သတင်းပေးလုပ်တာတွေ လုပ်နေလို့ပါဗျ"

ဦးထွန်းမြင့်ဟာ စစ်တပ်အာဏာသိမ်းချိန်ကစပြီး အကြမ်းမဖက်အာဏာဖီဆန်ရေးလှုပ်ရှားမှု (CDM) လုပ်သူတွေနဲ့ မိသားစုဝင်တွေကို ဖမ်းဆီးဖို့အတွက် သတင်းပေးတာ၊ အတင်းအဓ္မ စစ်သားစုဆောင်းတာ၊ လူငယ်တွေကို စစ်မှုထမ်းရမယ်ဆိုပြီး ခြိမ်းခြောက်ငွေညှစ်တာတွေလုပ်ခဲ့တယ်လို့လည်း ဆိုပါတယ်။

သားဖြစ်သူ ကိုဝင်းမင်းထွန်းကလည်း CDM တွေနဲ့ လက်နက်ကိုင်ဆန့်ကျင်သူတွေရဲ့နေအိမ်တွေကို လိုက်လံပြသတာ၊ စစ်ကောင်စီကိုသတင်းပေးတာ၊ စစ်မှုထမ်းအတွက် အိမ်ထောင်စုစာရင်းကောက်တာတွေ ပြုလုပ်တယ်လို့ ပြောပါတယ်။ ဒီစွပ်စွဲချက်တွေနဲ့ ပတ်သက်ပြီး RFA အနေနဲ့ သီးခြားအတည်မပြုနိုင်ပါဘူး။

ဒီအုပ်ချုပ်ရေးမှူးနဲ့ သားဖြစ်သူသတ်ဖြတ်ခံရတာနဲ့ ပတ်သက်ပြီး စစ်ကောင်စီရဲ့ တနင်္သာရီတိုင်းအစိုးရပြောခွင့်ရ သူ လူမှုရေးဝန်ကြီး ဦးသက်နိုင်ကို RFA က ဖုန်းနဲ့ဆက်သွယ်မေးမြန်းပေမဲ့ ဖုန်း လက်ခံမဖြေဆိုပါဘူး။

ပုလောမြို့နယ်က ရပ်ကွက်ကျေးရွာတွေက အုပ်ချုပ်ရေးမှူးတွေအနေနဲ့ စစ်ကောင်စီယန္တရားလည်ပတ်နိုင်အောင် ကူညီတာ၊ လူငယ်တွေကို အတင်းအဓမ္မ စစ်သားစုဆောင်းတာတွေမလုပ်ကြဖို့ တိုက်တွန်းထားပြီး ပြုလုပ်ပါက အပြင်းထန်ဆုံး အပြစ်ပေးသွားမယ်လို့လည်း ပြည်သူ့ကာကွယ်ရေးတပ်မတော် မြိတ်ခရိုင် အမှတ်(၁) တပ်ရင်းရဲ့ ထုတ်ပြန်ချက်မှာ ရေးသားထားပါတယ်။