စစ်လေယာဉ်တွေ ဖျက်ဆီးပြီး ပြည်သူနဲ့ ပူးပေါင်းဖို့ NUG ဆုကြေးထုတ် ဖိတ်ခေါ်

စစ်ကောင်စီတပ်သားတွေအနေနဲ့ အာဏာသိမ်းစစ်ကောင်စီရဲ့ အမိန့်ကို မလိုက်နာဘဲ ပြည်သူနဲ့ ပူးပေါင်းလာမယ်ဆိုရင် ဆုကြေးငွေတွေပေးမယ်လို့ အမျိုးသားညီညွတ်ရေး အစိုးရ (NUG) က ဖိတ်ခေါ်လိုက်ပါတယ်။

NUG ယာယီသမ္မတ ဒူဝါလရှီးလရဲ့ ဧပြီလ ၇ ရက် ဒီကနေ့ညပိုင်း ထုတ်ပြန်တဲ့ ကြေညာချက်ထဲမှာ…

ဘယ်သူမဆို လေယာဉ်၊ ရဟတ်ယာဉ်တွေနဲ့အတူ ပြည်သူနဲ့ပူးပေါင်းလာမယ်ဆိုရင် အမေရိကန် ဒေါ်လာ ငါးသိန်း၊ မြန်မာငွေနဲ့ဆိုရင် သိန်းတစ်သောင်း ချီးမြှင့်မယ်လို့ ဆိုထားပါတယ်။

တိုက်လေယာဉ်၊ ရဟတ်ယာဉ်၊ ထောက်ပို့လေယာဉ်၊ တိုက်ရေယာဉ်တွေကို အကြီးစားထိခိုက်အောင် ဖျက်ဆီးပြီး ပူးပေါင်းလာမယ်ဆိုရင် မြန်မာငွေ သိန်းခြောက်ထောင် ချီးမြှင့်မယ်လို့ ဆိုပါတယ်။

ဒါ့အပြင် စစ်ကောင်စီရဲ့ ဆီသိုလှောင်ကန်တွေ၊ လက်နက်စက်ရုံတွေကို ဖျက်ဆီးနိုင်ရင် ဒါမှမဟုတ် CDM ဝင်လာချိန်မှာ တင့်ကား၊ သံချပ်ကာကားတွေ ယူလာနိုင်ရင် မြန်မာငွေ သိန်း နှစ်ထောင် ချီးမြှင့်မယ်လို့လည်း ဆိုပါတယ်။

စစ်ကောင်စီဟာ ပြည်သူ့ဘဏ္ဍာနဲ့ ဝယ်ယူထားတဲ့ စစ်ပစ္စည်းတွေနဲ့ ပြည်သူတွေကို ပြန်တိုက်နေတာကြောင့် အခုလိုဆုငွေတွေ ထုတ်ပြီး ဖျက်ဆီးခိုင်းတာလို့ NUG ယာယီသမ္မတရဲ့ ကြေညာချက်မှာ ဖော်ပြထားပါတယ်။

ဒီလိုဖျက်ဆီးတဲ့အတွက် ပြည်သူပိုင်ပစ္စည်းဖျက်ဆီးမှုနဲ့ တရားစွဲခံရမှာ မဟုတ်သလို၊ စစ်ကောင်စီတပ်သားတွေအနေနဲ့ ဒီဆုကြေးငွေရဖို့အတွက် အုပ်စုလိုက်လည်း လုပ်ဆောင်လို့ရတယ်လို့ ပြောပါတယ်။

ဒီထုတ်ပြန်ချက်နဲ့ ပတ်သက်လို့ စစ်ကောင်စီဘက်က တုံ့ပြန်ချက်ကို RFA က လတ်တလော မေးမြန်းနိုင်ခြင်း မရှိသေးပါဘူး။